அமெரிக்காவில் 2026-ஆம் ஆண்டு நடைபெறவுள்ள இடைத்தேர்தலில் (US Midterms 2026) முக்கியக் காங்கிரஸ் தொகுதிகளின் தேர்தல் முடிவுகளைத் தீர்மானிக்கும் ஆற்றல் வாய்ந்த அமைப்பாக இந்திய அமெரிக்க வாக்காளர்கள் உருவெடுத்துள்ளனர். ஆசிய அமெரிக்க மற்றும் பசிபிக் தீவுவாழ் வாக்காளர்களில் 90 சதவீதத்தினர் இத்தேர்தலில் வாக்களிக்கத் திட்டமிட்டுள்ளதாகத் தெரிவிக்கப்பட்டுள்ளது. ஜோார்ஜியா, மிச்சிகன், வட கரோலினா மற்றும் அரிசோனா போன்ற கடும் போட்டி நிலவும் மாகாணங்களில் இவர்களின் மக்கள்தொகை வளர்ச்சி குறிப்பிடத்தக்க மாற்றத்தை ஏற்படுத்தக்கூடும் எனக் கருதப்படுகிறது.
2022 அமெரிக்கக் கணக்கெடுப்புத் தரவுகளின்படி, அமெரிக்காவில் 2.1 மில்லியனுக்கும் அதிகமான இந்திய அமெரிக்கர்கள் வாக்களிக்கும் தகுதி பெற்றுள்ளனர். ‘AAPI Data’ வெளியிட்ட கருத்துக்கணிப்புத் தரவுகளின்படி, இந்திய அமெரிக்க வாக்காளர்களில் 66 சதவீதத்தினர் ஜனநாயகக் கட்சி (Democratic) வேட்பாளர்களுக்கும், 22 சதவீதத்தினர் குடியரசுக் கட்சி (Republican) வேட்பாளர்களுக்கும் ஆதரவு தெரிவிப்பதாகக் கூறப்பட்டுள்ளது. வாழ்க்கைச் செலவு உயர்வு மற்றும் பணவீக்கம் ஆகியவை 90 சதவீத வாக்காளர்களால் மிக முக்கியமானப் பிரச்சினையாகக் குறிப்பிடப்பட்டுள்ளதுடன், சுகாதாரப் பாதுகாப்பு மற்றும் வேலைவாய்ப்பு ஆகியவையும் முதன்மை விஷயங்களாகக் கருதப்படுகின்றன.
அரசியல் ரீதியாக இந்திய அமெரிக்க சமூகம் ஜனநாயகக் கட்சியின் பக்கம் அதிக சாய்வைக் கொண்டிருந்தாலும், சமீபத்திய ஆண்டுகளில் சுயேச்சை வாக்காளர்களின் எண்ணிக்கையும் கணிசமாக உயர்ந்துள்ளதாக ஆய்வுகள் தெரிவிக்கின்றன. ‘கார்னகி எண்டோவ்மென்ட்’ அமைப்பு பிப்ரவரி 2026-இல் வெளியிட்ட அறிக்கையின்படி, பணவீக்கம், குடியேற்றக் கொள்கை மற்றும் வேலைவாய்ப்பு சார்ந்த கவலைகள் வாக்காளர்களின் முடிவுகளைப் பெரிதும் தீர்மானிப்பதாகக் குறிப்பிடப்பட்டுள்ளது. இரு முக்கிய அரசியல் கட்சிகளும் இச்சமூகத்தினரின் ஆதரவைப் பெறப் பல்வேறு பிரசார உத்திகளைக் கையாண்டு வருகின்றன.
நவம்பர் 3, 2026 அன்று நடைபெறவுள்ள இத்தேர்தலில் பிரதிநிதிகள் சபை மற்றும் செனட் சபையின் பல இடங்களுக்குக் கடும் போட்டி நிலவுகிறது. மிகக் குறைந்த வாக்கு வித்தியாசத்தில் வெற்றி தோல்வி நிர்ணயிக்கப்படும் நெருக்கடியான தொகுதிகளில், இந்திய அமெரிக்கர்களின் வாக்குகள் தீர்க்கமான முடிவை வழங்கும் எனக் கணிக்கப்படுகிறது. இத்தேர்தல் முடிவுகள் அமெரிக்க நாடாளுமன்றத்தின் அதிகாரச் சமநிலையை மாற்றி அமைப்பதில் முக்கியப் பங்கு வகிக்கும் எனக் கருதப்படுகிறது.
