தமிழ்நாடு சட்டமன்றத்தில் நீட் நுழைவுத் தேர்வை முற்றிலுமாக ரத்து செய்ய வலியுறுத்தி அரசு சார்பில் கொண்டுவரப்பட்ட அரசினர் தனித் தீர்மானம், சட்டமன்ற உறுப்பினர்களின் காரசாரமான விவாதத்திற்குப் பிறகு பாஜக தவிர்த்து மற்ற அனைத்துக் கட்சிகளின் ஆதரவுடன் ஒருமனதாக நிறைவேற்றப்பட்டது. மக்கள் நல்வாழ்வுத்துறை அமைச்சர் டாக்டர் அருண்ராஜ் இந்தத் தனித் தீர்மானத்தை அவையில் முன்மொழிந்து பேசினார்.
தீர்மானத்தை முன்மொழிந்து பேசிய அமைச்சர், “12 ஆண்டு காலப் பள்ளிப் படிப்பை புறந்தள்ளிவிட்டு ஒரே ஒரு நாள் நடக்கும் நுழைவுத் தேர்வு மூலம் மாணவர்களின் திறமையை மதிப்பிடுவது மிகப்பெரிய தவறாகும். நீட் தேர்வு முறை சமூக நீதி மற்றும் சமத்துவத்திற்கு எதிரானது மட்டுமல்லாமல், தமிழ்வழியில் பயிலும் கிராமப்புற மற்றும் பொருளாதாரத்தில் பின்தங்கிய ஏழை மாணவர்களின் மருத்துவக் கனவைச் சிதைக்கிறது” என்று வலியுறுத்தினார். மேலும் வினாத்தாள் கசிவு மற்றும் முறைகேடுகளால் கல்வி மாஃபியாக்கள் மட்டுமே பயனடைவதாகவும் அவர் சுட்டிக்காட்டினார்.
இத்தீர்மானத்தின் மீதான விவாதத்தில் திமுக, அதிமுக, பாமக, கம்யூனிஸ்ட் கட்சிகள் மற்றும் தேமுதிக உள்ளிட்ட பல்வேறு பிரதான அரசியல் கட்சிகளின் உறுப்பினர்கள் பங்கேற்றுத் தங்களது ஆதரவைப் பதிவு செய்தனர். அதிமுக சார்பில் பேசிய ஓ.எஸ். மணியன், நீட் தேர்வை எதிர்ப்பதில் தங்கள் கட்சி தொடர்ந்து உறுதியுடன் இருப்பதாகத் தெரிவித்தார். அதேநேரம், விவாதத்தின் போது பாஜக எம்.எல்.ஏ போஜராஜன் இத்தீர்மானத்திற்குத் தனது எதிர்ப்பைப் பதிவு செய்துவிட்டு பேரவையிலிருந்து வெளிநடப்பு செய்தார்.
நீண்ட விவாதங்களுக்குப் பிறகு, பேரவைத் தலைவர் ஜே.சி.டி. பிரபாகரனால் வாக்கெடுப்பு நடத்தப்பட்டு நீட் தேர்வுக்கு எதிரான இத்தீர்மானம் ஒருமனதாக நிறைவேற்றப்பட்டதாக அதிகாரப்பூர்வமாக அறிவிக்கப்பட்டது. பிளஸ் 2 மதிப்பெண்கள் அடிப்படையிலேயே மருத்துவ மாணவர் சேர்க்கை நடத்தப்பட வேண்டும் என்றும், இதற்கேற்ப மத்திய அரசு உரிய சட்டத் திருத்தங்களை மேற்கொள்ள வேண்டும் என்றும் வலியுறுத்தும் இத்தீர்மானம், தமிழக மக்களின் ஒருமித்தக் குரலாகப் பார்க்கப்படுகிறது.
