தமிழக வெற்றிக் கழகத்தின் (தவெக) உட்கட்சி பலத்தையும் உறுப்பினர் எண்ணிக்கையையும் தென் மாவட்டங்களில் அதிகரிக்கும் வகையில், சிவகங்கையில் சுமார் 10,000 பேரை ஒரே மேடையில் கட்சியில் இணைக்கும் பிரம்மாண்ட விழாவுக்கான ஏற்பாடுகள் தீவிரமடைந்துள்ளன. சிவகங்கை அருகே உள்ள மதகுபட்டி பகுதியில் இதற்காகப் பிரம்மாண்டமான மேடை அமைக்கப்பட்டு, விழாவுக்கான இறுதிக்கட்ட வேலைகள் விறுவிறுப்பாக நடைபெற்று வருகின்றன.
முன்னாள் காங்கிரஸ் நிர்வாகியான சுந்தர்ராஜன், சட்டப்பேரவைத் தேர்தலுக்கு முன்பாகவே காங்கிரஸ் கட்சியின் அடிப்படை உறுப்பினர் பொறுப்பு உட்பட அனைத்து பதவிகளிலிருந்தும் விலகியிருந்தார். தேர்தல் முடிவுகளுக்குப் பிறகு அமைதி காத்து வந்த அவர், தற்போது தனது ஆதரவாளர்கள் மற்றும் மாற்றுக்கட்சியினருடன் இணைந்து தவெகவில் அதிகாரப்பூர்வமாக இணைய முடிவெடுத்துள்ளார். இதற்காகக் சுமார் 10,000 பேரை ஒரே நேரத்தில் தவெகவில் இணைக்கும் பிரம்மாண்ட மாநாடு போன்று இந்த விழாவை நடத்த அவர் திட்டமிட்டுள்ளார்.
இந்த இணைப்பு விழாவிற்காகச் சிவகங்கை – திருச்சி தேசிய நெடுஞ்சாலையில் அமைந்துள்ள மதகுபட்டி அருகே சுமார் ரூ. 2 கோடி மதிப்பீட்டில் பிரம்மாண்ட பந்தல் மற்றும் பிரத்யேக மேடை வடிவமைக்கப்பட்டுள்ளது. முன்னதாக ஜூலை 19-ஆம் தேதி நடைபெறவிருந்த இந்த விழா சில நிர்வாகக் காரணங்களால் தள்ளிவைக்கப்பட்ட நிலையில், தற்போது தலைமை நிர்வாகிகள் ஒப்புதலுடன் புதிய தேதியில் விழாவை நடத்த இறுதிக்கட்ட நடவடிக்கைகள் முன்னெடுக்கப்பட்டு வருகின்றன.
தென் தமிழகத்தில் தவெகவின் அலை அதிகரித்து வரும் சூழலில், சிவகங்கையில் ஒரே நாளில் 10,000 பேர் கட்சியில் இணையவுள்ளது பிற அரசியல் கட்சிகளிடையே பெரும் கவனத்தைப் பெற்றுள்ளது. தவெகவின் முக்கியப் பொதுச்செயலாளர் மற்றும் மாநில நிர்வாகிகள் முன்னிலையில் நடைபெறவுள்ள இந்த மாபெரும் இணைப்பு விழா, சிவகங்கை மற்றும் அதனைச் சுற்றியுள்ள மாவட்டங்களில் கட்சியின் அடித்தளத்தை மேலும் வலுப்படுத்தும் எனக் கட்சி நிர்வாகிகள் நம்பிக்கை தெரிவித்துள்ளனர்.
