அமெரிக்க அதிபர் டொனால்ட் ட்ரம்ப், ஈரானுக்கு எதிரான ராணுவ நடவடிக்கைகளை முடிவுக்குக் கொண்டு வரத் தயாராக இருப்பதாகத் தனது அதிகாரிகளிடம் தெரிவித்துள்ளார். உலக நாடுகளுக்கு 20 சதவீத கச்சா எண்ணெய்யை விநியோகிக்கும் முக்கிய வழித்தடமான ‘ஹார்முஸ் ஜலசந்தி’ (Strait of Hormuz) ஈரானால் மூடப்பட்டிருக்கும் நிலையிலேயே, போரை நிறுத்த அவர் முன்வந்துள்ளதாக ‘வால் ஸ்ட்ரீட் ஜர்னல்’ (WSJ) செய்தி வெளியிட்டுள்ளது.
ஈரானின் கடற்படை மற்றும் ஏவுகணைத் தளங்களைச் சிதைப்பதே இந்தத் தாக்குதலின் முக்கிய நோக்கம் என்று ட்ரம்ப் கருதுகிறார். அந்த இலக்குகள் ஓரளவிற்கு எட்டப்பட்ட நிலையில், மேற்கொண்டு போரை நீட்டிப்பது அமெரிக்கப் பொருளாதாரத்தைப் பாதிக்கும் என அவர் அஞ்சுகிறார். எனவே, ராணுவ ரீதியாகப் போரை நிறுத்திவிட்டு, ஹார்முஸ் ஜலசந்தியைத் திறக்க ஈரானுக்கு இராஜதந்திர ரீதியாக அழுத்தம் கொடுக்க அவர் திட்டமிட்டுள்ளார். ஒருவேளை ஈரான் அதற்குச் சம்மதிக்கவில்லை என்றால், வளைகுடா நாடுகள் மற்றும் ஐரோப்பியக் கூட்டணிகள் அந்தப் பொறுப்பை ஏற்க வேண்டும் என ட்ரம்ப் வலியுறுத்துவார் என எதிர்பார்க்கப்படுகிறது.
இந்த அதிரடி அறிவிப்பு சர்வதேசச் சந்தையில் பெரும் அதிர்ச்சியை ஏற்படுத்தியுள்ளது. ஹார்முஸ் ஜலசந்தி மூடிக்கிடப்பதால் உலகளவில் கச்சா எண்ணெய் விலை உயர்ந்து வரும் நிலையில், ட்ரம்பின் இந்த முடிவு ஒருபுறம் போரை நிறுத்தினாலும், மறுபுறம் எரிசக்தி தட்டுப்பாட்டை நீட்டிக்கும் என அஞ்சப்படுகிறது. இதற்கிடையில், சவுதி அரேபியா மற்றும் ஐக்கிய அரபு அமீரகம் போன்ற நாடுகள், ஈரான் முழுமையாக வீழ்த்தப்படும் வரை போரைத் தொடர வேண்டும் என்று ட்ரம்ப்பிற்கு ரகசியமாக அழுத்தம் கொடுத்து வருவதாகவும் செய்திகள் தெரிவிக்கின்றன.
மார்ச் 31-ஆம் தேதியான இன்று, வளைகுடா நாடுகளில் போர் மேகங்கள் இன்னும் அகலாத நிலையில், ட்ரம்பின் இந்த ‘எக்ஸிட் பிளான்’ (Exit Plan) ஒரு தந்திரமான இராஜதந்திர நகர்வாகப் பார்க்கப்படுகிறது. ஏப்ரல் 6-ஆம் தேதிக்குள் ஈரான் ஒரு முடிவை எடுக்க வேண்டும் என ட்ரம்ப் ஏற்கனவே கெடு விதித்திருந்தார்.
