ரஷ்யாவின் ஏவுகணையே ரஷ்ய விமானத்தைச் சுட்டுக் கொன்ற விசித்திரம்! - கிரிமியாவில் நடந்த ராணுவத் தவறு!
ரஷ்யா - உக்ரைன் போரில் இதுவரை கண்டிராத ஒரு விசித்திரமான சம்பவம் தற்போது வெளிச்சத்திற்கு வந்துள்ளது. கடந்த அக்டோபர் மாதம் 16-ம் தேதி நடந்த இந்தச் சம்பவத்தை ரஷ்ய அரசு இவ்வளவு காலம் ரகசியமாக வைத்திருந்தது. ரஷ்யாவால் ஆக்கிரமிக்கப்பட்ட கிரிமியா பகுதியில், உக்ரைன் தனது சிறிய ரக வேவு பார்க்கும் ஆளில்லா விமானம் (Drone) ஒன்றைச் செலுத்தியுள்ளது. அப்போது அங்கிருந்த ரஷ்யாவின் அதிநவீன வான் பாதுகாப்பு ஏவுகணை அமைப்பு (S-400 போன்ற சிஸ்டம்), உக்ரைன் ட்ரோனை எதிரி நாட்டு விமானம் எனத் தவறாகக் கணித்து, தானாகவே (Automatic Mode) ஏவுகணையைச் செலுத்திவிட்டது.
துரதிர்ஷ்டவசமாக, அதே நேரத்தில் ரஷ்யாவின் சக்திவாய்ந்த SU-30 போர் விமானம் ஒன்று அந்த வான்பரப்பில் ரோந்துப் பணியில் ஈடுபட்டுக்கொண்டிருந்தது. உக்ரைன் ட்ரோனைத் துரத்த வேண்டிய ரஷ்ய ஏவுகணை, வெப்பத்தைக் கண்டறியும் தொழில்நுட்பத்தால் அருகிலிருந்த பெரிய ரஷ்ய போர் விமானத்தையே குறிவைத்துத் துரத்த ஆரம்பித்தது. தரைப்படை ஏவிய சொந்த நாட்டு ஏவுகணையிடமிருந்தே தப்பிக்க முடியாமல் SU-30 விமானம் திணறியுள்ளது. இறுதியில் அந்த ஏவுகணை ரஷ்ய விமானத்தையே தாக்கி அழித்துள்ளது.
இந்தத் தாக்குதலின் போது விமானி அதிர்ஷ்டவசமாகப் பாராசூட் மூலம் குதித்து உயிர் தப்பியதாகக் கூறப்படுகிறது. பல மில்லியன் டாலர் மதிப்புள்ள அதிநவீன SU-30 போர் விமானம் நொறுங்கிச் சிதறக் காரணமாக இருந்தது, வெறும் 500 டாலர் மதிப்புள்ள உக்ரைனின் சிறிய ட்ரோன் என்பதுதான் வேடிக்கையான உண்மை. ரஷ்யா கிரிமியாவில் நிறுவியுள்ள ஏவுகணைகள் நேட்டோ (NATO) மற்றும் அமெரிக்காவின் F-35 விமானங்களை எதிர்க்கக் கூடியவை. ஆனால், அவை சொந்த நாட்டு விமானத்தையே அழித்திருப்பது ரஷ்ய ராணுவத்தின் தொழில்நுட்பக் குறைபாட்டை வெளிச்சமிட்டுக் காட்டுகிறது.
உக்ரைன் தற்போது மிகக் குறைந்த செலவில் ஆளில்லா விமானங்களைத் தயாரிப்பதில் உலக நாடுகளுக்கே சவால் விட்டு வருகிறது. இந்தப் போரில் ராட்சத போர் விமானங்களை விட, சிறிய ரக ட்ரோன்களே அதிகப் பாதிப்புகளை ஏற்படுத்தி வருகின்றன. சொந்த நாட்டு ஏவுகணையால் பல கோடி ரூபாய் மதிப்புள்ள போர் விமானத்தை இழந்திருப்பது ரஷ்யாவிற்கு மிகப்பெரிய அவமானமாகவும், உக்ரைனுக்கு மறைமுக வெற்றியாகவும் பார்க்கப்படுகிறது.