பிரிட்டனின் சவுதாம்ப்டன் பல்கலைக்கழகத்தில் கணக்கியல் மற்றும் நிதித்துறை படித்து வந்த 18 வயது மாணவன் ஹென்றி நோவக் (Henry Nowak). இவர் இரவு நேரத்தில் தனது நண்பர்களுடன் வெளியில் சென்றுவிட்டு வீடு திரும்பிக் கொண்டிருந்தபோது, பெல்மாண்ட் சாலையில் வைத்து விக்ரம் திக்வா (Vikrum Digwa) என்ற 23 வயது சீக்கிய வாலிபரால் கொடூரமாகக் கத்தியால் குத்தப்பட்டார். சீக்கியர்களின் மத வழிபாட்டு அடையாளமான 21 சென்டிமீட்டர் (8 இன்ச்) நீளமுள்ள ‘சாஸ்தர்’ (Shastar) எனப்படும் கிருபான் கத்தியால் ஹென்றியின் மார்பு மற்றும் கால்களில் விக்ரம் சரமாரியாகக் குத்தியுள்ளார். தாக்குதலுக்கு முன்னதாக விக்ரம் திக்வா, “நான் ஒரு கெட்டவன்” (I am a bad man) என்று ஹென்றியிடம் வம்புக்கு இழுத்த வீடியோ காட்சிகள் ஹென்றியின் மொபைல் போனில் பதிவாகியுள்ளது இந்த வழக்கின் முக்கிய ஆதாரமாக மாறியுள்ளது.
இந்தக் கொடூரத் தாக்குதலுக்குப் பிறகு, சம்பவ இடத்திற்குப் போலீசார் வந்தவுடன் கொலையாளி விக்ரம் திக்வா தனது சுயரூபத்தைக் மறைக்க ஒரு மாபெரும் ‘இனவெறி’ நாடகத்தை அரங்கேற்றினார். ரத்த வெள்ளத்தில் உயிருக்குப் போராடிக் கொண்டிருந்த மாணவன் ஹென்றி, தன்னை “இனவெறியோடு திட்டினார்” என்று விக்ரம் போலீசார் முன்னிலையில் அபாண்டமாகப் பழிசுமத்தினார். இதனை எவ்வித சுயபரிசோதனையும் இன்றி அப்படியே நம்பிய பிரிட்டன் போலீசார், உயிருக்கு ஆபத்தான நிலையில் துடிதுடித்துக் கொண்டிருந்த ஹென்றியின் கைகளில் விலங்குகளைப் பூட்டி (Handcuffed) அவரை அதிரடியாகக் கைது செய்தனர். “எனக்கு மூச்சு முட்டுகிறது” (I can’t breathe) என்று ஹென்றி கதறிய நிலையிலும், போலீசார் கொலையாளியின் புகாருக்கே முக்கியத்துவம் கொடுத்தனர். இறுதியில், முறையான முதலுதவி கிடைக்காததால் ஹென்றி தனது சொந்த ரத்தத்திலேயே மூழ்கி சம்பவ இடத்திலேயே பரிதாபமாக உயிரிழந்தார்.
இந்தக் கொடூரக் கொலை வழக்கில் விக்ரம் திக்வாவிற்கு ஆதரவாகச் செயல்பட்டு, கொலைக்குப் பயன்படுத்தப்பட்ட கத்தியை மறைத்து வைத்த அவரது தாய் கிரண் கவுர் (53) என்பவரும் குற்றவாளியாகச் சேர்க்கப்பட்டார். சவுதாம்ப்டன் கிரவுன் நீதிமன்றத்தில் (Southampton Crown Court) நடைபெற்ற இந்த வழக்கின் இறுதி விசாரணையில், நடுவர் மன்றம் (Jury) விக்ரம் திக்வாவை ‘கொலையாளி’ என்றும், அவரது தாயைக் குற்றவாளிக்குத் துணை நின்றவர் என்றும் ஒருமனதாகத் தீர்ப்பளித்துக் குற்றவாளிகளாக அறிவித்துள்ளது. தீர்ப்பைத் தொடர்ந்து, மரணத் தருவாயில் இருந்த ஒரு நிரபராதி மாணவனின் கைகளில் விலங்கு மாட்டியதற்காக ஹாம்ப்ஷயர் காவல்துறை (Hampshire Police) பகிரங்கமாக மன்னிப்புக் கேட்டுள்ளது.
இருப்பினும், பிரிட்டன் போலீசாரின் இந்த மெத்தனப் போக்கு அந்நாட்டு அரசியல் வட்டாரத்திலும் சமூக வலைத்தளங்களிலும் மிகப்பெரிய கொந்தளிப்பை ஏற்படுத்தியுள்ளது. “ஒருவேளை உயிரிழந்த மாணவன் சிறுபான்மை இனத்தைச் சேர்ந்தவராக இருந்திருந்தால், இந்நேரம் நாடு முழுவதும் மிகப்பெரிய கலவரமே வெடித்திருக்கும்” என்று எதிர்க்கட்சித் தலைவர்கள் குற்றம் சாட்டியுள்ளனர். மேலும், தொழில்நுட்பத் துறை ஜாம்பவான் எலான் மஸ்க், இந்த விவகாரத்தில் தவறிழைத்த போலீசாருக்கு எதிராகத் தனிப்பட்ட முறையில் வழக்குத் தொடர நிதியுதவி செய்ய முன்வந்துள்ளார். தற்போது, இறக்கும் தருவாயில் இருந்த மாணவனைத் தவறாகக் கைது செய்த போலீசாரின் நடவடிக்கை குறித்து தன்னாட்சி பெற்ற போலீஸ் நடத்தைக்கான சுயாதீன அலுவலகம் (IOPC) தீவிர விசாரணையைத் தொடங்கியுள்ளது.
