தாய்லாந்தின் வடகிழக்கு பிராந்தியத்தில் அமைந்துள்ள முக்தாஹான் (Mukdahan) மாகாணத்தில் இன்று (ஜூலை 2) அரங்கேறியுள்ள ஒரு மிக கொடூரமான சாலை விபத்து ஒட்டுமொத்த உலகையும் உலுக்கியுள்ளது. வெறும் 11 வயதே ஆன ஒரு சிறுவன், தனது பெற்றோரின் அனுமதியின்றி அவர்களின் ‘பிக்கப்’ (Pickup Truck) ரக வாகனத்தை எடுத்துக்கொண்டு அதிவேகமாக ஓட்டிச் சென்று, சாலையில் வரிசையாக நடந்து சென்று கொண்டிருந்த பௌத்த துறவிகளின் (Buddhist Monks) கூட்டத்திற்குள் அசுர வேகத்தில் மோதியுள்ளான். இந்த கோர விபத்தில் சிக்கி இதுவரை 9 பௌத்த துறவிகள் பரிதாபமாக உயிரிழந்துள்ளனர் மற்றும் 10-க்கும் மேற்பட்டோர் படுகாயமடைந்துள்ளனர்.
முக்தாஹான் மாகாணத்திலிருந்து சுமார் 260 கிலோமீட்டர் தொலைவில் உள்ள உபோன் ராட்சதானி மாகாணத்தை நோக்கி மொத்தம் 35 பௌத்த துறவிகள் மற்றும் அவர்களின் சீடர்கள் ஐந்து பேர் அடங்கிய குழுவினர் இன்று காலை தங்களின் புனித தீர்த்த யாத்திரையை (Pilgrimage Walk) கால்நடையாகத் தொடங்கியுள்ளனர். அவர்கள் பயணத்தைத் தொடங்கி வெறும் 30 நிமிடங்களே ஆன நிலையில், சாலையோரமாக ஒற்றை வரிசையில் அமைதியாகத் தியான மந்திரங்களை ஓதியபடி நடந்து சென்று கொண்டிருந்தனர். அப்போது எதிர்பாராத விதமாக கட்டுப்பாட்டை இழந்த அந்த பிக்கப் வாகனம், சாலையில் தாறுமாறாக ஓடி வந்து பலத்த சத்தத்துடன் துறவிகளின் மீது நேரடியாக மோதியுள்ளது.
இந்த விபத்தின் பதைபதைக்க வைக்கும் சிசிடிவி (CCTV) காட்சிகள் தற்பொழுது சமூக வலைத்தளங்களில் வெளியாகி அதிர்ச்சியை ஏற்படுத்தியுள்ளது. விபத்தில் சிக்கிய துறவிகள் காற்றில் தூக்கி வீசப்பட்டதாக உயிர் தப்பிய துறவி பிரா சோம்பாங் கண்ணீருடன் விவரித்துள்ளார். விபத்து நடந்த இடத்திலேயே 5 துறவிகள் உடல் நசுங்கி பலியாகினர்; மேலும் 4 பேர் மருத்துவமனைக்குக் கொண்டு செல்லும் வழியிலும், தீவிர சிகிச்சைப் பிரிவிலும் உயிரிழந்ததை அடுத்துப் பலி எண்ணிக்கை 9 ஆக உயர்ந்துள்ளது. காயமடைந்த மற்ற துறவிகளுக்கு முக்தாஹான் அரசு மருத்துவமனையில் தீவிர சிகிச்சை அளிக்கப்பட்டு வருகிறது.
சம்பவ இடத்திற்கு விரைந்த தாய்லாந்து போலீசார், விபத்தை ஏற்படுத்திய 11 வயது சிறுவனைக் கைது செய்து தங்களின் கட்டுப்பாட்டுக்குள் கொண்டு வந்துள்ளனர். சிறுவர்களின் பாதுகாப்பு மற்றும் உரிமைப் பாதுகாப்பு அதிகாரிகள் முன்னிலையில் அவனிடம் விசாரணை நடத்தப்படவுள்ளதாகப் போலீசார் தெரிவித்துள்ளனர். தாய்லாந்து சட்டப்படி 12 வயதுக்கு உட்பட்ட சிறுவர்கள் மீது குற்றவியல் நடவடிக்கை (Criminal Liability) எடுக்க முடியாது என்பதால், சிறுவனின் பெற்றோரை காவல் நிலையத்திற்கு வரவழைத்து, உரியப் பாதுகாப்பு மேற்பார்வை குறைபாட்டிற்காக அவர்கள் மீது சட்ட நடவடிக்கை எடுக்கப் போலீசார் திட்டமிட்டுள்ளனர். பௌத்த துறவிகள் மிகுந்த மரியாதையுடன் போற்றப்படும் தாய்லாந்தில், பெற்றோரின் அலட்சியத்தால் 9 துறவிகள் பலியான சம்பவம் பெரும் சோக அலையை ஏற்படுத்தியுள்ளது.
