யேமனின் ஹவுதி அமைப்பினரின் ஏவுகணை மற்றும் ட்ரோன் தாக்குதல்கள் அதிகரித்து வரும் நிலையில், நட்பு நாடான சவூதி அரேபியாவின் பாதுகாப்பை உறுதிப்படுத்த தூதரக ரீதியாகவும் ராணுவ ரீதியாகவும் எந்த எல்லைக்கும் செல்லத் தயார் என பாகிஸ்தான் ராணுவம் பகிரங்கமாக அறிவித்துள்ளது. சவூதி அரேபியா மீதான தாக்குதல்கள் தீவிரமடைந்துள்ள சூழலில், பாகிஸ்தானின் இந்த நிபந்தனையற்ற ஆதரவு மத்திய கிழக்கு பிராந்திய அரசியல் மற்றும் ராணுவ வட்டாரங்களில் பெரும் பரபரப்பை ஏற்படுத்தியுள்ளது.
பாகிஸ்தான் ராணுவத்தின் செய்தித் தொடர்பாளர் லெப்டினன்ட் ஜெனரல் அகமது ஷெரீப் சௌத்ரி ஊடகங்களுக்கு அளித்த பேட்டியில், சவூதி அரேபியாவின் பாதுகாப்பு மற்றும் புனித நகரங்களான மக்கா, மதினாவின் பாதுகாப்பில் பாகிஸ்தான் உறுதியாக உள்ளதாகத் தெரிவித்தார். “எங்கள் சவூதி சகோதரர்களின் பாதுகாப்பிற்காக எந்த எல்லைக்கும் செல்ல பாகிஸ்தான் தயாராக உள்ளது; இந்த அர்ப்பணிப்பு எந்த நிபந்தனைகளுக்கும் உட்பட்டது அல்ல” என்று அவர் திட்டவட்டமாகக் குறிப்பிட்டுள்ளார்.
கடந்த மாதம் பாகிஸ்தான், சவூதி அரேபியா மற்றும் துருக்கி ஆகிய மூன்று நாடுகளும் இணைந்தது கூட்டுப் பாதுகாப்பு ஒப்பந்தத்தில் (Makkah Joint Defence Agreement) கையெழுத்திட்டன. இந்த ஒப்பந்தத்தின்படி, மூன்று நாடுகளில் ஏதேனும் ஒரு நாட்டின் மீது தாக்குதல் நடத்தப்பட்டால், அது அனைத்து நாடுகளின் மீதான தாக்குதலாகக் கருதப்பட்டு கூட்டு நடவடிக்கை எடுக்கப்படும். தற்போது புனித மக்கா நகருக்கு அருகில் ஹவுதி அமைப்பினர் நடத்திய ட்ரோன் தாக்குதலைச் சவூதி அரேபிய பாதுகாப்புப் படைகள் முறியடித்ததைத் தொடர்ந்து, இந்த ஒப்பந்தத்தின் கீழ் ராணுவ உதவியை வழங்க பாகிஸ்தான் தயாராகி வருகிறது.
அதேவேளையில், பிராந்தியத்தில் போர் தீவிரமடைவதைத் தவிர்க்க பாகிஸ்தான் அரசு தூதரக முயற்சிகளையும் முன்னெடுத்து வருகிறது. பாகிஸ்தான் ராணுவத் தளபதி அசிம் முனீர் மற்றும் ஈரான் வெளியுறவுத்துறை அமைச்சர் இடையே தொலைபேசி பேச்சுவார்த்தை நடத்தப்பட்டுள்ள நிலையில், அமைதியான தீர்வைக் காண பிராந்திய நாடுகளுடன் தொடர்ந்து பேசி வருவதாக பாகிஸ்தான் தெரிவித்துள்ளது. இருப்பினும், சவூதியின் எல்லைப் பாதுகாப்பிற்கு ஏற்கனவே பாகிஸ்தான் படைகள் அங்கு நிறுத்தப்பட்டுள்ளதால், நிலைமை மேலும் தீவிரமடைந்தால் பாகிஸ்தான் நேரடியாகப் போரில் களம் இறங்கக்கூடும் என எதிர்பார்க்கப்படுகிறது.
