சீனாவின் ஷென்சென் நகரில் அடுத்த வாரம் நடைபெற உள்ள ஆசிய-பசிபிக் பொருளாதார ஒத்துழைப்பு (APEC) உச்சி மாநாட்டின் இடையே, அமெரிக்க அதிபர் டொனால்ட் டிரம்ப், சீன அதிபர் ஜி ஜின்பிங் மற்றும் ரஷ்ய அதிபர் விளாடிமிர் புதின் ஆகியோர் முதல்முறையாக முத்தரப்பு சந்திப்பை நடத்த உள்ளனர். வெள்ளை மாளிகையின் உதவிப் பத்திரிகைச் செயலாளர் வெளியிட்டுள்ள அதிகாரப்பூர்வ அறிவிப்பில், இந்தச் சந்திப்பின்போது ஈரான் போர் மற்றும் அணு ஆயுதக் கட்டுப்பாடு குறித்துப் பேச டிரம்ப் திட்டமிட்டுள்ளதாகத் தெரிவிக்கப்பட்டுள்ளது.
அமெரிக்கா மற்றும் ரஷ்யா இடையேயான கடைசி அணு ஆயுதக் கட்டுப்பாட்டு ஒப்பந்தம் காலாவதியாகி ஒன்பது மாதங்கள் நிறைவடைந்துள்ள நிலையில், 50 ஆண்டுகளில் முதல்முறையாக எவ்வித வரம்பும் இன்றி இருக்கும் சூழலில் இந்தப் பேச்சுவார்த்தை முக்கியத்துவம் பெறுகிறது. இருப்பினும், உக்ரைன் போர் விவகாரம் குறித்துப் பேசுவதற்கு ரஷ்யா மற்றும் உக்ரைனுடன் அமெரிக்கா தனிப்பட்ட முறையில் பேச்சுவார்த்தை நடத்தி வருவதால், இந்த முத்தரப்புச் சந்திப்பில் உக்ரைன் விவகாரம் விவாதிக்கப்படாது என வெள்ளை மாளிகை அதிகாரி தெளிவுபடுத்தியுள்ளார்.
இந்தப் பேச்சுவார்த்தைகள் குறித்துப் பேசிய அமெரிக்க வெளியுறவுத்துறை செயலாளர் மார்கோ ரூபியோ, “21-ஆம் நூற்றாண்டில் உண்மையான அணு ஆயுதக் கட்டுப்பாட்டைக் கொண்டு வர வேண்டுமானால், வேகமாக வளர்ந்து வரும் அணு ஆயுதக் கையிருப்பைக் கொண்ட சீனாவைத் தவிர்த்துவிட்டு அதைச் செய்ய முடியாது என்பதில் அதிபர் தெளிவாக உள்ளார்” என்று குறிப்பிட்டுள்ளார். இதனிடையே, மூன்று வல்லரசு தலைவர்களின் இந்தச் சந்திப்பு உலக அரசியலில் பெரிய தாக்கத்தை ஏற்படுத்தும் என சர்வதேச பார்வையாளர்கள் கருதுகின்றனர்.
இந்தப் பயணத்திற்காகத் திங்கட்கிழமை வாஷிங்டனில் இருந்து புறப்படும் அதிபர் டிரம்ப், முதலில் பிலிப்பைன்ஸில் நடைபெறும் ஆசியான் (ASEAN) மாநாட்டில் பங்கேற்றுவிட்டுப் பின்னர் சீனாவின் ஷென்சென் நகருக்குச் செல்ல உள்ளார். சீனப் பயணத்தின்போது அதிபர் ஜின்பிங்குடன் இருதரப்புப் பேச்சுவார்த்தை நடத்தும் டிரம்ப், ரஷ்ய அதிபர் புதினுடன் தனியாக இருதரப்புச் சந்திப்பு எதையும் நடத்தத் திட்டமிடவில்லை என வெள்ளை மாளிகை வட்டாரங்கள் தெரிவித்துள்ளன.
