மத்திய கிழக்கு பிராந்தியத்தில் ஈரான் மற்றும் அமெரிக்கா-இஸ்ரேல் இடையேயான மோதலால் கடந்த பிப்ரவரி முதல் ஹார்முஸ் ஜலசந்தி முடக்கப்பட்டுள்ளது. உலகின் மிக முக்கியமான இந்த எரிசக்தி வணிகப் பாதையில் சுமார் 850-க்கும் மேற்பட்ட வணிகக் கப்பல்கள் மற்றும் 20,000 மாலுமிகள் கடந்த இரண்டு மாதங்களாகத் தவித்து வருகின்றனர். அவர்களைப் பாதுகாப்பாக மீட்க, அதிபர் டிரம்ப் ‘புராஜெக்ட் ஃப்ரீடம்’ என்ற திட்டத்தை அறிவித்துள்ளார். இந்த நடவடிக்கையை ஒரு ‘மனிதநேயக் கடமை’ என்று அவர் குறிப்பிட்டாலும், அமெரிக்காவின் இந்த அதிரடி நகர்வு பிராந்தியத்தில் நிலவும் தற்காலிகப் போர் நிறுத்தத்தை (Ceasefire) உடைக்கும் அபாயத்தை ஏற்படுத்தியுள்ளது.
இந்தத் திட்டத்திற்காக அமெரிக்காவின் மத்திய கட்டளை (CENTCOM) சுமார் 15,000 போர் வீரர்கள், 100-க்கும் மேற்பட்ட அதிநவீன போர் விமானங்கள் மற்றும் ஏவுகணைகளைத் தாங்கிச் செல்லும் போர்க்கப்பல்களை ஜலசந்திக்கு அனுப்பியுள்ளது. இந்த வீரர்கள் நேரடியாகக் கப்பல்களுக்குப் பாதுகாப்பு வழங்க மாட்டார்கள் என்றும், வணிகக் கப்பல்கள் பாதுகாப்பாக வெளியேறத் தேவையான வழிகாட்டுதல்களை (Guiding) மட்டுமே மேற்கொள்வார்கள் என்றும் வெள்ளை மாளிகை தரப்பில் கூறப்படுகிறது. இருப்பினும், அமெரிக்காவின் இந்த இராணுவ நடவடிக்கை ஈரானிய கடற்படையின் கட்டுப்பாட்டில் உள்ள பகுதிக்குள் நுழைந்தால், அது மிகப்பெரிய மோதலுக்கு வழிவகுக்கும் என்று அஞ்சப்படுகிறது.
டிரம்பின் இந்த அறிவிப்புக்கு ஈரான் தரப்பில் இருந்து மிகக் கடுமையான எதிர்வினை வந்துள்ளது. ஹார்முஸ் ஜலசந்தியில் அமெரிக்க கடற்படையின் எந்தவொரு குறுக்கீடும் தற்போது நடைமுறையில் உள்ள போர் நிறுத்த ஒப்பந்தத்தை மீறும் செயலாகவே கருதப்படும் என்று ஈரானிய நாடாளுமன்றத்தின் தேசிய பாதுகாப்பு குழுத் தலைவர் இப்ராகிம் அஜிசி எச்சரித்துள்ளார். “ஹார்முஸ் ஜலசந்தியின் பாதுகாப்பு எங்கள் கைகளில் உள்ளது. முறையான ஒருங்கிணைப்பு இன்றி உள்ளே நுழையும் எந்தவொரு வெளிநாட்டு இராணுவமும், குறிப்பாக அமெரிக்கப் படைகள், உடனடியாகத் தாக்கப்படும்” என்று ஈரானிய இராணுவத் தளபதி மேஜர் ஜெனரல் அலி அப்துல்லாஹி பகிரங்கமாக எச்சரித்துள்ளார்.
சர்வதேச அளவில் கச்சா எண்ணெய் மற்றும் உரங்கள் கொண்டு செல்லும் பாதையில் ஏற்பட்டுள்ள இந்த இழுபறியால் உலகப் பொருளாதாரம் பெரும் பாதிப்பைச் சந்தித்துள்ளது. ஈரான் ஏற்கனவே போர் நிறுத்தத்தை உறுதி செய்ய 14 அம்ச அமைதித் திட்டத்தை முன்வைத்துள்ள நிலையில், அமெரிக்கா அதனை நிராகரித்துவிட்டு இத்தகைய இராணுவ நடவடிக்கையில் இறங்கியுள்ளது. இன்று காலை முதலே ஜலசந்தி பகுதியில் அமெரிக்கக் கப்பல்கள் தென்படத் தொடங்கியுள்ளதாகத் தகவல்கள் தெரிவிக்கின்றன. ஈரானின் எச்சரிக்கையை மீறி அமெரிக்கப் படைகள் முன்னேறினால், மத்திய கிழக்கில் மீண்டும் ஒரு நேரடிப் போர் மூளும் அபாயம் உள்ளதால் உலக நாடுகள் கவலையில் உள்ளன.
