மத்திய கிழக்கில் ஈரானுக்கு எதிராக அமெரிக்கா மற்றும் இஸ்ரேல் மேற்கொண்டு வரும் போர், உலகளாவிய எண்ணெய் விநியோகத்தைப் பாதித்துள்ளதால், பிரித்தானியாவில் எரிபொருள் விநியோகத்தில் தட்டுப்பாடு ஏற்படலாம் என்ற அச்சம் எழுந்துள்ளது. ஹார்முஸ் நீரிணை (Strait of Hormuz) வழியாக நடைபெற்று வந்த கப்பல் போக்குவரத்து முடங்கியுள்ளதால், கச்சா எண்ணெய் விலை பீப்பாய் ஒன்று 100 டாலரைத் தாண்டி அதிகரித்துள்ளது. இதனால், எரிபொருள் நிரப்பு நிலையங்களில் தட்டுப்பாடு ஏற்படக்கூடும் என்றும், தேவைப்பட்டால் எரிபொருள் பங்கீடு (Rationing) முறையை அறிமுகப்படுத்த வேண்டியிருக்கும் என்றும் எரிசக்தி துறை வல்லுநர்கள் எச்சரித்துள்ளனர்.
இருப்பினும், இந்த அச்சம் குறித்துப் பதிலளித்துள்ள பிரதமர் கெய்ர் ஸ்டார்மர், பிரித்தானியாவின் எரிசக்தி விநியோகம் சீராக இருப்பதை உறுதி செய்ய அரசு அனைத்து நடவடிக்கைகளையும் மேற்கொண்டு வருவதாகத் தெரிவித்துள்ளார். பெட்ரோல் சில்லறை விற்பனையாளர்களிடம் முறையற்ற விலையேற்றம் அல்லது பதுக்கலில் ஈடுபட வேண்டாம் என்று அரசு கடும் எச்சரிக்கை விடுத்துள்ளது. மேலும், ஏப்ரல் மாதம் முதல் அமுலுக்கு வரும் புதிய மின்சார மற்றும் எரிவாயு விலைக் கட்டுப்பாடு, நுகர்வோருக்கு ஓரளவுக்குப் பாதுகாப்பை வழங்கும் என்றும், ஹீட்டிங் ஆயில் (Heating Oil) பயன்படுத்தும் குடும்பங்களுக்கு 53 மில்லியன் பவுண்டுகள் மதிப்பிலான நிவாரணத் தொகுப்பை வழங்க அரசு ஒப்புதல் அளித்துள்ளதாகவும் தெரிவிக்கப்பட்டுள்ளது.
போர்ச் சூழலால் ஏற்படும் விலைவாசி உயர்வைச் சமாளிக்க, பொருளாதார ரீதியாகப் பின்தங்கிய பிரித்தானியக் குடும்பங்களுக்கு உதவும் வகையில் லேபர் அரசாங்கம் பல்வேறு நலத்திட்டங்களை விரிவுபடுத்தியுள்ளது. குறிப்பாக, யுனிவர்சல் கிரெடிட் (Universal Credit) திட்டத்தின் கீழ் மூன்று அல்லது அதற்கு மேற்பட்ட குழந்தைகளைக் கொண்ட குடும்பங்களுக்கு மாதந்தோறும் சராசரியாக 440 பவுண்டுகள் மேலதிக நிதி வழங்கப்பட உள்ளது. இது போரினால் ஏற்படும் பொருளாதார பாதிப்புகளில் இருந்து ஏழை எளிய மக்களைப் பாதுகாக்க எடுக்கப்பட்ட ஒரு 'பாதுகாப்பு வலை' (Safety Net) நடவடிக்கையாகும்.
இதேவேளை, ஓய்வூதியதாரர்கள் மற்றும் நுகர்வோரின் நிதிச் சுமையைக் குறைக்கும் வகையில், எரிபொருள் வரி குறைப்பை (Fuel Duty cut) செப்டம்பர் மாதம் வரை நீட்டிக்க அரசு நடவடிக்கை எடுத்துள்ளது. நீண்ட காலத்திற்குப் போர் தொடர்ந்தால், பொருளாதார மந்தநிலை ஏற்பட வாய்ப்புள்ளதாக பொருளாதார ஆய்வாளர்கள் எச்சரித்தாலும், அரசாங்கம் தனது 'செக்யூரோனிக்ஸ்' (Securonomics) கொள்கையின் கீழ் பொது நிதியை உறுதிப்படுத்தவும், அத்தியாவசிய சேவைகளைத் தடையின்றிப் பேணவும் தொடர்ந்து கண்காணித்து வருவதாகத் தெரிவித்துள்ளது.
