உக்ரைன் போரின் தீவிரத்திற்கு மத்தியில், பால்டிக் நாடுகள் மற்றும் ஐரோப்பிய நேட்டோ (NATO) உறுப்பு நாடுகளை நிலைைகுலைய வைக்கும் நோக்கில் ரஷ்ய அதிபர் விளாடிமிர் புடின் ‘ஹைப்ரிட்’ (Hybrid Attack) ரக நிழல் உலகத் தாக்குதல்களைத் தீவிரப்படுத்தத் திட்டமிட்டுள்ளதாக அமெரிக்க உளவுத்துறை மற்றும் ஐரோப்பியப் பாதுகாப்பு அமைப்புகள் எச்சரிக்கை விடுத்துள்ளன. குறிப்பாக, பால்டிக் நாடுகளின் முக்கிய விமான நிலையங்கள், வான்வெளி அமைப்புகள் மற்றும் ராணுவ விநியோக மையங்களைக் குறிவைத்து இந்த மறைமுகத் தாக்குதல்கள் நடத்தப்படலாம் என அஞ்சப்படுகிறது.
சமீபத்தில் லிதுவேனிய வான்வெளியில் ஊடுருவிய ஆளில்லா ட்ரோனை நேட்டோ போர் விமானங்கள் சுட்டு வீழ்த்தியது மற்றும் பால்டிக் கடலில் டென்மார்க் ராணுவ ஹெலிகாப்டர் மீது ரஷ்யப் போர்க்கப்பல் தீப்பந்தங்களை வீசியது போன்ற சம்பவங்கள் இந்த எச்சரிக்கையை உறுதிப்படுத்துவதாக வல்லுநர்கள் சுட்டிக்காட்டுகின்றனர். ஜிபிஎஸ் (GPS) சிக்னல்களை முடக்குவது, உள்கட்டமைப்புகளைச் சைபர் தாக்குதல்கள் மூலம் ஸ்தம்பிக்க வைப்பது, ட்ரோன் அச்சுறுத்தல்கள் மற்றும் போலி வான்வழி அபாயங்களை உருவாக்குவது ஆகிய உத்திகளைப் பயன்படுத்தி விமானப் போக்குவரத்தையும் நேட்டோவின் ராணுவ நகர்வுகளையும் ரஷ்யா முடக்கப் பார்ப்பதாக அமெரிக்க புலனாய்வுச் செய்திகள் தெரிவிக்கின்றன.
நேட்டோ கூட்டமைப்பின் 5-வது பிரிவின்படி (Article 5) ஒரு நாட்டின் மீது நேரடி ராணுவத் தாக்குதல் நடந்தால் மட்டுமே அனைத்து உறுப்பு நாடுகளும் இணைந்து பதிலடி கொடுக்க முடியும் என்ற சட்டப் பிரிவை ரஷ்யா தமக்குச் சாதகமாகப் பயன்படுத்திக் கொள்கிறது. நேரடியாக ராணுவத்தை அனுப்பாமல், இத்தகைய ‘சாம்பல் மண்டல’ (Grey Zone) ஹைப்ரிட் தாக்குதல்கள் மூலம் நேட்டோ எல்லைகளில் குழப்பத்தை உருவாக்கி, உறுப்பு நாடுகளிடையே ஒருமித்த கருத்தையும் பிளவையும் ஏற்படுத்த புடின் முயல்வதாகப் பாதுகாப்பு நிபுணர்கள் எச்சரிக்கின்றனர்.
இதையடுத்து, லிதுவேனியா, லாட்வியா, எஸ்டோனியா உள்ளிட்ட பால்டிக் நாடுகளின் வான்வெளிப் பாதுகாப்பை அதிகரிக்க நேட்டோ மற்றும் ஐரோப்பிய ஒன்றியம் அவசர பாதுகாப்பு நடவடிக்கைகளைத் தீவிரப்படுத்தியுள்ளன. விமான நிலையங்கள் மற்றும் முக்கியக் கடலோரப் பகுதிகளைப் பாதுகாக்க ‘கிழக்கு எல்லைக் கண்காணிப்பு’ (Eastern Flank Watch) அமைப்பை பலப்படுத்த ஐரோப்பிய நாடுகள் முடிவு செய்துள்ளதால், பால்டிக் பிராந்தியத்தில் ரஷ்யா – நேட்டோ இடையிலான பதற்றம் உச்சக்கட்டத்தை எட்டியுள்ளது.
