சென்னை: தமிழ்நாடு நகராட்சி நிர்வாகம் மற்றும் குடிநீர் வழங்கல் துறை (MAWS) மூலமாக மாநிலத்தின் 25 மாநகராட்சிகள் மற்றும் பல்வேறு நகராட்சிகளில் நடத்தப்பட்ட 1,000-க்கும் மேற்பட்ட உள்கட்டமைப்புத் திட்டங்களுக்கான டெண்டர்களில் நிலவி வந்த ‘சிண்டிகேட்’ முறை வெற்றிகரமாக முறியடிக்கப்பட்டுள்ளது. சாலை அமைத்தல், பாதாள சாக்கடை திட்டம் மற்றும் குடிநீர் விநியோகப் பணிகள் போன்ற ஒப்பந்தப் பணிகளில் திறந்தவெளிப் போட்டி ஏல முறை (Competitive Bidding) நடைமுறைப்படுத்தப்பட்டதன் மூலம், அரசுப் பொக்கிஷத்திற்கு சுமார் 30 சதவீத நிதி மிச்சமாகியுள்ளதாக அதிகாரப்பூர்வத் தகவல்கள் தெரிவிக்கின்றன.
கடந்த காலங்களில் வேலூர், சேலம், திருச்சி, கரூர், மதுரை, நாகப்பட்டினம் உள்ளிட்ட முக்கிய மாநகராட்சிகளில் உள்ளூர் அரசியல் ஆதரவுடன் குறிப்பிட்ட சில ஒப்பந்த நிறுவனங்கள் மட்டுமே சிண்டிகேட் அமைத்து டெண்டர்களைப் பெற்று வந்ததாகப் பரவலான புகார்கள் இருந்தன. இதனால் பிற நிறுவனங்கள் போட்டியில் பங்கேற்க முடியாத சூழல் நிலவியதுடன், பணிகளின் தரமும் கேள்விக்குறியாகியது. இந்நிலையில், தற்போது கொண்டுவரப்பட்டுள்ள புதிய சீர்திருத்தங்கள் மூலம் இந்த மறைமுகக் கூட்டமைப்பு முழுமையாக உடைக்கப்பட்டு, தகுதியுள்ள அனைத்து ஒப்பந்ததாரர்களும் நியாயமான முறையில் பங்கேற்கும் நிலை உருவாகியுள்ளது.
தற்போதைய புதிய அமைப்பின் கீழ் ஒவ்வொரு ஒப்பந்தப் பணிக்கும் சராசரியாக 8 முதல் 9 நிறுவனங்கள் வரை தீவிரப் போட்டியில் பங்கேற்கின்றன. இதனால் ₹100 கோடி வரையிலான பெருமதிப்பு கொண்ட உட்கட்டமைப்பு திட்டப்பணிகள் ஒரே தரப்பிடம் சென்று முடங்காமல், சிறப்பான அனுபவமும் நற்பெயரும் கொண்ட பல்வேறு ஒப்பந்த நிறுவனங்களுக்குப் பரவலாகப் பிரித்து வழங்கப்பட்டு வருகின்றன. குறைந்த ஏலத் தொகையைக் குறிப்பிடும் நிறுவனங்களுக்கு வெளிப்படைத்தன்மையுடன் பணிகள் ஒதுக்கப்படுவதால், ஒப்பந்ததாரர்கள் இடையே ஆரோக்கியமான வணிகப் போட்டி சூழல் நிலவுகிறது.
நகராட்சி நிர்வாகத் துறையின் இந்த அதிரடி மாற்றத்தால், டெண்டர் ஒதுக்கீட்டில் நிலவி வந்த முறைகேடுகள் தவிர்க்கப்பட்டு, அரசு நிதியில் சுமார் 30% வரை மிச்சப்படுத்தப்பட்டுள்ளதாக அதிகாரிகள் மகிழ்ச்சி தெரிவித்துள்ளனர். மேலும், இதன் மூலம் மக்களின் வரிப்பணம் வீணாவது தடுக்கப்பட்டு, மாநகராட்சி உள்கட்டமைப்புப் பணிகள் குறித்த காலத்தில் உயர் தரத்துடன் நிறைவேற்றப்படும் என எதிர்பார்க்கப்படுவதால் ஒப்பந்ததாரர்கள் மற்றும் பொதுமக்களிடையே பெரும் வரவேற்பு கிடைத்துள்ளது.
