கடந்த 2024-ஆம் ஆண்டு பென்சில்வேனியாவில் நடைபெற்ற தேர்தல் பிரச்சாரக் கூட்டத்தில் அமெரிக்க அதிபர் டொனால்ட் டிரம்ப் மீதான துப்பாக்கிச் சூடு தாக்குதலின் போது படுகாயமடைந்த ஜிம் கோபன்ஹேவர் (Jim Copenhaver – 76) சிகிச்சை பலனின்றி காலமானார். அவரது மறைவிற்கு இரங்கல் தெரிவித்துள்ள டிரம்ப், அவரை “உண்மையான அமெரிக்க தேசபக்தர்” எனப் புகழ்ந்துள்ளார்.
ஜூலை 13, 2024 அன்று பென்சில்வேனியாவின் பட்லர் நகரில் நடைபெற்ற பிரச்சாரக் கூட்டத்தின் போது, 20 வயதான தாமஸ் மேத்யூ குரூக்ஸ் என்ற நபர் அருகிலிருந்த கட்டிடத்தின் கூரையிலிருந்து நடத்திய துப்பாக்கிச் சூட்டில் டிரம்பின் காது பகுதியில் காயம் ஏற்பட்டது. அதே நிகழ்வில் பார்வையாளர்கள் பகுதியில் அமர்ந்திருந்த மூத்த ராணுவ வீரரான ஜிம் கோபன்ஹேவர் மீது இரண்டு தோட்டாக்கள் பாய்ந்து, அவரது வயிறு மற்றும் கைகளில் பலத்த காயங்களை ஏற்படுத்தின.
இத்தாக்குதலில் தீவிர சிகிச்சைக்குப் பின் உயிர் தப்பிய போதிலும், ஜிம் கோபன்ஹேவர் கடந்த இரண்டு ஆண்டுகளாக நரம்புப் பாதிப்பு மற்றும் பல கட்ட அறுவை சிகிச்சைகளால் தொடர்ந்து கடும் உடல்நலக் குறைவால் அவதியுற்று வந்தார். இந்நிலையில், பிட்ஸ்பர்க் மருத்துவமனையில் அனுமதிக்கப்பட்டிருந்த அவர், காயங்களின் பக்க விளைவுகள் மற்றும் உடல்நலக் குறைவு காரணமாகத் தனது 76-வது வயதில் காலமானார்.
ஜிம் கோபன்ஹேவரின் மறைவு குறித்துத் தனது ‘ட்ரூத் சோஷியல்’ தளத்தில் இரங்கல் தெரிவித்துள்ள டிரம்ப், “அமெரிக்காவின் உண்மையான தேசபக்தரான ஜிம் கோபன்ஹேவர், சொல்லொணாத் துயரங்களையும் உடல்நலப் பாதிப்புகளையும் மன உறுதியோடும் தைரியத்தோடும் எதிர்கொண்டவர். அவரது ஆன்மா சாந்தியடைய இறைவனைப் பிரார்த்திக்கிறேன்” என்று பதிவிட்டுள்ளார். அமெரிக்க மக்கள் பிரதிநிதிகள் சபையும் அவரது குடும்பத்தினருக்குத் ஆழ்ந்த இரங்கலைத் தெரிவிப்பதாக அறிவித்துள்ளது.
