தமிழகத்தில் புதிதாகப் பொறுப்பேற்றுள்ள முதலமைச்சர் சி. ஜோசப் விஜய் தலைமையிலான தவெக (தமிழக வெற்றிக் கழகம்) அரசு, பொறுப்பேற்று 30 நாட்களே ஆகியுள்ள நிலையில், மின்துறை (EB Department) செயல்பாடுகள் குறித்து விமர்சனம் செய்த எதிர்க்கட்சியான திமுகவிற்கு தவெகவின் முக்கிய அமைச்சரான ஆதவ் அர்ஜுனா ஊடகங்கள் வாயிலாகக் கடுமையான பதிலடி கொடுத்துள்ளார். “30 நாட்களே ஆன எங்கள் முதலமைச்சரையும், அமைச்சரவையும் பார்த்து மின்சாரத் துறை சரியில்லை எனக் கேள்வி எழுப்பும் திமுக தலைவர் மு.க.ஸ்டாலினை நோக்கி மக்கள் மன்றத்தில் நாங்கள் சில முக்கியக் கேள்விகளை முன்வைக்கிறோம்” என்று கூறி திமுகவின் கடந்தகால ஊழல்களைப் பட்டியலிட்டுப் பிரஸ் மீட்டில் கிழித்துத் தொங்கவிட்டுள்ளார்.
அமைச்சர் ஆதவ் அர்ஜுனா பேசுகையில், “கடந்த 2021-ல் திமுக 10 ஆண்டுகள் கழித்து ஆட்சிக்கு வந்தபோது, மக்கள் ஒரு நல்ல நிர்வாகிக்காகவே மு.க.ஸ்டாலினைத் தேர்ந்தெடுத்தனர். அவர் ஒன்றும் எம்.ஜி.ஆர், கலைஞர், ஜெயலலிதா போன்ற மக்கள் தலைவர் கிடையாது; வெறும் நிர்வாகிதான். ஆனால், அந்த நிர்வாகி பொறுப்பேற்றதும் என்ன செய்தார்? பல தசாப்தங்களாக திமுகவிற்காக உழைத்துச் சொத்துக்களை இழந்த உண்மையான உடன்பிறப்புகளையோ அல்லது ஐ. பெரியசாமி போன்ற மூத்த தலைவர்களையோ மதிக்காமல், ஊழலில் ஊறிப்போன செந்தில் பாலாஜிக்கு மின்சாரத் துறை மற்றும் மதுவிலக்கு ஆயத்தீர்வைத் துறை ஆகிய இரு பெரும் முக்கியத் துறைகளைத் தூக்கிக் கொடுத்தார். இது கொள்கை கொண்ட குடும்ப ஆட்சியா?” என்று ஆவேசமாக வினவினார்.
தொடர்ந்து திமுகவின் ஊழல் முறைகேடுகளைச் சாடிய அவர், “டாஸ்மாக் மதுபான பாட்டிலுக்கு 10 ரூபாய் வீதம் சட்டவிரோதமாகப் பெற்று மாதம் 1,500 கோடி ரூபாய் வரை வசூல் வேட்டை நடத்தப்பட்டது. மின்துறையில் நிலக்கரி கொள்முதலில் மதிப்பைத் திட்டமிட்டுத் குறைத்துக் காட்டி (Under Value) ஆண்டுக்கு 2,000 கோடி ரூபாய் வரை இமாலய ஊழல் அரங்கேறியது. இதுமட்டுமன்றி, டிரான்ஸ்பார்மர் (Transformer) கொள்முதல் மற்றும் டெண்டர்களில் நடைபெற்ற தில்லுமுல்லுகளை அறப்போர் இயக்கம் போன்ற அமைப்புகள் தொடர்ந்து ஆதாரங்களுடன் அம்பலப்படுத்தின. இதெல்லாம் அப்போதைய முதலமைச்சர் ஸ்டாலினுக்குத் தெரியாமல் நடந்ததா? கொள்ளையடித்து மொத்தப் பணத்தையும் ஒரே குடும்பத்திடம் கொடுப்பதற்காகவே மு.க.ஸ்டாலின் அன்று அமைச்சரவையை உருவாக்கினார்” என்று அதிரடியாகக் குற்றம் சாட்டினார்.
“தற்போது தவெக ஆட்சியில் எந்தவொரு மெகாவாட் மின் திட்டத்திலாவது அல்லது ஒரு டெண்டரிலாவது தற்போதைய மின்துறை அமைச்சர் ஒரு பைசா லஞ்சம் வாங்கினார் என்று யாராவது இந்த ஊடகங்கள் முன்பு நிரூபிக்க முடியுமா?” என அமைச்சர் ஆதவ் அர்ஜுனா சவால் விடுத்துள்ளார். மேலும், “கடந்த திமுக ஆட்சியில் டிடிசிபி (DTCP) நில அங்கீகாரப் பதிவுகளுக்கு ஒரு ஏக்கருக்கு 7.5 லட்சம் முதல் 10 லட்சம் ரூபாய் வரை லஞ்சம் வாங்கப்பட்ட அவல நிலையை மாற்றி, தவெகவின் இந்த 30 நாள் ஆட்சியில் ‘ஜீரோ கமிஷன்’ (Zero Commission) என்ற நேர்மையான நிர்வாக மாற்றத்தைக் கொண்டு வந்துள்ளோம்; எங்களைப் பார்த்து கேள்வி கேட்க திமுகவிற்கு எந்த தார்மீக உரிமையும் இல்லை” என்று நெஞ்சுரத்தோடு அமைச்சர் தனது கண்டனத்தைப் பதிவு செய்துள்ளார்.
