திமுக தலைமையிலான மதச்சார்பற்ற முற்போக்குக் கூட்டணியில் இருந்து மதிமுக அதிகாரப்பூர்வமாக வெளியேறியுள்ள நிலையில், அக்கட்சியின் எம்.எல்.ஏ-க்கள் ராஜினாமா விவகாரம் தமிழக அரசியல் களத்தில் பெரும் புயலைக் கிளப்பியுள்ளது. மதிமுக பொதுக்குழு கூட்டத்தில் பேசிய வைகோ, “திமுகவின் உதயசூரியன் சின்னத்தில் போட்டியிட்டு வென்ற நமது இரண்டு எம்.எல்.ஏ-க்களும் (ஆர். செந்தில்செல்வன், டி.எம். ராஜேந்திரன்) தங்களின் பதவிகளை ராஜினாமா செய்துவிட்டு தவெக ஆதரவோடு தனித்து நின்று மீண்டும் வெல்ல வேண்டும்; அதற்கு தவெக தலைவரும் முதலமைச்சருமான விஜய் முழு ஆதரவளிப்பதாக உறுதியளித்துள்ளார்” எனக் கூறியிருந்தார். இந்த விவகாரம் ‘குதிரை பேரம்’ மற்றும் ‘அரசியல் சட்ட விதிகளை மீறிய செயல்’ என திமுக மற்றும் எதிர்க்கட்சிகளால் கடுமையாக விமர்சிக்கப்பட்ட சூழலில், வைகோ தற்பொழுது இதில் புதிய விளக்கமளித்து அரசியல் பல்டி அடித்துள்ளார்.
செய்தியாளர்களைச் சந்தித்த வைகோ, “மதிமுக எம்.எல்.ஏ-க்களைப் பதவி விலகச் சொல்லி முதலமைச்சர் விஜய் எந்த இடத்திலும் வற்புறுத்தவில்லை; அந்தத் தார்மீக முடிவை நான்தான் எடுத்தேன்” என்று திடீரென மாற்றிப் பேசியுள்ளார். உதயசூரியன் சின்னத்தில் நின்று வென்றுவிட்டு, தற்பொழுது கூட்டணி மாறியுள்ளதால் தார்மீக அடிப்படையில் ராஜினாமா செய்துவிட்டு தவெக-மதிமுக கூட்டணியின் கீழ் தனிச் சின்னத்தில் தேர்தலைச் சந்திக்கலாம் என்ற யோசனையைத் தான் மட்டுமே முன்வைத்ததாக வைகோ தெளிவுபடுத்தியுள்ளார். முதலமைச்சர் விஜய் தங்களுக்குத் தேர்தல் ரீதியான ஆதரவை மட்டுமே தருவதாகக் கூறினார் என்றும், எம்.எல்.ஏ-க்களை விலகச் சொல்லி அவர் எவ்வித அழுத்தமும் தரவில்லை என்றும் அவர் தற்பொழுது பல்டி அடித்துள்ளார்.
இருப்பினும், வைகோவின் இந்த அதிரடி யோசனைக்கு மதிமுகவின் இரு எம்.எல்.ஏ-க்களுமே கடுமையான முட்டுக்கட்டை போட்டுள்ளனர். சீர்காழி எம்.எல்.ஏ செந்தில்செல்வன் மற்றும் கடையநல்லூர் எம்.எல்.ஏ ராஜேந்திரன் ஆகிய இருவரும் தங்களின் பதவிகளை ராஜினாமா செய்ய முற்றிலும் மறுத்துவிட்டனர். 5 ஆண்டுகாலப் பதவிக்காலம் இன்னும் முழுமையாக முடியாத நிலையில், அவசரமாக ராஜினாமா செய்துவிட்டு மீண்டும் இடைத்தேர்தலைச் சந்திப்பது சாத்தியமில்லாத ஒன்று என அவர்கள் தலைமைக்கே அதிர்ச்சி கொடுத்துள்ளனர். இதில் செந்தில்செல்வன் அதிகாரப்பூர்வமாக திமுகவிலேயே இணைய முடிவெடுத்துள்ளதாகவும், ராஜேந்திரன் எம்.எல்.ஏ பதவியைத் தக்கவைத்துக்கொண்டு மதிமுகவில் தொடர விரும்புவதாகவும் அக்கட்சி வட்டாரங்கள் தெரிவிக்கின்றன.
திமுக கூட்டணியில் தங்களுக்குத் தொடர் அவமதிப்புகளும், இழிவுகளும் நேர்ந்ததால் தான் இந்த வெளியேற்ற முடிவு எடுக்கப்பட்டதாக மதிமுகவின் பொதுக்குழு தீர்மானத்தில் குற்றம் சாட்டப்பட்டுள்ளது. 2026 தேர்தலுக்குப் பிறகு திமுக திரைமறைவில் 47 எம்.எல்.ஏ-க்களைக் கொண்ட அதிமுகவுடன் கூட்டணி வைக்க முயன்றதாகவும், இது தங்களின் மதச்சார்பற்ற கொள்கைக்கு எதிரானது என்றும் வைகோ சாடியுள்ளார். தற்போதைய சூழலில், வரவிருக்கும் உள்ளாட்சித் தேர்தல் மற்றும் இடைத்தேர்தல்களில் தவெக-வுக்கு மதிமுக முழு ஆதரவளிக்கும் என்றும், முதலமைச்சர் விஜய்யின் நேர்மையான மற்றும் வெளிப்படையான நிர்வாகம் தங்களைக் கவர்ந்துள்ளதால் இந்த ஆதரவு நிலைப்பாடு எடுக்கப்பட்டுள்ளதாகவும் வைகோ மீண்டும் உறுதிபடத் தெரிவித்துள்ளார்.
