தமிழக அரசியல் வரலாற்றில் இதுவரை கண்டிராத ஒரு மாபெரும் அதிரடித் திருப்பமாக, திமுக கூட்டணியில் இருந்து விடுதலைச் சிறுத்தைகள் கட்சி (விசிக) அதிகாரப்பூர்வமாக வெளியேறியுள்ளது. வெறும் ஆதரவோடு நிற்காமல், காங்கிரஸ் கட்சியைப் போலவே விஜய்யின் தமிழக வெற்றி கழக (TVK) ஆட்சியில் நேரடிப் பங்கெடுக்கப்போவதாகத் தொல். திருமாவளவன் அதிரடியாக அறிவித்துள்ளார். இதன் மூலம் விசிக வரலாற்றிலேயே முதல்முறையாக அக்கட்சியின் சட்டமன்ற உறுப்பினர் ஒருவர் அமைச்சராகப் பதவியேற்க உள்ளார்.
கடந்த 11 ஆண்டுகளாக திமுகவுடன் நீடித்து வந்த அந்த வலுவான மெகா கூட்டணி, இரண்டே நாட்களில் சுக்குநூறாக உடைந்து சிதறியுள்ளது. திமுக கூட்டணியில் அங்கம் வகித்த நான்கு முக்கியப் பெரிய கட்சிகள் வரிசையாக வெளியேறி விஜய் பக்கம் சாய்ந்துள்ளதால், திராவிட முன்னேற்றக் கழகம் தற்போது தனித்து விடப்பட்ட நிலைக்குத் தள்ளப்பட்டுள்ளது. எஞ்சியிருக்கும் ஒரு சில சிறிய கட்சிகளை வைத்துக்கொண்டு இனி திமுகவால் அரசியல் களத்தில் எத்தகைய தாக்கத்தை ஏற்படுத்த முடியும் என்பது பெரும் கேள்விக்குறியாகியுள்ளது.
திமுகவின் வாக்கு வங்கி ஏற்கனவே கணிசமாகச் சரிந்துள்ள நிலையில், தவெக – காங்கிரஸ் – கம்யூனிஸ்ட் மற்றும் விசிக ஆகிய கட்சிகளின் இந்த “புதிய கூட்டணி” திமுகவை அதலபாதாளத்திற்குத் தள்ளியுள்ளது. குறிப்பாக, கொளத்தூர் தொகுதியில் ஸ்டாலின் தோல்வியடைந்த அந்தப் பேரிடியில் இருந்தே இன்னும் மீளாத திமுக தொண்டர்களுக்கு, திருமாவளவனின் இந்த முடிவு அடுத்தடுத்த பேரிடியாக அமைந்துள்ளது.
தமிழக அரசியலில் திராவிடக் கட்சிகளின் ஆதிக்கத்தை முடிவுக்குக் கொண்டு வரும் வகையில், விஜய்யின் தலைமையில் அமைய உள்ள இந்த “கூட்டு ஆட்சி” ஒரு புதிய சகாப்தத்தின் தொடக்கமாகப் பார்க்கப்படுகிறது. நாளை காலை விஜய்யுடன் சேர்ந்து விசிக அமைச்சரும் பதவியேற்க உள்ள செய்தி, அறிவாலய வட்டாரத்தை நிலைகுலையச் செய்துள்ளது.
