தமிழகச் சட்டப்பேரவையில் நீட் (NEET) தேர்வு விலக்கு மற்றும் மத்திய அரசின் வெளிநாட்டு நிதிப் பங்களிப்புத் திருத்தச் சட்டத்திற்கு (FCRA) எதிராகத் தமிழக அரசு சார்பில் வரைவுத் தீர்மானம் கொண்டுவரப்பட உள்ளது. கல்வி உரிமை மற்றும் மாநில சுயாட்சியைப் பாதுகாக்கும் வகையில், முதல்வர் விஜய் தலைமையிலான அரசு கொண்டுவரும் இத்தீர்மானங்கள் தமிழக அரசியலில் முக்கிய நகர்வாகப் பார்க்கப்படுகின்றன.
கிராமப்புற மற்றும் ஏழை எளிய மாணவர்களின் மருத்துவக் கனவை முடக்கும் நீட் தேர்வுக்கு விலக்கு பெற வேண்டும் என்பது தமிழக அரசின் நீண்டகால கோரிக்கையாகும். இந்தச் சூழலில், நீட் தேர்வை ரத்து செய்து பிளஸ் 2 மதிப்பெண்கள் அடிப்படையில் மருத்துவச் சேர்க்கை நடத்தப்பட வேண்டும் என்பதை வலியுறுத்தி மீண்டும் ஒருமுறை அரசு சார்பில் குரல் கொடுக்க சட்டப்பேரவையில் தீர்மானம் நிறைவேற்றத் திட்டமிடப்பட்டுள்ளது.
அதேபோல், அரசு சாரா தொண்டு நிறுவனங்கள் மற்றும் கல்விச் சேவை அமைப்புகளின் செயல்பாடுகளை முடக்கும் வகையில் கொண்டுவரப்பட்டுள்ள வெளிநாட்டு நிதிப் பங்களிப்புத் திருத்தச் சட்டத்தை (FCRA) திரும்பப் பெற மத்திய அரசை வலியுறுத்தித் தனித் தீர்மானம் கொண்டு வரப்பட உள்ளது. மத்திய அரசின் இத்தகைய நகர்வுகள் மாநிலங்களின் அதிகார வரம்பிலும், ஜனநாயக அமைப்புகளின் தன்னாட்சியிலும் தலையிடுவதாகத் தவெக தரப்பில் குற்றம் சாட்டப்படுகிறது.
சட்டப்பேரவையில் நிறைவேற்றப்படும் இந்தத் தீர்மானங்கள் ஆளுநரின் ஒப்புதலுக்கும், மத்திய அரசின் பரிசீலனைக்கும் அனுப்பி வைக்கப்பட உள்ளன. கல்வி மற்றும் நிதி தொடர்பான மாநிலங்களின் உரிமைகளை நிலைநிறுத்த முதல்வர் விஜய் எடுக்கும் இந்த அதிரடி நடவடிக்கைக்கு எதிர்க்கட்சிகள் உட்பட பல்வேறு சமூக அமைப்புகளும் ஆதரவு தெரிவித்து வருகின்றன.
