ஹார்முஸ் நீரிணையின் நுழைவாயிலில் அமைந்துள்ள கெஷ்ம் தீவு, ஈரானின் "மூழ்கடிக்க முடியாத விமானம் தாங்கிக் கப்பல்" (Unsinkable Aircraft Carrier) என்று அழைக்கப்படுகிறது. யுனெஸ்கோ அங்கீகாரம் பெற்ற புவிசார் பூங்காக்கள், அழகான பவளப்பாறைகள் மற்றும் உப்புக் குகைகளுக்குப் பெயர் பெற்ற இந்தத் தீவின் நிலப்பரப்பிற்கு அடியில், ஈரான் தனது பிரம்மாண்டமான ஏவுகணைத் தளங்களை அமைத்துள்ளது. 'மிசைல் சிட்டி' (Missile City) என்று அழைக்கப்படும் இந்த நிலத்தடி சுரங்கங்களில், அதிநவீன கப்பல் எதிர்ப்பு ஏவுகணைகள், தற்கொலை படை ட்ரோன்கள் மற்றும் கண்ணிவெடிகள் மலைபோலக் குவிக்கப்பட்டுள்ளதாகச் செயற்கைக்கோள் புகைப்படங்கள் மற்றும் உளவுத்துறை தகவல்கள் தெரிவிக்கின்றன.
சுமார் 1,445 சதுர கிலோமீட்டர் பரப்பளவு கொண்ட இந்தத் தீவு, உலகளாவிய எரிசக்தி போக்குவரத்தின் முக்கியப் பாதையான ஹார்முஸ் நீரிணையை முழுமையாகக் கட்டுப்படுத்தும் வகையில் அமைந்துள்ளது. ஈரானின் புரட்சிகர பாதுகாப்புப் படை (IRGC), இந்தத் தீவின் அடியில் பல கிலோமீட்டர் நீளத்திற்குச் சுரங்கப் பாதைகளை அமைத்துள்ளது. அமெரிக்கப் படைகள் வான்வழித் தாக்குதல் நடத்தினால் கூட, இந்த ஏவுகணைத் தளங்களைச் சேதப்படுத்த முடியாத அளவிற்கு இவை நூற்றுக்கணக்கான அடி ஆழத்தில் பாறைகளுக்கு இடையே குடையப்பட்டுள்ளன. இந்தச் சுரங்கங்களிலிருந்து ஏவப்படும் ஏவுகணைகள், பாரசீக வளைகுடாவில் பயணிக்கும் எந்தவொரு கப்பலையும் சில நிமிடங்களில் தாக்கி அழிக்கும் திறன் கொண்டவை.
சமீபத்தில் நடைபெற்ற அமெரிக்க-இஸ்ரேல் தாக்குதல்களின் போது, கெஷ்ம் தீவில் உள்ள சில சுரங்க நுழைவாயில்கள் இலக்கு வைக்கப்பட்டன. இதற்குப் பதிலடியாக, கெஷ்ம் தீவில் இருந்து ஏவப்பட்ட ட்ரோன்கள் பஹ்ரைனில் உள்ள அமெரிக்கப் படைத்தளங்களைத் தாக்கின. சுற்றுலாப் பயணிகள் சுற்றித் திரிந்த பகுதிகளில் இப்போது ராணுவக் கண்காணிப்புக் கோபுரங்களும், ஏவுகணை ஏவுதளங்களும் ஆதிக்கம் செலுத்துகின்றன. இதனால், அங்கு வசிக்கும் சுமார் 1.5 லட்சம் மக்களின் இயல்பு வாழ்க்கை முற்றிலுமாகப் பாதிக்கப்பட்டுள்ளதுடன், குடிநீர் ஆலைகள் மீதான தாக்குதலால் கடும் தண்ணீர் தட்டுப்பாடும் ஏற்பட்டுள்ளது
தற்போது அமெரிக்க மெரைன் படை வீரர்கள் இந்தத் தீவைக் கைப்பற்றத் திட்டமிட்டு வருவதாகச் செய்திகள் கசிந்துள்ள நிலையில், ஈரான் தனது நிலத்தடி ஆயுதக் கிடங்குகளை மேலும் பலப்படுத்தி வருகிறது. ஒருபுறம் இயற்கை எழில் கொஞ்சும் சுற்றுலாத் தலமாகத் தெரிந்தாலும், மறுபுறம் ஒரு பெரும் போரைத் தீர்மானிக்கும் ராணுவ மையமாக கெஷ்ம் தீவு மாறியுள்ளது. ஹார்முஸ் நீரிணையை முடக்கி உலகப் பொருளாதாரத்தைச் சீர்குலைக்க ஈரான் வைத்திருக்கும் மிகப்பெரிய 'ஆயுதம்' இந்தத் தீவின் அடியில் தான் மறைந்திருக்கிறது எனப் பாதுகாப்பு நிபுணர்கள் எச்சரிக்கின்றனர்.
