தவறான விளம்பரம் மற்றும் முன்னதாகவே டிப்ஸ் கேட்கும் நடைமுறையால் நுகர்வோரை ஏமாற்றிய ஓலா நிறுவனத்திற்கு ரூ.10 லட்சம் அபராதம் விதிக்கப்பட்டுள்ளது.
பிரபல ஆன்லைன் சவாரி சேவை நிறுவனமான ஓலா (Ola), தனது செயலியில் முன்பதிவு செய்யும் போது கூடுதல் கட்டணம் அல்லது டிப்ஸ் செலுத்தினால் விரைவாக வாகனம் கிடைக்கும் என்று தவறான வழிகாட்டுதலைப் பின்பற்றியதற்காகச் சிக்கியுள்ளது. மத்திய நுகர்வோர் பாதுகாப்பு ஆணையம் (CCPA) இந்த விவகாரத்தில் கடுமையான நடவடிக்கை எடுத்து, ஓலா நிறுவனத்திற்கு 10 லட்சம் ரூபாய் அபராதம் விதித்து உத்தரவிட்டுள்ளது. தலைமை ஆணையர் நிதி கரே மற்றும் ஆணையர் மிஸ்ரா தலைமையிலான அமர்வு இந்த உத்தரவைப் பிறப்பித்துள்ளது.
வாகனத்தை ஓட்டுநர் உறுதி செய்வதற்கு முன்பே கூடுதல் தொகை செலுத்தினால் சவாரி விரைவில் ஒதுக்கப்படும் என ஓலா செயலி நுகர்வோரைத் தூண்டியதாகப் புகார்கள் எழுந்தன. இந்த நடைமுறை நுகர்வோர் மத்தியில் தேவையற்ற அச்சத்தை ஏற்படுத்துவதாகவும், பயனர்களைக் கட்டாயப்படுத்தும் மறைமுக உத்தியாக (Dark Pattern) செயல்படுவதாகவும் ஆணையம் தனது விசாரணையில் கண்டறிந்துள்ளது. மேலும், கூடுதல் தொகை செலுத்தினாலும் விரைவான சேவை உறுதியளிக்கப்படவில்லை என்பதை நிறுவனத்தின் தரவுகளும் சுட்டிக்காட்டியுள்ளன.
வழக்கமாகப் பயணச் சேவை நிறைவடைந்த பிறகே நுகர்வோர் தங்களது விருப்பத்தின் பேரில் பாராட்டுத் தொகையாக டிப்ஸ் வழங்குவது வழக்கம். ஆனால், பயணம் உறுதியாகும் முன்பே பணம் செலுத்தும்படி நுகர்வோரை வற்புறுத்துவது நியாயமற்ற வர்த்தக முறை என்றும், இது நுகர்வோர் பாதுகாப்புச் சட்டத்திற்கு எதிரானது என்றும் ஆணையம் கடுமையாக விமர்சித்துள்ளது. குறிப்பாக, விமான நிலையங்கள், ரயில் நிலையங்கள் மற்றும் மருத்துவமனைகளுக்குச் செல்லும் முதியவர்கள் மற்றும் நோயாளிகள் போன்ற பாதிக்கப்படக்கூடிய தரப்பினர் இதனால் பெரிதும் சிரமப்பட்டதாகக் குறிப்பிடப்பட்டுள்ளது.
இந்த முறைகேடான நடைமுறையை உடனடியாகக் கைவிடுமாறும், செயலியில் அது தொடர்பான வடிவமைப்பு மாற்றங்களை உடனே நீக்குமாறும் ஓலா நிறுவனத்திற்கு உத்தரவிடப்பட்டுள்ளது. மேலும், பிற ஆன்லைன் சேவை வழங்கும் நிறுவனங்களும் இதுபோன்ற நுகர்வோர் உரிமைகளைப் பாதிக்கும் செயல்களில் ஈடுபடக்கூடாது என நுகர்வோர் பாதுகாப்பு அமைப்பு எச்சரித்துள்ளது. இந்த விவகாரம் தொடர்பாக நுகர்வோர் நலன் சார்ந்த விழிப்புணர்வைத் தொடர்ந்து கண்காணிக்கவும் அதிகாரிகள் முடிவு செய்துள்ளனர்.
