அமெரிக்காவின் இந்த 15 அம்சத் திட்டத்தில், ஈரான் தனது யுரேனியம் செறிவூட்டலை முழுமையாக நிறுத்த வேண்டும், அணுசக்தி நிலையங்களைச் சர்வதேச ஆய்வாளர்களுக்குத் திறந்துவிட வேண்டும் மற்றும் ஏவுகணைத் தயாரிப்புகளைக் குறைக்க வேண்டும் போன்ற கடுமையான நிபந்தனைகள் விதிக்கப்பட்டுள்ளன. இதற்குப் பதிலாக, ஈரான் மீதான பொருளாதாரத் தடைகளை முழுமையாக நீக்கவும், ஈரானின் சிவில் அணுசக்தித் திட்டங்களுக்கு உதவி செய்யவும் அமெரிக்கா முன்வந்துள்ளது. இந்த அமைதிப் பேச்சுவார்த்தையைப் பாகிஸ்தான் பிரதமர் ஷேபாஸ் ஷெரீப் முன்னின்று நடத்தத் தயாராக இருப்பதாகவும், அடுத்த வாரமே இதற்கான முதற்கட்டப் பேச்சுவார்த்தைகள் தொடங்க வாய்ப்புள்ளதாகவும் தகவல்கள் தெரிவிக்கின்றன.

இருப்பினும், இந்த போர் நிறுத்தத் திட்டத்தை ஈரான் ராணுவம் பகிரங்கமாக எள்ளி நகையாடியுள்ளது. "அமெரிக்கா தனக்குத் தானே பேச்சுவார்த்தை நடத்திக் கொள்கிறது; எங்களது வெற்றி கிடைக்கும் வரை போர் ஓயாது" என்று ஈரானிய ராணுவ செய்தித் தொடர்பாளர் எப்ராஹிம் சோல்பகாரி தெரிவித்துள்ளார். மறுபுறம், இஸ்ரேல் பிரதமர் பெஞ்சமின் நெதன்யாகுவின் அரசு இந்த அறிவிப்பால் அதிர்ச்சியடைந்துள்ளது. ஈரானை முழுமையாக வீழ்த்தாமல் போர் நிறுத்தத்தை மேற்கொள்வது தங்களுக்குப் பாதுகாப்பு அச்சுறுத்தலாக முடியும் என இஸ்ரேல் கருதுகிறது. அமெரிக்கா ஒருபுறம் அமைதி பேசினாலும், மறுபுறம் கூடுதலாக 3,000 வீரர்களை மத்திய கிழக்கு நோக்கி அனுப்பி வருவது குழப்பத்தை ஏற்படுத்தியுள்ளது.

இந்த அமைதித் திட்டச் செய்தி வெளியானதைத் தொடர்ந்து, சர்வதேசச் சந்தையில் கச்சா எண்ணெய் விலை சுமார் 6 சதவீதம் குறைந்து ஒரு பேரல் 98 டாலராக வீழ்ச்சியடைந்துள்ளது. ஒருவேளை இந்த ஒரு மாத கால போர் நிறுத்தம் நடைமுறைக்கு வந்தால், அது உலகப் பொருளாதாரத்திற்குப் பெரும் ஆறுதலாக இருக்கும். ஆனால், இஸ்ரேலின் தொடர் வான்வழித் தாக்குதல்கள் மற்றும் ஈரானின் பிடிவாதமான போக்கு காரணமாக, இந்த அமைதி முயற்சி வெற்றி பெறுமா என்பதில் இன்னும் சந்தேகம் நீடிக்கிறது. வரும் மார்ச் 27-ஆம் தேதிக்குள் ஈரான் இதற்குப் பதில் அளிக்க வேண்டும் என ட்ரம்ப் கெடு விதித்துள்ளதால், வரும் நாட்கள் மிகவும் முக்கியமானதாகக் கருதப்படுகிறது.