உக்ரைன் மீதான ரஷ்யாவின் போர் ஐந்தாவது ஆண்டை எட்டியுள்ள நிலையில், உலக நாடுகளை அச்சுறுத்தும் வகையில் அணு ஆயுதப் பயிற்சிகளையும், மிரட்டல்களையும் ரஷ்ய அதிபர் விளாடிமிர் புதின் தீவிரப்படுத்தியுள்ளார். இந்நிலையில், ஐரோப்பிய நாடுகள் மீது பழிசுமத்தி, ஒரு பிரம்மாண்ட மோதலைத் தொடங்குவதற்காக ரஷ்யா தனது சொந்த நாட்டின் மீதே ஒரு போலித் தாக்குதலை (False Flag Attack) நடத்தத் திட்டமிட்டு வருவதாகப் போலந்து நாடு பகிரங்கமாக எச்சரித்துள்ளது. இந்த விவகாரம் ஐரோப்பிய பிராந்தியத்தில் பெரும் பதற்றத்தை ஏற்படுத்தியதோடு, இது மூன்றாம் உலகப்போருக்கு (World War 3) வழிவகுத்துவிடுமோ என்ற அச்சத்தையும் உலக நாடுகள் மத்தியில் விதைத்துள்ளது.
சமீபத்தில் செய்தியாளர்களிடம் பேசிய ரஷ்ய அதிபர் விளாடிமிர் புதின், ஐரோப்பிய நாடுகளில் இருந்து ரஷ்ய எல்லைகளுக்குள் உக்ரைன் நடத்தும் ட்ரோன் தாக்குதல்களுக்குப் பின்னால் நேட்டோ (NATO) நாடுகள் இருப்பதாகக் குற்றம் சாட்டினார். மேலும், “ரஷ்யா மீது தாக்குதல் நடத்த ஐரோப்பிய நாடுகள் தங்களது தளங்களைப் பயன்படுத்த அனுமதித்தால், அதற்கான கடுமையான பதிலடியை அவர்கள் சந்திக்க நேரிடும்; இதை அனைவரும் புரிந்து கொள்ள வேண்டும்” என்று அணு ஆயுதப் பின்னணியுடன் எச்சரிக்கை விடுத்திருந்தார். புதினின் இந்தத் தொடர் அச்சுறுத்தல்களே இந்த ‘ஃபால்ஸ் ஃபிளாக்’ சந்தேகத்தை வலுப்படுத்தியுள்ளது.
புதினின் இந்த பேச்சுக்கு உடனடியாகப் பதிலடி கொடுத்துள்ள போலந்து வெளியுறவுத்துறை அமைச்சர் ரடோஸ்லாவ் சிகோர்ஸ்கி (Radoslaw Sikorski), “இது ரஷ்யா திட்டமிட்டு நடத்தவிருக்கும் ஒரு சதித் திட்டத்தின் அறிவிப்பு போலத் தெரிகிறது” என்று சமூக வலைத்தளமான எக்ஸ் (X) தளத்தில் பதிவிட்டுள்ளார். இரண்டாம் உலகப்போர் தொடங்குவதற்குக் காரணமாக அமைந்த வரலாற்றுச் சிறப்புமிக்க ‘கிளைவிட்ஸ்’ (Gleiwitz incident) சம்பவத்தை இதனுடன் ஒப்பிட்டுப் பேசிய அவர், நாஜி ஜெர்மனி எவ்வாறு போலந்து ராணுவம் போல வேடமணிந்து தன் சொந்த வானொலி நிலையத்தைத் தாக்கிப் போரைத் தொடங்கியதோ, அதேபோல புதினும் ரஷ்ய நிலப்பரப்பில் ஒரு போலித் தாக்குதலை அரங்கேற்றி விட்டு, அதன் பழியை ஐரோப்பா மீது போட்டுப் பெரிய போரைத் தொடங்க வாய்ப்புள்ளதாக எச்சரித்துள்ளார்.
சமீப வாரங்களாகவே ரஷ்யா தனது மூலோபாய அணுசக்திப் படைகளை உள்ளடக்கிய பிரம்மாண்ட ராணுவப் பயிற்சிகளை திடீரென அறிவித்து நடத்தி வருகிறது. கண்டம் விட்டு கண்டம் பாயும் ஏவுகணைகள் மற்றும் அணுசக்தி நீர்மூழ்கிக் கப்பல்களைக் களம் இறக்கி நடத்தப்படும் இந்தப் பயிற்சிகள், வெறும் எச்சரிக்கை மட்டுமல்லாமல் நேட்டோ நாடுகளை நேரடிப் போருக்கு இழுக்கும் உத்தி என்று சர்வதேச பாதுகாப்பு வல்லுநர்கள் கருதுகின்றனர். உக்ரைனின் அண்மைக்கால ட்ரோன் தாக்குதல்களால் ரஷ்யாவின் எண்ணெய் சுத்திகரிப்பு நிலையங்கள் கடுமையாகப் பாதிக்கப்பட்டுள்ள நிலையில், புதின் எடுக்கவிருக்கும் அடுத்தகட்ட அதிரடி நகர்வுகள் உலகை அணுசக்திப் போரின் விளிம்பிற்குத் தள்ளக்கூடும் என்று அஞ்சப்படுகிறது.
