தமிழக வெற்றிக் கழகத்தின் (தவெக) உட்கட்சி அமைப்பை மேலும் வலுப்படுத்தும் நோக்கில், கட்சித் தலைவரும் முதலமைச்சருமான விஜய் அதிரடியான மறுசீரமைப்பு நடவடிக்கைகளை மேற்கொண்டுள்ளார். நிர்வாக வசதியைக் கருத்தில் கொண்டு புதிதாக 27 கட்சி மாவட்டங்கள் உருவாக்கப்பட்டு மொத்தம் 147 மாவட்டங்களாக விரிவுபடுத்தப்பட்டுள்ளன. அத்துடன், மாற்றுக் கட்சிகளிலிருந்து தவெகவில் இணைந்த முன்னாள் அமைச்சர்கள் மற்றும் முக்கிய நிர்வாகிகளுக்குப் புதிய கட்சிப் பொறுப்புகள் வழங்கப்பட்டு, கட்சிப் பணிகள் தீவிரப்படுத்தப்பட்டுள்ளன.
குறிப்பாக, அதிமுகவில் இருந்து விலகி தவெகவில் இணைந்த முன்னாள் அமைச்சர்களான சி. விஜயபாஸ்கருக்குப் புதுக்கோட்டை மாவட்ட அமைப்புச் செயலாளர் பொறுப்பும், எம்.ஆர். விஜயபாஸ்கருக்குக் கரூர் மாவட்ட அமைப்புச் செயலாளர் பொறுப்போடு துணைப் பொதுச்செயலாளர் பொறுப்பும் வழங்கப்பட்டுள்ளது. மேலும், முன்னாள் அமைச்சர் இசக்கி சுப்பையாவுக்குத் தென்காசி மாவட்ட அமைப்புச் செயலாளராகவும், மரகதம் குமரவேல் உட்படப் பலருக்குத் துணைப் பொதுச்செயலாளர் பதவிகளும் அறிவிக்கப்பட்டுள்ளன. இவர்களுடன் ராஜகோபால், ஜாகீர் உசேன், யுவராஜ், தினகரன், சாமுவேல் உள்ளிட்ட நிர்வாகிகள் மாநில அளவிலான முக்கியப் பொறுப்புகளில் நியமிக்கப்பட்டுள்ளனர்.
இதுதவிர, புதிதாக உருவாக்கப்பட்ட 27 மாவட்ட அமைப்புகளுக்குச் செயலாளர்கள் நியமிக்கப்பட்டு அறிவிக்கப்பட்டுள்ளனர். இதில் தவெக சார்பில் சட்டமன்ற உறுப்பினர்களாகத் தேர்வு செய்யப்பட்ட 21 பேருக்குத் தங்களது தொகுதியை உள்ளடக்கிய மாவட்டச் செயலாளர் பொறுப்புகள் வழங்கப்பட்டுள்ளன. மாநில அமைச்சர்களான கீர்த்தனா மற்றும் ஸ்ரீநாத் ஆகியோருக்கும் மாவட்டச் செயலாளர் பொறுப்புகள் ஒதுக்கப்பட்டுள்ளன. கட்சிப் பணிகளைத் துரிதப்படுத்தவும், கட்சி அமைப்பை மேலும் பலப்படுத்தவும் அனுபவமிக்கத் தலைவர்களுக்கு முன்னுரிமை அளிக்கப்பட்டுள்ளதாகக் கட்சித் தலைமை தெரிவித்துள்ளது.
குறிப்பாக மாற்றுக்கட்சிகளின் பாரம்பரியக் கோட்டைகளாகக் கருதப்படும் மாவட்டங்களில் தவெகவின் செல்வாக்கை உயர்த்தும் வகையில் இந்த நியமனங்கள் திட்டமிட்டு செய்யப்பட்டுள்ளன. கரூரில் எம்.ஆர். விஜயபாஸ்கர் போன்ற செல்வாக்குமிக்க தலைவர்களை முன்னிறுத்துவதன் மூலம் அப்பகுதி முழுவதையும் தவெகவின் வலுவான தளமாக மாற்றுவதே முதலமைச்சர் விஜய்யின் முக்கிய வியூகமாகக் கருதப்படுகிறது. கட்சி அமைப்பைப் பலப்படுத்தும் விஜய்யின் இந்த அடுத்தடுத்த அரசியல் நகர்வுகள் தமிழக அரசியல் களத்தில் பெரும் விவாதப் பொருளாக மாறியுள்ளன.
