பிரிட்டன் மன்னர் மூன்றாம் சார்லஸ் (King Charles III) காலமானதாக அந்நாட்டின் பிரபல வானொலி நிலையமான ‘ரேடியோ கேரோலைன்’ (Radio Caroline) தவறான செய்தியை ஒலிபரப்பிய சம்பவம் பெரும் பரபரப்பை ஏற்படுத்திய நிலையில், அதற்கு அந்த நிறுவனத்தின் ஊழியர் அளித்த விசித்திரமான விளக்கம் தற்போது ஊடகக் கண்காணிப்பு அமைப்பான ‘ஆஃப்காம்’ (Ofcom) அறிக்கையில் வெளியாகியுள்ளது.
பிரிட்டனில் மன்னர் அல்லது அரச குடும்பத்து மூத்த உறுப்பினர்கள் இறக்கும் பட்சத்தில் ஒலிபரப்பப்பட வேண்டிய முன்-பதிவு செய்யப்பட்ட (Pre-recorded) இரங்கல் ஒலிப்பதிவுகள் அனைத்து முன்னணி வானொலி நிலையங்களிலும் பாதுகாப்புடன் சேமிக்கப்பட்டிருக்கும். இந்நிலையில், ‘தி பேரி மார்ஷ் ஷோ’ என்ற நேரலை நிகழ்ச்சியின் போது, கணினியில் பராமரிப்புப் பணியில் ஈடுபட்டிருந்த ஊழியர் ஒருவர், அந்த இரங்கல் ஒலிப்பதிவு கோப்புகளைக் கண்டு, “சும்மா என்னதான் இருக்கிறது என்று பார்க்கும் ஆர்வக்கோளாறில்” (Out of curiosity) அதை இயக்கியுள்ளார்.
அந்தப் பதிவு இயங்கிய அடுத்த நொடியே நேரலை நிகழ்ச்சி துண்டிக்கப்பட்டு, “மன்னர் சார்லஸ் காலமானதை அடுத்து வழக்கமான நிகழ்ச்சிகள் இடைநிறுத்தப்படுகின்றன” என்ற செய்தி தேசிய கீதத்துடன் ஒளிபரப்பானது. இதைக் கண்டு அதிர்ச்சியடைந்த அந்த ஊழியர், என்ன செய்வதென்று தெரியாமல் பதற்றமடைந்து (Panicked) உடனே அங்கிருந்து ஓட்டம் பிடித்துள்ளார். மற்றொரு இடத்தில் இருந்து நிகழ்ச்சியைத் தொகுத்து வழங்கிய தொகுப்பாளர், தனது குரல் துண்டிக்கப்பட்டதை அறியாமல் தொடர்ந்து பேசிக்கொண்டிருந்ததால் சுமார் 30 நிமிடங்கள் கழித்தே தவறு திருத்தப்பட்டு மன்னிப்பு கேட்கப்பட்டது.
இந்தச் சம்பவம் குறித்து விசாரணை நடத்திய பிரிட்டனின் ஊடகக் கண்காணிப்பு அமைப்பான ‘ஆஃப்காம்’, தவறான செய்தியை ஒலிபரப்பியமைக்காகவும், அதை உடனடியாகத் திருத்தத் தவறியதற்காகவும் ரேடியோ கேரோலைன் நிறுவனம் ஊடக விதிகளை மீறியதாகக் குற்றம் சாட்டியுள்ளது. ஊழியரின் இந்த ‘ஆர்வக்கோளாறு’ செயலால் பிரிட்டன் மக்கள் மத்தியில் சில நிமிடங்கள் பேரதிர்ச்சி ஏற்பட்ட நிலையில், சம்பந்தப்பட்ட ஊழியர் எச்சரிக்கப்பட்டு அப்பதிவுகள் கணினியிலிருந்து நீக்கப்பட்டுள்ளன.
