மத்திய கிழக்கில் போர் மேகங்கள் சூழ்ந்து, இன்னும் சில மணிநேரங்களில் ஈரான் மீது குண்டுமழை பொழியும் என எதிர்பார்க்கப்பட்ட நிலையில், உலகத்தையே அதிரவைக்கும் ஒரு அறிவிப்பை அமெரிக்க அதிபர் டொனால்ட் ட்ரம்ப் வெளியிட்டுள்ளார். பாகிஸ்தான் தூதுவர்களின் அவசரக் கோரிக்கையை ஏற்று, ஈரானுடனான தற்காலிக போர்நிறுத்தத்தை அவர் நீட்டித்துள்ளார். இருப்பினும், பாரசீக வளைகுடாவில் அமெரிக்கா விதித்துள்ள கடல்வழி முற்றுகை (Blockade) தொடர்ந்து நீடிக்கும் என்றும், ஈரான் அரசு ஒரு தெளிவான முடிவுக்கு வரும் வரை இந்த போர்நிறுத்தம் அமுலில் இருக்கும் என்றும் ட்ரம்ப் தனது ‘ட்ரூத் சோஷியல்’ பக்கத்தில் அதிரடியாகத் தெரிவித்துள்ளார்.
ஈரான் அரசு தற்போது பெரும் உள்நாட்டு குழப்பத்தில் இருப்பதாகவும், அந்நாட்டுத் தலைவர்கள் ஒருமித்த கருத்துக்கு வரக் கால அவகாசம் கேட்டுள்ளதாகவும் ட்ரம்ப் குறிப்பிட்டுள்ளார். “ஈரான் அரசு பிளவுபட்டுள்ள நிலையில், அவர்களது தரப்பிலிருந்து ஒரு முறையான முன்மொழிவு வரும் வரை எங்களது ராணுவம் தாக்குதலுக்குத் தயாராக இருக்கும்” என அவர் எச்சரித்துள்ளார். மார்ச் 23 முதல் இதுவரை நான்கு முறை போர்நிறுத்தம் நீட்டிக்கப்பட்டுள்ளது. ஆனால், இம்முறை எந்த ஒரு குறிப்பிட்ட காலக்கெடுவையும் ட்ரம்ப் விதிக்கவில்லை என்பது குறிப்பிடத்தக்கது.
இதற்கிடையில், அமைதிப் பேச்சுவார்த்தைக்காக பாகிஸ்தான் தலைநகர் இஸ்லாமாபாத்திற்குச் செல்லவிருந்த அமெரிக்கத் துணை அதிபர் ஜே.டி. வான்ஸின் பயணம் கடைசி நிமிடத்தில் ரத்து செய்யப்பட்டது. ஈரானியத் தரப்பிலிருந்து அமெரிக்காவின் நிபந்தனைகளுக்குப் பதில் வராததால், ஜாரெட் குஷ்னர் மற்றும் ஸ்டீவ் விட்கோஃப் உள்ளிட்ட குழுவினரை ஏற்றிச் செல்லவிருந்த அமெரிக்க அரசு விமானம் பாதியிலேயே திருப்பி விடப்பட்டது. ஈரானின் மௌனம் மற்றும் பேச்சுவார்த்தைக்கு வராத போக்கு காரணமாகவே வான்ஸின் பயணம் ரத்து செய்யப்பட்டதாக வெள்ளை மாளிகை வட்டாரங்கள் தெரிவிக்கின்றன.
வியாழக்கிழமை அதிகாலை 1 மணிக்குள் பேச்சுவார்த்தையில் முன்னேற்றம் இல்லையென்றால் “குண்டு வீசத் தயார்” என ஏற்கனவே ட்ரம்ப் மிரட்டல் விடுத்திருந்தார். ஆனால், பாகிஸ்தானின் தலையீடு தற்போது அந்த அபாயத்தைத் தற்காலிகமாகத் தடுத்து நிறுத்தியுள்ளது. ஈரானின் பதில் என்னவாக இருக்கும் என்பதில் இன்னும் மர்மம் நீடிக்கும் நிலையில், இஸ்லாமாபாத்தில் பேச்சுவார்த்தைகளைத் தொடங்க அதிகாரிகள் தீவிர முயற்சி எடுத்து வருகின்றனர். அடுத்த சில நாட்கள் உலக வரலாற்றில் ஒரு முக்கிய மாற்றத்தை ஏற்படுத்துமா அல்லது போர் வெடிக்குமா என்பது ஈரானின் கைகளிலேயே உள்ளது.
