பியாங்யாங்: ஜப்பான் நாடு தனது தற்காப்புக் கொள்கைகளில் இருந்து விலகி, ராணுவப் பலத்தை வேகப்படுத்தி வருவதாகவும், அது ‘போர் மாநிலமாக’ (War State) உருவெடுத்து வருவதாகவும் வடகொரியா பகிரங்கமாகக் குற்றம் சாட்டியுள்ளது. ஜப்பானின் இந்தத் தீவிர ராணுவ நடவடிக்கைகளுக்குப் பதிலடி கொடுக்கும் வகையில் புதிய ராணுவ விருப்பங்களை (Additional Military Options) வடகொரியா பரிசீலிக்கும் என வடகொரிய அதிபர் கிம் ஜோங் உன்-னின் சகோதரி கிம் யோ ஜாங் எச்சரித்துள்ளார்.
வடகொரியாவின் அதிகாரப்பூர்வ கொரிய மத்திய செய்தி முகமை (KCNA) வாயிலாக வெளியான அறிக்கையில், அமெரிக்கத் தயாரிப்பான ‘டொமாஹாக்’ (Tomahawk) நீண்ட தூர ஏவுகணைகளை ஜப்பான் சமீபத்தில் சோதித்துப் பார்த்ததையும், பிலிப்பைன்ஸில் அமெரிக்கா தலைமையிலான கூட்டு ராணுவப் பயிற்சியில் பங்கேற்றதையும் கிம் யோ ஜாங் சுட்டிக்காட்டியுள்ளார். ஜப்பான் முன்கூட்டியே தாக்குதல் நடத்தும் (Preemptive Attack) திறனைப் பெற முயல்வது உலக அமைதிக்கும் பாதுகாப்புக்கும் பெரும் அச்சுறுத்தல் என அவர் சுட்டிக்காட்டியுள்ளார்.
இரண்டாம் உலகப்போருக்குப் பிறகு அமைதி வழியைப் பின்பற்றி வந்த ஜப்பான், சீனா, ரஷ்யா மற்றும் வடகொரியாவின் அச்சுறுத்தல்களை எதிர்கொள்ளும் வகையில் தற்காப்பு பட்ஜெட்டை கணிசமாக உயர்த்தியுள்ளது. வரும் 2027-க்குள் அமெரிக்காவிடமிருந்து 400 டொமாஹாக் ஏவுகணைகளைக் கொள்முதல் செய்ய திட்டமிட்டுள்ள ஜப்பான், தங்களின் இந்த ராணுவ நடவடிக்கைகள் போரைத் தொடங்குவதற்காக அல்ல, புதிய போர்களைத் தடுக்கும் தற்காப்பு நடவடிக்கை மட்டுமே என விளக்கம் அளித்துள்ளது.
அமெரிக்கா மற்றும் தென்கொரியாவுடன் இணைந்து ஜப்பான் மேற்கொண்டு வரும் பாதுகாப்பு ஒத்துழைப்பு ஆசிய-பசிபிக் பிராந்தியத்தில் புதிய பதற்றத்தை உருவாக்க வாய்ப்புள்ளதாகக் கருதப்படுகிறது. ஜப்பானின் இந்த ராணுவ நவீனமயமாக்கலை வடகொரியா வேடிக்கை பார்த்துக் கொண்டு சும்மா இருக்காது எனத் தெரிவித்துள்ளதால், கொரியத் தீபகற்ப பகுதியில் மீண்டும் போர்ப் மேகங்கள் சூழத் தொடங்கியுள்ளன.
