தமிழக வெற்றிக் கழகத்தைச் (தவெக) சேர்ந்த அமைச்சருக்கும், அதே கட்சியைச் சேர்ந்த ஒன்றிய செயலாளருக்கும் இடையே நடைபெற்ற உரையாடலின் போன் ஆடியோ வெளியாகி சமூக வலைதளங்களில் வைரலாகி வருகிறது. தவெகவின் முக்கிய அமைச்சரான ஜெகதீஸ்வரி, ஒன்றிய செயலாளர் லெட்சுமணனைத் தகாத வார்த்தைகளால் திட்ட அறிவுறுத்தியதாகவும், அதன் அடிப்படையில் அரசு ஒப்பந்தக்காரரான சாத்தூர் ராஜகுரு என்பவர் கட்சியிலிருந்து சஸ்பெண்ட் செய்யப்பட்டு நீக்கப்பட்டதாகவும் கூறப்படும் இச்சம்பவம் தவெக வட்டாரத்தில் பெரும் அதிர்ச்சியை ஏற்படுத்தியுள்ளது.
25 ஆண்டுகளாக அரசு ஒப்பந்தக்காரராகப் பணியாற்றி வரும் ராஜகுரு, தவெகவில் இணைந்த பிறகு விருதுநகர் மாவட்டத்தில் பல ஊர்களில் கிளைகளை உருவாக்கி, சாத்தூர் சட்டமன்றத் தொகுதிக்கு வேட்பாளர் சீட்டும், யூனியன் சேர்மன் பதவிக்கு முயற்சியும் செய்து வந்துள்ளார். இந்நிலையில், உட்கட்சியில் தனக்கு எதிராக உள்ள சிலர் அமைச்சர் ஜெகதீஸ்வரியிடம் தவறான தகவல்களை வழங்கித் தூண்டிவிட்டதாகவும், அதை உண்மை என நம்பிய அமைச்சர் தனது மாவட்டச் செயலாளரை விட்டுத் தன்னை ஆபாச வார்த்தைகளால் திட்ட வைத்ததோடு கட்சியிலிருந்தும் சஸ்பெண்ட் செய்ய வைத்துள்ளதாக ராஜகுரு குற்றம் சாட்டியுள்ளார்.
இதனால் மனதளவில் கடும் பாதிப்படைந்த தான், நியாயத்தைக் வெளிக்கொண்டு வரும் பொருட்டே அமைச்சர் மற்றும் ஒன்றிய செயலாளர் லெட்சுமணன் இடையிலான உரையாடல் ஆடியோவைப் பகிரங்கமாக வெளியிட்டதாகத் தெரிவித்துள்ளார். “நான் எந்தத் தவறும், எந்தக் களங்கமும் செய்யவில்லை; நேர்மையாகக் கட்சி வளர்க்க உழைத்த எனக்குத் தவறான புகார்களின் பேரில் தண்டனை வழங்கப்பட்டுள்ளது” என்று கூறியுள்ள அவர், தனக்கு வழங்கப்பட்ட நீக்க உத்தரவைத் திரும்பப் பெற்று, மீண்டும் கட்சியில் பழைய பதவியை வழங்க வேண்டும் எனக் கோரிக்கை விடுத்துள்ளார்.
ஏற்கனவே தவெகவில் பல மாவட்டங்களில் உட்கட்சிப் பூசல்களும் நிர்வாகிகள் நீக்கமும் தொடர்ந்து நடைபெற்று வரும் சூழலில், அமைச்சரின் பெயரைச் சுட்டிக்காட்டி லீக்கான இந்த ஆடியோ பதிவு தவெக தலைவரும் முதல்வருமான விஜய்யின் கவனத்திற்குச் சென்றுள்ளது. இச்சம்பவம் குறித்து விரிவான விசாரணை நடத்தி, சம்பந்தப்பட்டவர்கள் மீது தகுந்த நடவடிக்கை எடுக்கத் தலைமை உத்தரவிட்டுள்ளதாகத் தகவல்கள் தெரிவிக்கின்றன.
