அமெரிக்கா மற்றும் ஈரான் இடையிலான போர் தீவிரமடைந்துள்ள நிலையில், ஈரானின் ஏவுகணை மற்றும் டிரோன் தாக்குதல்களால் மத்திய கிழக்கில் உள்ள சுமார் 13 அமெரிக்க ராணுவத் தளங்கள் வசிக்கத் தகுதியற்ற நிலைக்குத் தள்ளப்பட்டுள்ளதாக 'தி நியூயார்க் டைம்ஸ்' (The New York Times) செய்தி வெளியிட்டுள்ளது. பாதுகாப்பான மற்றும் பலப்படுத்தப்பட்ட ராணுவ முகாம்கள் சேதமடைந்ததால், ஆயிரக்கணக்கான அமெரிக்க வீரர்கள் அங்கிருந்து வெளியேற்றப்பட்டு, அருகில் உள்ள ஹோட்டல்கள் மற்றும் அலுவலகக் கட்டிடங்களுக்கு மாற்றப்பட்டுள்ளனர். களத்தில் நின்று போரிட வேண்டிய வீரர்கள், தற்போது பாதுகாப்பான ரகசிய இடங்களில் இருந்து 'ரிமோட்' (Remote) முறையில் போர்ப் பணிகளை மேற்கொண்டு வருவது உலக நாடுகளை வியப்பில் ஆழ்த்தியுள்ளது.
குவைத், கத்தார், பஹ்ரைன் மற்றும் சவுதி அரேபியா ஆகிய நாடுகளில் உள்ள முக்கிய அமெரிக்க தளங்கள் ஈரானின் இலக்காக மாறியுள்ளன. குறிப்பாக குவைத்தில் உள்ள 'போர்ட் ஷுவைபா' (Port Shuaiba) தளத்தின் மீது நடத்தப்பட்ட தாக்குதலில் அமெரிக்காவின் தந்திரோபாய செயல்பாட்டு மையம் (Tactical Operations Centre) முற்றிலும் அழிக்கப்பட்டது. இதேபோல் கத்தாரில் உள்ள 'அல் உதித்' (Al Udeid) மற்றும் சவுதி அரேபியாவின் 'பிரின்ஸ் சுல்தான்' தளங்களிலும் ஓடுதளங்கள் மற்றும் தகவல் தொடர்பு சாதனங்கள் முடக்கப்பட்டுள்ளன. இதனால் தரைப்படை வீரர்கள் ஒருங்கிணைந்து செயல்படுவதில் பெரும் சவால்கள் ஏற்பட்டுள்ள நிலையில், அவர்கள் சிதறிப் போய் ஹோட்டல்களில் தங்கும் நிலை ஏற்பட்டுள்ளது.
இந்தச் சூழலைத் தனக்குச் சாதகமாகப் பயன்படுத்த முயலும் ஈரான், அமெரிக்க வீரர்கள் தங்கியிருக்கும் ஹோட்டல்கள் மற்றும் ரகசிய இடங்களைக் கண்டறிந்து தங்களுக்குத் தகவல் தெரிவிக்குமாறு அரபு நாட்டு மக்களிடம் கோரிக்கை விடுத்துள்ளது. ஈரானின் புரட்சிகர பாதுகாப்புப் படை (IRGC), "அமெரிக்கப் பயங்கரவாதிகள் பதுங்கியிருக்கும் இடங்களை டெலிகிராம் மூலம் எங்களுக்குத் தெரிவியுங்கள்" என்று பகிரங்கமாக அறிவித்துள்ளது. இது ஹோட்டல்களில் தங்கியுள்ள அமெரிக்க வீரர்களின் பாதுகாப்பிற்குப் பெரும் அச்சுறுத்தலாக மாறியுள்ளது. ஒருபுறம் அதிநவீன ஆயுதங்களுடன் போர் நடந்தாலும், மறுபுறம் வீரர்கள் தங்குவதற்குக் கூட இடமின்றித் தவிக்கும் நிலை அமெரிக்காவின் ராணுவத் திட்டமிடலில் உள்ள ஓட்டைகளை வெளிச்சமிட்டுக் காட்டியுள்ளது.
இருப்பினும், அமெரிக்கப் பாதுகாப்புச் செயலாளர் பீட் ஹெக்செத் (Pete Hegseth) கூறுகையில், தளங்கள் சேதமடைந்தாலும் ஈரானுக்கு எதிரான தாக்குதல்கள் நிறுத்தப்படவில்லை என்று தெரிவித்துள்ளார். இதுவரை ஈரானின் 7,000-க்கும் மேற்பட்ட இலக்குகள் மீது அமெரிக்கா குண்டுவீசி அழித்துள்ளதாகவும், வீரர்களை இடமாற்றம் செய்வது ஒரு பாதுகாப்பு தந்திரமே தவிர பலவீனம் அல்ல என்றும் பென்டகன் விளக்கம் அளித்துள்ளது. ஆனால், ஒரு முறையான ராணுவக் கட்டமைப்பில் இருந்து செயல்படுவதற்கும், ஹோட்டல் அறைகளில் இருந்து பணியாற்றுவதற்கும் நிறைய வேறுபாடுகள் இருப்பதாக ராணுவ வல்லுநர்கள் எச்சரிக்கின்றனர். மார்ச் இறுதிக்குள் இந்தப் போர் ஒரு தீர்வை நோக்கி நகராவிட்டால், அமெரிக்காவின் இந்த 'ரிமோட் போர்' முறை மேலும் பல சிக்கல்களைச் சந்திக்கக்கூடும்.
