அட்லாண்டிக் பெருங்கடல் வழியிலான அடிமை வர்த்தகத்தில் பிரிட்டனின் வரலாற்றுப் பங்கு மற்றும் அதனால் பாதிக்கப்பட்ட கோடிக்கணக்கான மக்களின் துயரங்களுக்கு வருத்தம் தெரிவிக்கும் வகையில் அதிகாரப்பூர்வ மன்னிப்பு கேட்கத் தான் தயாராக இருப்பதாகப் பிரித்தானியப் பிரதமர் ஆண்டி பர்ன்ஹாம் தெரிவித்துள்ளார். ‘தி கார்டியன்’ நாளிதழில் அவர் எழுதியுள்ள கட்டுரையில், பல மில்லியன் மக்களின் வலி மற்றும் துன்பத்திற்குத் தனது ஆழ்ந்த வருத்தத்தை வெளிப்படுத்துவதாகக் குறிப்பிட்டுள்ளார். இருப்பினும், இந்த வரலாற்றுத் தவறுகளுக்காகப் பாதிக்கப்பட்ட நாடுகளுக்கு நிதியுதவி அல்லது இழப்பீடு (Reparations) வழங்குவதை அவர் முற்றிலுமாக நிராகரித்துள்ளார்.
அண்டி குவா மற்றும் பார்புடாவில் நடைபெறவுள்ள காமன்வெல்த் உச்சிமாநாட்டிற்கு முன்னதாகப் பிரிட்டன் பிரதமர் இந்த அறிவிப்பை வெளியிட்டுள்ளார். அடிமை வர்த்தகத்தால் பாதிக்கப்பட்ட நாடுகள் மற்றும் சமூகங்களுடன் தற்போதைய சூழலில் ஒரு கட்டமைக்கப்பட்ட பேச்சுவார்த்தையைத் (Structured dialogue) தொடங்கப் பிரிட்டன் விரும்புவதாக அவர் குறிப்பிட்டுள்ளார். பல்வேறு காலகட்டங்களில் சட்டவிரோதமாகக் கடத்தப்பட்ட 1.25 கோடிக்கும் அதிகமான ஆப்பிரிக்க மக்களின் உரிமைகள் கொடூரமான முறையில் மீறப்பட்டதை அவர் சுட்டிக்காட்டியுள்ளார்.
கடந்த காலத்தில் நடந்த வரலாற்றுத் தவறுகளுக்காக இன்றைய தலைமுறை பிரிட்டன் மக்களைப் பொறுப்பாக்க முடியாது என்று கூறிய பர்ன்ஹாம், நிதி சார்ந்த இழப்பீடு வழங்குவது சரியான தீர்வாக இருக்காது எனத் தெரிவித்தார். காமன்வெல்த் உறுப்பு நாடுகளின் தலைவர்கள் இந்த விவகாரத்தில் வெவ்வேறு கருத்துகளைக் கொண்டிருந்தாலும், பரஸ்பர மரியாதையுடன் பேச்சுவார்த்தைகளை முன்னோக்கி எடுத்துச் செல்ல வேண்டும் என்று அவர் வலியுறுத்தியுள்ளார். அதேவேளையில், கரீபியன் நாடுகள் மற்றும் மனித உரிமை அமைப்புகள் பிரிட்டன் அரசிடம் இருந்து இழப்பீட்டுத் தொகையையும் தொடர்ந்து கோரி வருகின்றன.
வரவிருக்கும் காமன்வெல்த் உச்சிமாநாட்டில் பிரிட்டன் மன்னர் சார்லஸ் பங்கேற்றுப் பேசவுள்ள நிலையில், அடிமை முறை தொடர்பான விவாதங்கள் சர்வதேச அளவில் முக்கியத்துவம் பெற்றுள்ளன.
பாதிக்கப்பட்ட ஏழை நாடுகளின் கடன் மறுசீரமைப்பு மற்றும் பொருளாதார மேம்பாட்டிற்கான பிற மாற்று உதவிகளை வழங்குவது குறித்துப் பிரிட்டன் அரசு திட்டமிட்டு வருகிறது.
