அமெரிக்காவின் நியூயார்க் லா கார்டியா விமான நிலையத்தில் நேற்று நள்ளிரவு (மார்ச் 22, 2026) மாண்ட்ரியலில் இருந்து வந்த ஏர் கனடா எக்ஸ்பிரஸ் (Jazz Aviation) விமானம், தரையிறங்கிய போது ஓடுதளத்தில் குறுக்கே வந்த தீயணைப்பு வாகனத்தின் மீது பயங்கரமாக மோதியது. இந்த விபத்தில் விமானத்தின் முன்பகுதி சுக்குநூறாக நொறுங்கியதில், விமானி மற்றும் துணை விமானி ஆகிய இருவரும் சம்பவ இடத்திலேயே உயிரிழந்தனர். விபத்து நடந்த சில நிமிடங்களில், விமானப் போக்குவரத்துக் கட்டுப்பாட்டாளர் (Air Traffic Controller) ஒருவர் அழுதபடியே, "நான் மிகப்பெரிய தவறு செய்துவிட்டேன்" (I messed up) என்று சக அதிகாரிகளிடம் புலம்பும் ஆடியோ பதிவுகள் தற்போது வெளியாகி பெரும் அதிர்ச்சியை ஏற்படுத்தியுள்ளன.

விபத்திற்குச் சற்று முன்னதாக, மற்றொரு விமானத்தில் ஏற்பட்ட புகை வாடை காரணமாக அவசர உதவிக் கோரப்பட்டிருந்தது. அந்த அவசர அழைப்பிற்குப் பதிலளிக்கச் சென்ற தீயணைப்பு வாகனத்திற்கு (Truck 1), ஓடுதளத்தைக் கடக்கக் கட்டுப்பாட்டு அறை அதிகாரி அனுமதி அளித்துள்ளார். அதே சமயம் ஏர் கனடா விமானத்திற்கும் தரையிறங்க அனுமதி வழங்கப்பட்டிருந்தது. வாகனம் ஓடுதளத்தின் நடுவே வந்தபோது, ஆபத்தை உணர்ந்த அதிகாரி "நிறுத்து, நிறுத்து, நிறுத்து" (Stop, stop, stop) என்று சுமார் 12 முறை கத்தியுள்ளார். ஆனால், அதற்குள் சுமார் 24 மைல் வேகத்தில் வந்த விமானம் வாகனத்தின் மீது மோதி விபத்துக்குள்ளானது.

இந்த விபத்தின் போது விமானத்தில் 72 பயணிகள் மற்றும் 4 பணியாளர்கள் இருந்தனர். இதில் 41 பேர் காயமடைந்து மருத்துவமனையில் அனுமதிக்கப்பட்டுள்ளனர். தீயணைப்பு வாகனத்தில் இருந்த இரண்டு பாதுகாப்புப் படை வீரர்களுக்கும் பலத்த காயம் ஏற்பட்டுள்ளது. விமானத்தின் மூக்குப் பகுதி (Nose) முழுவதுமாகச் சிதைந்து, மின்கம்பிகள் மற்றும் பாகங்கள் அந்தரத்தில் தொங்கும் காட்சிகள் விபத்தின் தீவிரத்தைக் காட்டுகின்றன. இந்தத் துயரச் சம்பவத்தைத் தொடர்ந்து லா கார்டியா விமான நிலையம் தற்காலிகமாக மூடப்பட்டு, அனைத்துப் பயணங்களும் ரத்து செய்யப்பட்டுள்ளன.

அமெரிக்கப் பெடரல் ஏவியேஷன் அட்மினிஸ்ட்ரேஷன் (FAA) மற்றும் தேசிய போக்குவரத்துப் பாதுகாப்பு வாரியம் (NTSB) இந்த விபத்து குறித்துத் தீவிர விசாரணை நடத்தி வருகின்றன. ஓடுதளத்தில் ஒரே நேரத்தில் விமானத்திற்கும் வாகனத்திற்கும் அனுமதி வழங்கப்பட்டது எப்படி என்பது குறித்துக் கட்டுப்பாட்டு அறை அதிகாரிகளிடம் விசாரணை நடைபெறுகிறது. "நாங்கள் ஒரு அவசர நிலையைச் கையாண்டு கொண்டிருந்தோம், அந்தப் பதற்றத்தில் நான் தப்பு செய்துவிட்டேன்" என்று அந்த அதிகாரி கூறியிருப்பது, விமான நிலையப் பாதுகாப்பு நெறிமுறைகளில் உள்ள குளறுபடிகளை வெளிச்சமிட்டுக் காட்டியுள்ளது. உயிரிழந்த விமானிகளுக்கு கனடா பிரதமர் மார்க் கார்னி மற்றும் டொனால்ட் ட்ரம்ப் ஆகியோர் இரங்கல் தெரிவித்துள்ளனர்.