பிரிட்டனின் தேசிய வான் போக்குவரத்து சேவை அமைப்பான ‘நேட்ஸ்’ (NATS) தொழில்நுட்பக் கட்டமைப்பில் ஏற்பட்ட திடீர் கணினி கோளாறு காரணமாக இங்கிலாந்து முழுவதும் 1,000-க்கும் மேற்பட்ட விமானங்கள் ரத்து செய்யப்பட்டு, லட்சக்கணக்கான பயணிகள் விமான நிலையங்களிலேயே முடங்கியுள்ளனர்.
லண்டனின் ஹீத்ரோ, கேட்விக், மான்செஸ்டர் மற்றும் ஸ்டான்ஸ்டெட் உள்ளிட்ட நாட்டின் முக்கிய சர்வதேச விமான நிலையங்களில் செவ்வாய்க்கிழமை மதியம் விமானங்களின் புறப்பாடு மற்றும் தரையிறக்கத்தைக் கட்டுப்படுத்தும் தானியங்கித் தரவு செயலாக்க அமைப்பில் (Flight Data Processing System) இந்தத் தொழில்நுட்பக் கோளாறு ஏற்பட்டது. இதன் காரணமாக வான்வெளிப் போக்குவரத்து உடனடியாகக் கட்டுப்படுத்தப்பட்டு, நூற்றுக்கணக்கான விமானங்கள் ரத்து செய்யப்பட்டன அல்லது வேறு நாடுகளுக்குத் திருப்பி விடப்பட்டன.
தொழில்நுட்பக் கோளாறு கண்டறியப்பட்டுச் சரிசெய்யப்பட்டதாகப் பொறியாளர்கள் அறிவித்த போதிலும், விமானங்கள் மற்றும் பணிக்குழுவினர் (Flight Crew) மாறுபட்ட இடங்களில் முடங்கியுள்ளதால், இயல்பு நிலை திரும்புவதில் கடும் சிக்கல் நீடிக்கிறது. இதன் தாக்கமும் கால அட்டவணை மாற்றங்களும் சீரடைய இன்னும் சில நாட்கள் அல்லது பல வாரங்கள் கூட ஆகலாம் என்று விமான நிலைய நிர்வாகங்களும் பிரிட்டிஷ் ஏர்வேஸ், ரைனாயர் உள்ளிட்ட முன்னணி விமான நிறுவனங்களும் எச்சரித்துள்ளன.
கடந்த மூன்று ஆண்டுகளில் பிரிட்டன் வான் போக்குவரத்து கட்டுப்பாட்டு மையத்தில் ஏற்படும் மூன்றாவது பெரிய தொழில் நுட்ப முடக்கம் இது என்பதால், விமான நிறுவனங்களின் தலைவர்கள் கடும் அதிருப்தி தெரிவித்துள்ளனர். இச்சம்பவத்திற்குப் பொறுப்பேற்று ‘நேட்ஸ்’ அமைப்பின் தலைமைச் செயல் அதிகாரி மார்ட்டின் ரோல்ஃப் ராஜினாமா செய்ய வேண்டும் எனப் போர்க்கொடி தூக்கியுள்ளதால் பிரிட்டன் விமான போக்குவரத்துத் துறை பெரும் குழப்பத்தில் ஆழ்ந்துள்ளது.
