பிரிட்டன் நாட்டில் ‘ஆஸ்டன்’ மற்றும் ‘போலோ’ ஆகிய புயல்களைத் தொடர்ந்து வீசிய கனமழை மற்றும் சூறாவளிக் காற்றினால் நாட்டின் பல பகுதிகள் பாதிக்கப்பட்டுள்ளன. கடலோரப் பகுதிகள் மற்றும் மேடான இடங்களில் மணிக்கு 74 மைல் (119 கி.மீ) முதல் 84 மைல் வேகத்தில் பலத்த காற்று வீசியதாகப் பிரிட்டன் வானிலை ஆய்வு மையம் (Met Office) தெரிவித்துள்ளது. இதன் காரணமாகப் பல இடங்களில் மரங்கள் முறிந்து விழுந்ததோடு, சாலைப் போக்குவரத்து மற்றும் இரயில் சேவைகள் கடுமையாகப் பாதிக்கப்பட்டதாக அதிகாரிகள் தெரிவித்துள்ளனர்.
தொடர் கனமழையின் காரணமாக இங்கிலாந்தின் சுற்றுச்சூழல் முகமை (Environment Agency), வேல்ஸ் மற்றும் ஸ்காட்லாந்து சுற்றுச்சூழல் பாதுகாப்பு அமைப்புகள் இணைந்து 30-க்கும் மேற்பட்ட வெள்ள எச்சரிக்கைகளையும் பல இடங்களுக்குக் கூடுதல் விழிப்புணர்வு எச்சரிக்கைகளையும் விடுத்துள்ளன. ஆயிரக்கணக்கான வீடுகளில் மின் விநியோகம் தடைபட்ட நிலை சரிசெய்யப்பட்டு வரும் சூழலில், கரையோரப் பகுதிகளில் அலைகளின் சீற்றம் அதிகமாக இருக்கும் எனக் எச்சரிக்கப்பட்டுள்ளது. மேலும், மழைப் பொழிவுக்குப் பிறகு இரவு மற்றும் அதிகாலை நேரங்களில் அடர்ந்த மூடுபனி (Fog and Mist) நிலவும் என்பதால் வாகன ஓட்டிகள் கவனமாக இருக்குமாறு கேட்டுக்கொள்ளப்பட்டுள்ளனர்.
தற்போது தெற்குப் பகுதியிலிருந்து உயர் வளிமண்டல அழுத்தம் அதிகரித்து வருவதால், வரும் நாட்களில் வானிலை படிப்படியாகச் சீரடையும் என்று வானிலை அதிகாரிகள் கணித்துள்ளனர்.
இருப்பினும், வெள்ளப்பெருக்கு அபாயம் உள்ள ஆறுகள் மற்றும் கடலோரப் பகுதி மக்கள் தொடர்ந்து எச்சரிக்கையுடன் இருக்க வேண்டும் எனப் பேரிடர் மீட்புக் குழுவினர் அறிவுறுத்தியுள்ளனர்.
