தமிழகத்தில் நடைபெறவுள்ள தாராபுரம் மற்றும் மதுராந்தகம் சட்டமன்றத் தொகுதி இடைத்தேர்தல்களில் கம்யூனிஸ்ட் கட்சிகள் தனித்துப் போட்டியிடுவது அவர்களின் ஜனநாயக உரிமையே தவிர, அது ஆளும்கட்சியான தவெக தலைமையிலான கூட்டணிக்குப் பின்னடைவு அல்ல என விடுதலைச் சிறுத்தைகள் கட்சியின் (விசிக) தலைவர் தொல். திருமாவளவன் தெரிவித்துள்ளார்.
தென் மாவட்ட நிகழ்வுகளில் பங்கேற்பதற்காகச் சிவகாசி வந்தடைந்த விசிக தலைவர் தொல். திருமாவளவன் செய்தியாளர்களைச் சந்தித்துப் பேசினார். அப்போது இடைத்தேர்தலில் இடதுசாரிகள் தனித்துக் களமிறங்குவது குறித்துக் கேட்கப்பட்ட கேள்விக்குப் பதிலளித்த அவர், “கம்யூனிஸ்ட் கட்சிகள் தொடக்கத்தில் இருந்தே அரசுக்கு வெளியிலிருந்து மட்டும்தான் ஆதரவு அளிப்போம் எனக் கூறி வருகின்றன. இடைத்தேர்தல் முடிவுகள் ஆட்சியைத் தீர்மானிக்கப் போவதில்லை என்பதால் அவர்கள் தனித்து போட்டியிடுகின்றனர். தேர்தலில் தனித்து நிற்பது அவர்களுக்கான உரிமை மற்றும் சுதந்திரம்” எனக் குறிப்பிட்டார்.
மேலும், கம்யூனிஸ்டுகளின் இந்தப் முடிவு தவெகவுக்கு எதிரான நிலைப்பாடோ அல்லது திமுகவுக்கு ஆதரவான முடிவோ கிடையாது என்றும், இதனால் மதச்சார்பற்ற சமூகநீதி வெற்றிக் கூட்டணிக்கு எந்தவிதமான பாதிப்பும் ஏற்படாது என்றும் அவர் தெளிவுபடுத்தினார். தொடர்ந்து தூத்துக்குடி முள்ளக்காடு பகுதி உப்பளத் தொழிலாளர்களின் போராட்டத்திற்குக் குரல் கொடுத்த அவர், மக்களின் இசைவு இல்லாமல் கப்பல் கட்டும் தளம் அமைக்கும் முயற்சியைத் தமிழ்நாடு அரசு கைவிட வேண்டும் என முதலமைச்சர் விஜய்யை நேரில் சந்தித்து வலியுறுத்தவுள்ளதாகத் தெரிவித்தார்.
கூட்டணிக்குள் சில அரசியல் வேறுபாடுகள் நிலவினாலும், தவெக அரசு தனது மக்கள் நலப் பணிகளிலும் கூட்டாட்சிக் கோட்பாடுகளிலும் உறுதியாக இருப்பதாகத் திருமாவளவன் எடுத்துரைத்தார். இடைத்தேர்தல் களம் சூடுபிடித்துள்ள வேளையில், கூட்டணியின் முக்கியத் தலைவரான திருமாவளவனின் இந்த அமைதியான அணுகுமுறை மற்றும் விளக்கம் தவெக தொண்டர்கள் மற்றும் கூட்டணிக் கட்சியினரிடையே நிலவிய குழப்பங்களுக்கு முற்றுப்புள்ளி வைத்துள்ளது.
