சென்னை முகப்பேர் பகுதியில் தனியார் ஊடகம் நடத்திய அரசியல் விவாத நிகழ்ச்சியின் போது, தமிழக வெற்றி கழகத்தின் (த.வெ.க) ஆதரவாளராகக் கலந்துகொண்ட மூத்த பேச்சாளர் நாஞ்சில் சம்பத் மீது தாக்குதல் நடத்தப்பட்ட சம்பவம் பெரும் பரபரப்பை ஏற்படுத்தியுள்ளது. விவாதத்தின் போது ஆளும் திமுக அரசை மற்றும் அதன் தலைவர்களை நாஞ்சில் சம்பத் கடுமையாக விமர்சித்துப் பேசியதாகக் கூறப்படுகிறது.
இந்தக் காரசாரமான விவாதத்தின் போது, நாஞ்சில் சம்பத் பயன்படுத்திய சில வார்த்தைகள் அரங்கில் இருந்த திமுக தரப்பினரையும் பார்வையாளர்களையும் பெரும் கொந்தளிப்படையச் செய்தன. இதனால் இருதரப்பிற்கும் இடையே வாக்குவாதம் முற்றி, கட்டுக்கடங்காதச் சூழல் நிலவியது. இதன் உச்சகட்டமாக, அரங்கில் இருந்த ஒருவர் திடீரென நாற்காலியை எடுத்து நாஞ்சில் சம்பத் திசையை நோக்கி வீசியதால் அங்கு பெரும் மோதல் வெடித்தது.
திடீரென அரங்கேறிய இந்த வன்முறை சம்பவத்தால் விவாத அரங்கம் முழுவதும் கூச்சலும் குழப்பமும் நிறைந்து தள்ளுமுள்ளு ஏற்பட்டது. இந்தத் தாக்குதல் மற்றும் சலசலப்பு தொடர்பான வீடியோ காட்சிகள் சமூக வலைதளங்களில் தீயாகப் பரவி, தமிழக அரசியல் வட்டாரத்தில் அதிர்வலைகளை உருவாக்கியுள்ளது.
சம்பவ இடத்திற்கு உடனடியாகச் சென்ற காவல்துறையினர் மற்றும் அமைப்பாளர்கள் நிலைமையைக் கட்டுக்குள் கொண்டுவந்தனர். ஊடக விவாத மேடைகளிலேயே அரசியல் கட்சியினர் இதுபோன்று மோதிக்கொள்ளும் கலாச்சாரம் அதிகரித்து வருவது ஜனநாயக ரீதியிலான விவாதங்களுக்கு முற்றுப்புள்ளி வைப்பது போல் உள்ளதாகச் சமூக ஆர்வலர்கள் கவலை தெரிவித்துள்ளனர்.
