சென்னையில் நடைபெற்ற நீட் (NEET) தேர்வுக்கு எதிரான மாணவர் போராட்ட மேடையில் கலந்துகொண்டு உரையாற்றிய பிரபல நடிகையும் பிக் பாஸ் பிரபலமுமான சனம் ஷெட்டி, தனது கருத்துகளைப் பதிவு செய்துகொண்டிருந்தபோது, அங்கிருந்த அமைப்பாளர்கள் சிலர் அவரது கையிலிருந்த மைக்கை திடீரெனப் பிடுங்கி மேடையை விட்டு வெளியேறச் சொன்ன சம்பவம் பெரும் பரபரப்பையும் அதிர்ச்சியையும் ஏற்படுத்தியுள்ளது.
நீட் தேர்வுக்கு எதிராக அமைதியான முறையில் குரல் எழுப்ப வந்த இடத்தில், சிலர் சொந்த அரசியலுக்காக மேடையைப் பயன்படுத்துவதாகச் சனம் ஷெட்டி விமர்சித்தார். மேலும் தான் நடிகர் விஜயின் தீவிர ரசிகை என்றும், சமீபத்தில் வெளியான ‘ஜனநாயகன்’ திரைப்படத்தைப் பார்த்துவிட்டு வந்ததாகக் குறிப்பிட்டபோது, மேடையில் இருந்தவர்கள் எதிர்ப்பு தெரிவித்து, படம் பார்த்தவர்களை “ஜோக்கர்” என விமர்சித்ததாகக் கூறப்படுகிறது. இதனால் ஆத்திரமடைந்த சனம் ஷெட்டிக்கும் அமைப்பாளர்களுக்கும் இடையே வாக்குவாதம் வெடித்தது.
மைக்கை பிடுங்கி வெளியேற்றப்பட்ட பிறகு செய்தியாளர்களிடம் ஆவேசமாகப் பேசிய சனம் ஷெட்டி, “மக்களை அழைத்து வைத்து ஒரு திரைப்படத்தைப் பார்த்ததற்காக என்னை எப்படி ஜோக்கர் என்று சொல்ல முடியும்? மேடையில் அமர்ந்திருக்கும் இயக்குனர் வெற்றிமாறன் எத்தனையோ படங்களை எடுத்துள்ளார், அவரையும் அப்படித்தான் சொல்வீர்களா?” என்று சரமாரியாகக் கேள்விகளை எழுப்பினார். மேலும், பேசிக் கொண்டிருக்கும் போதே மைக்கைப் பிடுங்குவதுதான் இவர்கள் பேசும் ஜனநாயகமா என்றும் அவர் மிகக் காரமாகச் சாடினார்.
போராட்டம் என்ற பெயரில் சிலர் தங்களது தனிப்பட்ட அரசியல் அஜெண்டாக்களை (Political Agenda) நிறைவேற்றவே இதுபோன்ற மேடைகளைப் பயன்படுத்தி வருவதாகவும், மக்கள் இந்த போலியான வலைக்குள் வீழ்ந்துவிடக் கூடாது என்றும் அவர் பகிரங்கமாகக் குற்றம் சாட்டினார். கருத்து சுதந்திரத்திற்கே மதிப்பளிக்காத இவர்கள் எப்படி நாட்டுக்காகவும் ஜனநாயகத்திற்காகவும் போராடுவார்கள் எனக் கேள்வி எழுப்பிய சனம் ஷெட்டியின் இந்தப் பேட்டி, தற்போது சமூக வலைத்தளங்களில் வைரலாகி விவாதப் பொருளாக மாறியுள்ளது.
