பிரிட்டனின் ஹாம்ப்ஷயர் பகுதியில் உள்ள மார்வெல் உயிரியல் பூங்காவிற்கு (Marwell Zoo) கடந்த மார்ச் மாதம் கொண்டுவரப்பட்ட ஒரு வயது நிரம்பிய ‘சம்பா’ (Samba) என்ற பெண் கேபிபாரா (Capybara – உலகின் மிகப்பெரிய எலி இன விலங்கு) தப்பிச் சென்றது. ஆறு மாதங்களுக்கும் மேலாகத் தப்பி ஓடும் இந்த விலங்கைத் தேடும் பணிகள் தீவிரமாக நடைபெற்று வந்தன. இந்நிலையில், வனப்பகுதியில் பொருத்தப்பட்டிருந்த தானியங்கி கேமரா பொறிகளில் (Camera traps) சம்பா ஆரோக்கியமாக உலா வரும் புதிய புகைப்படங்கள் பதிவாகியுள்ளதாக பூங்கா நிர்வாகம் அதிகாரப்பூர்வமாக உறுதிப்படுத்தியுள்ளது.
காட்டுப் பகுதியில் சம்பா தனக்குத் தேவையான உணவை உண்டு மிகவும் குண்டாகவும் ஆரோக்கியமாகவும் இருப்பதை கேமரா பதிவுகள் காட்டுவதாக உயிரியல் பூங்காவின் மக்கள் தொடர்பு அதிகாரி லூயிஸ் ரீட் தெரிவித்துள்ளார். ஆறு மாதங்களாகத் தேடப்பட்டு வந்த இந்த விலங்கு, மனிதர்களின் நடமாட்டம் இல்லாத அடர்ந்த தாவரங்கள் மற்றும் நீர்நிலைகள் நிறைந்த வனப்பகுதியைப் புகலிடமாகக் கொண்டு வாழ்ந்து வருகிறது. சம்பாவைப் பாதுகாப்பாகப் பிடிப்பதற்காகத் வெப்ப உணரி ட்ரோன்கள் மற்றும் சிறப்பு உணவளிக்கும் இடங்களை அமைத்துத் தேடுதல் குழுவினர் தீவிர நடவடிக்கைகளில் ஈடுபட்டுள்ளனர்.
பொதுமக்கள் சம்பாவைக் கண்டால் உடனடியாகத் தகவல் தெரிவிக்குமாறும், தானாகப் பிடிக்க முயல வேண்டாம் என்றும் கேட்டுக்கொள்ளப்பட்டுள்ளனர்.
சம்பா ஆரோக்கியமாக இருப்பது உறுதி செய்யப்பட்டுள்ளதைத் தொடர்ந்து, அதை மீட்டெடுத்து மீண்டும் உயிரியல் பூங்காவில் சேர்க்கும் முயற்சிகளைத் தேடுதல் குழுவினர் முடுக்கிவிட்டுள்ளனர்.
விரைவில் சம்பா பாதுகாப்பாகப் பிடிக்கப்பட்டுப் பூங்காவில் உள்ள அதன் சகோதரியான டேங்கோவுடன் சேர்த்து வைக்கப்படும் என எதிர்பார்க்கப்படுகிறது.
