அமெரிக்கா – ஈரான் போர் நிறுத்தம்: அமைதி ஒப்பந்தத்துடன் ஈரான் விரைந்தார் பாகிஸ்தான் ராணுவ தளபதி ஆசிம் முனீர்!

மத்திய கிழக்கு பிராந்தியத்தில் கடந்த பிப்ரவரி மாதம் முதல் அமெரிக்கா, இஸ்ரேல் மற்றும் ஈரான் இடையே கடுமையான போர் நடந்து வருகிறது. இதனால் உலகப் பொருளாதாரமே ஆட்டம் கண்டுள்ள நிலையில், போரை முடிவுக்குக் கொண்டு வர பாகிஸ்தான் அரசு தீவிர சர்வதேச அமைதி தூதரக முயற்சிகளை மேற்கொண்டுள்ளது. இதன் முக்கியக் கட்டமாக, பாகிஸ்தான் ராணுவ தளபதி ஃபீல்டு மார்ஷல் ஆசிம் முனீர் (Field Marshal Asim Munir), அமெரிக்கா தயாரித்துள்ள புதிய அமைதி ஒப்பந்த வரைவு திட்டத்துடன் (Peace Framework) இன்று அவசரமாக ஈரான் தலைநகர் டெஹ்ரானுக்குப் புறப்பட்டுச் சென்றுள்ளார்.

அமெரிக்க வெளியுறவு அமைச்சர் மார்கோ ரூபியோ, ஈரான் உடனான பேச்சுவார்த்தையில் “சிறு முன்னேற்றம்” ஏற்பட்டுள்ளதாகத் தெரிவித்துள்ள நிலையில், பாகிஸ்தான் ராணுவ தளபதியின் இந்த திடீர் பயணம் உலக நாடுகளின் கவனத்தை ஈர்த்துள்ளது. ஏற்கனவே பாகிஸ்தான் உள்துறை அமைச்சர் மோசின் நக்வி இந்த வாரத்தில் இருமுறை ஈரான் சென்று அந்நாட்டு அதிபர் மசூத் பெசெஷ்கியான் மற்றும் மூத்த தலைவர்களைச் சந்தித்துப் பேசியுள்ளார். தற்போது ராணுவ தளபதியும் அவருடன் இணைந்து கொண்டுள்ளதால், ஈரான்-அமெரிக்கா இடையேயான அமைதி பேச்சுவார்த்தை இறுதி கட்டத்தை எட்டியுள்ளதாகக் கருதப்படுகிறது.

பாகிஸ்தான் மற்றும் சீனா இணைந்து உருவாக்கிய 5 அம்ச அமைதி திட்டம் மற்றும் அமெரிக்காவின் 15 அம்ச நிபந்தனைகளின் அடிப்படையில் இந்த புதிய போர் நிறுத்த ஒப்பந்த வரைவு தயாரிக்கப்பட்டுள்ளது. இதன் கீழ், இருதரப்பும் உடனடியாகப் போரை நிறுத்த வேண்டும் என்றும், உலகளாவிய கச்சா எண்ணெய் போக்குவரத்திற்கு முக்கிய ஆதாரமாக விளங்கும் ஹார்முஸ் ஜலசந்தியை (Strait of Hormuz) ஈரான் உடனடியாக நிபந்தனைகளின்றி திறந்து விட வேண்டும் என்றும் வலியுறுத்தப்பட்டுள்ளது. அதே நேரத்தில் ஈரானுக்கு எதிரான சில பொருளாதாரத் தடைகளைத் தளர்த்த அமெரிக்கா ஒப்புக்கொண்டுள்ளதாகத் தெரிகிறது.

பாகிஸ்தான் ராணுவ தலைமையுடன் இணைந்து கத்தார் நாட்டின் சிறப்பு தூதுக்குழுவும் தற்போது ஈரானில் முகாமிட்டுள்ளது. அமெரிக்க அதிபர் டொனால்ட் டிரம்ப் மற்றும் ஈரான் அரசு ஆகிய இருதரப்பையும் இணங்க வைக்க பாகிஸ்தான் கடந்த இரண்டு மாதங்களாகப் பல கட்ட பேச்சுவார்த்தைகளை நடத்தியுள்ளது. ஹார்முஸ் ஜலசந்தியில் கப்பல்களுக்கு ஈரான் கட்டணம் வசூலிக்கும் புதிய நடைமுறையைக் கொண்டு வர முயலும் சூழலில், இந்த வார இறுதிக்குள் நிரந்தர போர் நிறுத்த உடன்படிக்கை ஏற்படுமா என்பதைத் தீர்மானிக்கும் மிக முக்கிய நகர்வாக இந்த உயர்மட்டப் பயணம் பார்க்கப்படுகிறது.