அமெரிக்காவின் சுமார் $13 பில்லியன் மதிப்பிலான மிகப்பார்ந்த மற்றும் புதிய விமானம் தாங்கி போர்க்கப்பலான 'யுஎஸ்எஸ் ஜெரால்ட் ஆர். ஃபோர்டு' (USS Gerald R. Ford), ஈரான் உடனான போர் பதற்றங்களுக்கு மத்தியில் திடீரென பின்வாங்க வேண்டிய கட்டாயத்திற்கு தள்ளப்பட்டுள்ளது. இந்த பிரம்மாண்ட கப்பலின் ஒரு பகுதியில் திடீரென தீ விபத்து ஏற்பட்டுள்ளது; 

இருப்பினும், இந்தத் தீ எவ்வாறு பரவியது அல்லது தீப்பிடித்ததற்கான உண்மையான காரணம் என்ன என்பது தற்போது வரை மர்மமாகவே உள்ளது. இந்த எதிர்பாராத விபத்தால் கப்பலின் ஒரு பகுதி சேதமடைந்ததோடு, அங்கிருந்த மாலுமிகள் பாதுகாப்பான இடங்களுக்கு மாற்றப்பட்டு தற்போது தரையிலேயே உறங்க வேண்டிய இக்கட்டான நிலைக்குத் தள்ளப்பட்டுள்ளனர்.

இந்தக் கப்பல் பின்வாங்கியதற்கு மற்றொரு மிக முக்கிய மற்றும் வேடிக்கையான காரணமாக அதன் 'சுற்றுச்சூழல் நட்பு' (Eco-friendly) கழிவறைகள் சுட்டிக்காட்டப்படுகின்றன. அதிநவீன தொழில்நுட்பத்துடன் உருவாக்கப்பட்ட இந்தக் கழிவறைகள், போர்க்களத்தின் கடுமையான சூழலில் சரியாகச் செயல்படாமல் முடங்கியுள்ளன. 

ஆயிரக்கணக்கான மாலுமிகள் இருக்கும் இந்தக் கப்பலில், கழிவறைகள் 'பிளஷ்' (Flush) ஆகாதது மிகப்பெரிய சுகாதார சீர்கேட்டை உருவாக்கியுள்ளது. பல பில்லியன் டாலர் செலவில் உருவாக்கப்பட்ட ஒரு போர்க்கப்பல், ஒரு எளிய பிளம்பிங் தொழில்நுட்பக் குறைபாட்டால் போர்க்களத்தை விட்டு வெளியேறுவது அமெரிக்க கடற்படைக்கு பெரும் தர்மசங்கடத்தை ஏற்படுத்தியுள்ளது.

இந்தக் கழிவறைச் சிக்கல் இப்போது உருவானது அல்ல என்றும், இந்தக் கப்பல் வடிவமைக்கப்பட்ட காலத்திலிருந்தே பிளம்பிங் அமைப்பில் கோளாறுகள் இருந்ததாகவும் ஆதாரங்கள் தெரிவிக்கின்றன. அமிலக் கரைசல்களைக் கொண்டு அடிக்கடி இந்தக் குழாய்களைச் சுத்தம் செய்ய வேண்டியுள்ளதால், ஒவ்வொரு முறையும் லட்சக்கணக்கான டாலர்கள் செலவிடப்படுகிறது. 

தற்போது போர்க்களத்தில் இந்தத் தொழில்நுட்பக் கோளாறு உச்சக்கட்டத்தை எட்டியதால், மாலுமிகளின் அடிப்படைத் தேவைகளைக்கூடப் பூர்த்தி செய்ய முடியாத சூழல் உருவாகியுள்ளது. போர்க்கப்பலின் வலிமையை விட, பராமரிப்புச் செலவுகளும் இத்தகைய தொழில்நுட்பக் கோளாறுகளுமே கப்பலின் செயல்பாட்டை முடக்கியுள்ளன.

ஈரான் உடனான மோதல் உச்சத்தில் இருக்கும் வேளையில், அமெரிக்காவின் மிக வலிமையான ஆயுதமாகப் பார்க்கப்பட்ட இந்த விமானம் தாங்கி கப்பல் இத்தகைய காரணங்களுக்காகத் திரும்பப் பெறப்படுவது சர்வதேச அளவில் விவாதத்தைக் கிளப்பியுள்ளது. நவீன தொழில்நுட்பங்கள் என்ற பெயரில் அறிமுகப்படுத்தப்பட்ட மாற்றங்கள், நிஜமான போர்ச் சூழலில் தோல்வியடைந்துள்ளதை இது காட்டுகிறது. 

தற்போது இந்தக் கப்பல் பழுதுபார்ப்புப் பணிகளுக்காகத் தளத்திற்குத் திரும்பியுள்ள நிலையில், மீண்டும் எப்போது போர்க்களத்திற்குத் திரும்பும் என்பது குறித்த அதிகாரப்பூர்வத் தகவல்கள் இன்னும் வெளியாகவில்லை.