பாகிஸ்தான் பிரதமர் ஷேபாஸ் ஷெரீப், அமெரிக்கா மற்றும் ஈரான் இடையிலான போர் நிறுத்தம் குறித்து சமீபத்தில் தனது எக்ஸ் (X) தளத்தில் ஒரு பதிவை வெளியிட்டார். ஆனால், அந்தப் பதிவின் தொடக்கத்தில் “Draft – Pakistan’s PM Message on X” (வரைவு – பாகிஸ்தான் பிரதமரின் எக்ஸ் செய்தி) என்ற வாசகம் இடம் பெற்றிருந்தது. அதாவது, யாரோ ஒருவரால் எழுதப்பட்ட செய்தியை அப்படியே சரிபார்க்காமல் ‘காப்பி பேஸ்ட்’ செய்து அவர் பதிவிட்டுள்ளார். இந்தப் பதிவு வெளியான சில நிமிடங்களிலேயே சமூக வலைதளங்களில் வைரலாகி, பாகிஸ்தான் அரசு மற்ற நாடுகளின் ‘ஸ்கிரிப்ட்’ படி செயல்படுகிறதா என்ற விமர்சனங்களைக் கிளப்பியது.
இந்தச் சர்ச்சை குறித்துப் பேசிய பாகிஸ்தானின் மூத்த பத்திரிகையாளர் ஹமீத் மிர், பிரதமரின் சமூக வலைதளப் பக்கங்களை நிர்வகிக்கும் குழுவின் அலட்சியத்தையே இது காட்டுகிறது என்று கூறியுள்ளார். குறிப்பாக, இந்தத் தவறுக்குக் காரணமான ஒரு நபரை “கல்வியறிவு இல்லாத பஹல்வான்” (Not-so-educated Pehalwan) என்று அவர் வர்ணித்துள்ளார். அந்த நபருக்குக் குறைந்தபட்சப் புத்திசாலித்தனம் கூட இல்லாததால்தான், இவ்வளவு முக்கியமான ஒரு சர்வதேசச் செய்தியைத் திருத்தாமல் அப்படியே பதிவிட்டு நாட்டின் மானத்தை வாங்கியுள்ளார் என்று அவர் கடுமையாகத் தனது ஆதங்கத்தைப் பதிவு செய்துள்ளார்.
இந்தத் தவறுக்காக அந்த குறிப்பிட்ட உதவியாளரைப் பிரதமர் ஷேபாஸ் ஷெரீப் கடுமையாக எச்சரித்துள்ளதாகத் தகவல்கள் தெரிவிக்கின்றன. மேலும், அடுத்த சில நாட்களுக்குத் தனது கண்ணில் பட வேண்டாம் என்று அந்த நபருக்குப் பிரதமர் உத்தரவிட்டுள்ளதாகவும் கூறப்படுகிறது. “ஏதோ ஒரு வெளிநாட்டுத் தூதரகம் கொடுத்த செய்தியை அப்படியே போடச் சொன்னால், அதைக்கூடத் திருத்தத் தெரியாதவர்கள் பிரதமரின் அலுவலகத்தில் இருக்கிறார்கள்” என்று நெட்டிசன்கள் தற்போது ஷேபாஸ் ஷெரீப்பைத் வறுத்து எடுத்து வருகின்றனர்.
சர்வதேச அளவில் ஈரானுக்கும் அமெரிக்காவுக்கும் இடையே பாகிஸ்தான் ஒரு தூதுவராகச் செயல்படுவதாகக் கூறிக்கொள்ளும் வேளையில், இத்தகைய ஒரு ‘டிராஃப்ட்’ செய்தி கசிந்தது பெரும் பின்னடைவாகப் பார்க்கப்படுகிறது. பாகிஸ்தான் ஒரு “தனிப்பட்ட தரகர்” (Dalal) போலச் செயல்படுகிறதா என்று பலரும் கேள்வி எழுப்பத் தொடங்கியுள்ளனர். ஒரு சிறிய ‘காப்பி பேஸ்ட்’ பிழை, உலக அரங்கில் பாகிஸ்தானின் இராஜதந்திரத் திறனையே கேள்விக்குறியாக்கியுள்ளது.
