பிரிட்டனின் மிட்டில்ஸ்பரோ (Middlesbrough) பகுதியில் உள்ள ஏ66 (A66) விரைவுச்சாலையில் இரண்டு காவல் அதிகாரிகள் உட்பட 7 பேர் பரிதாபமாக உயிரிழந்த கொடூர கார் விபத்தின் பின்னணியில், உள்ளூர் போதைப்பொருள் கும்பல்களுக்கு இடையே நிலவிய பழிவாங்கும் கேங் வார் (Gangland Feud) மோதல்கள் இருந்தது பிரிட்டன் காவல் துறையின் தீவிர விசாரணையில் அம்பலமாகியுள்ளது. மர்ம வோல்வோ எக்ஸ்.சி60 (Volvo XC60) கார் ஒன்று வீட்டின் மீது மோதிய சம்பவத்தைத் தொடர்ந்து ஏற்பட்ட இந்த மோதல், ஒட்டுமொத்த பிரிட்டனையும் உலுக்கியுள்ளது.
விசாரணை விவரங்களின்படி, சம்பவம் நடந்த அதிகாலை 3 மணியளவில் போலி எண்களுடன் வந்த வோல்வோ கார் ஒன்று, 17 வயது சிறுவன் கோல் வொர்த்தியின் தந்தை வீட்டின் மீது மோதித் தாக்குதல் நடத்தியது. இதற்குப் பழிவாங்கும் நோக்கில் கோல் வொர்த்தி தனது கூட்டாளிகளுடன் ஃபோக்ஸ்வேகன் பாசாட் (VW Passat) காரில் வோல்வோ காரைத் தேடிப் புறப்பட்டுள்ளார். அப்பகுதியில் ஆபத்தான முறையில் அதிவேகமாகச் சென்ற இந்த வாகனங்களைக் ரோந்துப் போலீசார் பின்தொடர முயன்றபோது, பாசாட் கார் எதிர்பாராதவிதமாக ஏ66 சாலையில் தவறான பாதையில் (Wrong Way) புகுந்து எதிரே வந்த காவல் வாகனத்தின் மீது நேருக்கு நேர் பயங்கரமாக மோதியது.
இந்தக் கோர விபத்தில் காரில் பயணித்த கோல் வொர்த்தி, மைக்கேல் சாஹில் உட்பட 5 இளைஞர்களும், காவல் துறையின் ஆயுதப்படை பிரிவைச் சேர்ந்த அதிகாரிகள் மேத்யூ பிளேட்ஸ் மற்றும் டாம் கிளாஃப் ஆகிய இருவருமாக மொத்தம் 7 பேர் சம்பவ இடத்திலேயே பலியாயினர். காரில் பயணித்த இளைஞர்களில் மைக்கேல் சாஹில் என்பவர், வடகிழக்கு இங்கிலாந்தின் முன்னணி போதைப்பொருள் கடத்தல் மற்றும் ஒழுங்கமைக்கப்பட்ட குற்றக் கும்பலுடன் (Organised Crime Group) நேரடியாகத் தொடர்பிலிருந்தவர் என்பதும், வோல்வோ காரை ஓட்டிச் சென்ற நபர் கோல் வொர்த்தியின் முன்னாள் பள்ளி நண்பர் என்பதும் விசாரணையில் தெரியவந்துள்ளது.
இச்சம்பவத்தைத் தொடர்ந்து மிட்டில்ஸ்பரோ மற்றும் சுற்றியுள்ள பகுதிகளில் கலவரச் சூழல் உருவானதை அடுத்து, காவல் துறை சிறப்புப் படையினர் நடத்திய அதிரடி வேட்டையில் ஆயுதங்கள் மற்றும் போதைப்பொருட்களுடன் தொடர்புடைய 12-க்கும் மேற்பட்டோர் கைது செய்யப்பட்டுள்ளனர். இரண்டு போக்கிரி கும்பல்களின் தனிப்பட்ட பழிவாங்கும் மோதலில் இரண்டு நேர்மையான காவல் அதிகாரிகள் உயிரிழந்த சம்பவம், பிரிட்டன் பொதுமக்கள் மற்றும் காவல் துறை வட்டாரங்களில் பெரும் கொந்தளிப்பையும் சோகத்தையும் ஏற்படுத்தியுள்ளது.
