தமிழ்நாடு சட்டமன்றக் கூட்டத்தொடரில் அதிமுக சட்டப்பேரவை உறுப்பினர்கள் தமிழக வெற்றிக் கழகத்திற்கு (TVK) தாவியது மற்றும் இடைத்தேர்தல் விவகாரங்கள் தொடர்பாக ஆளுங்கட்சித் தரப்பிற்கும் எதிர்க்கட்சித் தலைவரான எடப்பாடி பழனிசாமிக்கும் இடையே கடும் விவாதம் வெடித்தது. முன்னாள் அதிமுக மூத்த தலைவரும் தற்போதைய அமைச்சருமான கே.ஏ. செங்கோட்டையன் மற்றும் எடப்பாடி பழனிசாமி (EPS) இடையே எழுந்த வார்த்தைப் போரால் அவையில் கடும் கூச்சலும் குழப்பமும் நிலவியது. எதிர்க்கட்சி உறுப்பினர்கள் அனைவரும் தங்களது இருக்கைகளை விட்டு எழுந்து நின்று குரலெழுப்பியதால் பேரவைக் கூச்சல் காடானது.
அவையின் கட்டுப்பாட்டை மீறி அதிமுக உறுப்பினர்கள் தொடர் அமளியில் ஈடுபட்டதால் கோபமடைந்த சபாநாயகர் ஜே.சி.டி. பிரபாகர், தமக்கே உரிய ஆவேசத்துடன் எழுந்து நின்று எடப்பாடி பழனிசாமியையும் எதிர்க்கட்சி உறுப்பினர்களையும் கடுமையாகக் கண்டித்தார். “இது என்ன பொதுக்கூட்டமா? எல்லாரும் எழுந்து நின்று பேசுறீங்க.. பேரவைக்கான மாண்பைக் காப்பாற்றுங்கள், இல்லை என்றால் நான் விதிகளைப் பின்பற்ற வேண்டியிருக்கும்” என எடப்பாடி பழனிசாமியை நோக்கிச் சபாநாயகர் ஆவேசமாக எச்சரிக்கை விடுத்த காட்சி அரசியல் வட்டாரத்தில் பெரும் வைரலாகியுள்ளது.
சட்டமன்ற விதிகளின்படி, சபாநாயகர் அவைக்குள் நுழையும் போதும் உரையாற்றும் போதும் அனைத்து உறுப்பினர்களும் அமைதி காத்துத் தங்களது இருக்கைகளில் அமர வேண்டும் என்பது கட்டாய விதியாகும். மேலும், அவையில் சபாநாயகரின் முன்அனுமதி பெறாமல் பேசுவதோ, மற்ற உறுப்பினர்களை இடையூறு செய்யும் வகையில் கூச்சலிடுவதோ அவை மரபுக்கு எதிரான நடவடிக்கையாகக் கருதப்படுகிறது. நீதிமன்ற விசாரணையில் உள்ள விவகாரங்களைப் பேரவையில் விவாதிக்கவோ, ஆதாரங்கள் இன்றித் தனிநபர் குற்றச்சாட்டுகளை முன்வைக்கவோ சட்டப்பேரவை விதிகள் அனுமதிப்பதில்லை.
ஒரு உறுப்பினர் அவதூறான அல்லது முறையற்ற வார்த்தைகளைப் பயன்படுத்தினால், அதைத் திரும்பப் பெறச் செய்யவோ அல்லது அவையின் ஒழுங்கைக் காக்க உறுப்பினரைப் பேரவையிலிருந்து வெளியேற்றவோ சபாநாயகருக்கு முழு அதிகாரம் வழங்கப்பட்டுள்ளது. பேரவை உறுப்பினர்கள் அனைவரும் ‘மாண்புமிகு’ என்றே அழைக்கப்பட வேண்டும் என்பது மரபாக உள்ள நிலையில், பேரவையின் மாண்பையும் ஜனநாயக நடைமுறைகளையும் நிலைநிறுத்த உறுப்பினர்கள் அவையின் விதிகளைக் கண்டிப்புடன் பின்பற்ற வேண்டும் என்ற விவாதம் தற்போது மீண்டும் தீவிரமடைந்துள்ளது.
