இஸ்ரேலின் பாதுகாப்பு அமைப்பை உடைத்த ஈரானின் அதிரடி தாக்குதல்

மத்திய கிழக்கு பதற்றத்தை மேலும் தீவிரப்படுத்தும் வகையில், ஈரான் இஸ்ரேலின் ‘அயன் டோம்’ உள்ளிட்ட முக்கிய வான் பாதுகாப்பு அமைப்புகளை உடைத்து கடுமையான ஏவுகணை தாக்குதலை நடத்தியது. இந்த தாக்குதலில் டிமோனா அணுசக்தி நிலையம் நேரடியாக இலக்காகி, 180க்கும் மேற்பட்டோர் காயமடைந்ததாக தகவல்கள் வெளியாகியுள்ளன. பல ஏவுகணைகளை இஸ்ரேல் பாதுகாப்பு அமைப்புகள் சுட்டு வீழ்த்தியபோதும், சில ஏவுகணைகள் பாதுகாப்பு வலையைக் கடந்து நகரங்களைத் தாக்கியுள்ளன.

ஈரான் – அமெரிக்கா – இஸ்ரேல் மோதல் கடந்த 3 வாரங்களாக தொடர்கிறது. போரின் தொடக்கத்தில் ஈரானின் ஏவுகணை திறன் குறைந்துவிட்டது என்று கருதப்பட்ட நிலையில், தற்போது ஈரான் ட்ரோன்கள் மற்றும் பாலிஸ்டிக் ஏவுகணைகள் மூலம் இஸ்ரேல் மற்றும் அமெரிக்க இலக்குகள் மீது தொடர்ச்சியான தாக்குதல்களை நடத்தி வருகிறது. குறிப்பாக டிமோனா அணு நிலையம் மீது நடத்தப்பட்ட சமீபத்திய தாக்குதல், ஈரானின் ராணுவ திறனை உலக நாடுகள் கவனிக்கத் தொடங்க வைத்துள்ளது.

இஸ்ரேல் பாதுகாப்பு அமைச்சகம் வெளியிட்ட தகவலின்படி, ஈரான் மொத்தம் 400 ஏவுகணைகளை இஸ்ரேல் மீது ஏவியுள்ளது. இதில் 92% ஏவுகணைகள் நடுவானிலேயே சுட்டு வீழ்த்தப்பட்டன. ஆனால் அயன் டோம் உள்ளிட்ட பாதுகாப்பு அமைப்புகள் சில இடங்களில் செயலிழந்ததால், நூற்றுக்கணக்கான கிலோ வெடிபொருட்கள் கொண்ட இரண்டு பாலிஸ்டிக் ஏவுகணைகள் டிமோனா மற்றும் அராட் நகரங்களை நேரடியாகத் தாக்கியதாக கூறப்பட்டுள்ளது. இது இஸ்ரேலின் பாதுகாப்பு அமைப்பில் பெரிய குறைபாடு இருப்பதை வெளிப்படுத்துகிறது.

ஏவுகணைகள் எவ்வாறு பாதுகாப்பு அமைப்பை மீறின என்பதைக் கண்டறிய இஸ்ரேல் அரசு விசாரணைக்கு உத்தரவிட்டுள்ளது. பாதிக்கப்பட்ட பகுதிகளை இஸ்ரேல் பிரதமர் பெஞ்சமின் நெதன்யாகு மற்றும் அதிபர் ஐசக் ஹெர்சாக் நேரில் சென்று ஆய்வு செய்துள்ளனர். குறிப்பாக டிமோனாவில் ஏற்பட்ட சேதம் இதுவரை இல்லாத அளவுக்கு அதிகமாக இருப்பதாக இஸ்ரேலிய ஊடகங்கள் தெரிவித்துள்ளன. இந்த தாக்குதல் மத்திய கிழக்கு நிலைமையை மேலும் ஆபத்தான கட்டத்துக்கு தள்ளியுள்ளது.