ஈரான் மற்றும் அமெரிக்கா-இஸ்ரேல் கூட்டணிக்கு இடையே போர் தீவிரமடைந்துள்ள நிலையில், அமெரிக்காவிற்கு புதிய ஆயுத ஏற்றுமதி உரிமங்களை (Arms Licenses) வழங்குவதை சுவிட்சர்லாந்து அரசு நிறுத்திவைத்துள்ளது. சுவிட்சர்லாந்தின் கூட்டாட்சி கவுன்சில் (Federal Council) மார்ச் 20, 2026 அன்று இந்த அதிரடி அறிவிப்பை வெளியிட்டது. ஈரானுடனான சர்வதேச ஆயுத மோதலில் ஈடுபட்டுள்ள நாடுகளுக்கு, அந்த மோதல் நீடிக்கும் வரை போர் தளவாடங்களை ஏற்றுமதி செய்ய அனுமதி அளிக்க முடியாது என்று சுவிஸ் அரசு திட்டவட்டமாகத் தெரிவித்துள்ளது.
சுவிட்சர்லாந்தின் நீண்டகால 'நடுநிலைமைக் கொள்கை' (Neutrality Policy) மற்றும் அந்நாட்டின் 'போர் தளவாடச் சட்டத்தின்' (War Materiel Act) அடிப்படையில் இந்த முடிவு எடுக்கப்பட்டுள்ளது. பிப்ரவரி 28 அன்று ஈரானில் போர் தொடங்கியதில் இருந்தே, அமெரிக்காவிற்கு புதிய ஆயுத ஏற்றுமதி உரிமங்கள் எதனையும் சுவிஸ் அரசு வழங்கவில்லை என்பது தற்போது அம்பலமாகியுள்ளது. இருப்பினும், ஏற்கனவே வழங்கப்பட்ட உரிமங்களின் கீழ் நடக்கும் ஏற்றுமதிகள் தொடரும் என்றும், ஆனால் அவை ஈரானுடனான போருக்குப் பயன்படுத்தப்படுகிறதா என்பதை ஒரு நிபுணர் குழு தொடர்ந்து கண்காணிக்கும் என்றும் தெரிவிக்கப்பட்டுள்ளது.
கடந்த வாரம் அமெரிக்க போர் விமானங்கள் சுவிட்சர்லாந்து வான்பரப்பைப் பயன்படுத்தக் கோரிய இரண்டு விண்ணப்பங்களை சுவிஸ் அரசு நிராகரித்திருந்தது. அதன் தொடர்ச்சியாக தற்போது இந்த ஆயுதத் தடையும் விதிக்கப்பட்டுள்ளது. "எந்தவொரு தரப்புக்கும் ஆதரவாகச் செயல்படாமல், சர்வதேசச் சட்டங்களின்படி நடுநிலையாக இருப்பதே எங்களது நோக்கம்" என்று சுவிஸ் பாதுகாப்பு அமைச்சர் மார்ட்டின் பிஸ்டர் (Martin Pfister) தெரிவித்துள்ளார். சுவிட்சர்லாந்தின் இந்த முடிவு, போர்க்களத்தில் அமெரிக்காவிற்கு ஆயுத விநியோகச் சங்கிலியில் சிறிய தாக்கத்தை ஏற்படுத்தக்கூடும் என்று கருதப்படுகிறது.
இந்த அறிவிப்பு அமெரிக்க அதிபர் டொனால்ட் ட்ரம்ப் தலைமையிலான நிர்வாகத்திற்கு அதிருப்தியை ஏற்படுத்தியுள்ளது. ஏற்கனவே வர்த்தக வரி தொடர்பான விவகாரங்களில் அமெரிக்கா மற்றும் சுவிட்சர்லாந்து இடையே மோதல் நிலவி வரும் சூழலில், இந்த ஆயுதத் தடை இருநாட்டு உறவில் மேலும் விரிசலை உருவாக்கும் என அஞ்சப்படுகிறது. சுவிட்சர்லாந்தின் இந்தத் துணிச்சலான முடிவு, மற்ற ஐரோப்பிய நாடுகளும் இதேபோன்ற நிலைப்பாட்டை எடுக்கத் தூண்டுமா என்பதை உலக நாடுகள் உன்னிப்பாகக் கவனித்து வருகின்றன.
