அமெரிக்காவின் டெக்சாஸ் மாகாணத்தில் உள்ள உலகின் மிகப்பெரிய சுத்திகரிப்பு நிலையங்களில் ஒன்றான வலேரோ ஆலையில், நேற்று (மார்ச் 23) மாலை சுமார் 6:30 மணியளவில் சக்திவாய்ந்த வெடிவிபத்து ஏற்பட்டது. இந்த விபத்தின் தாக்கம் பல மைல் தூரத்திற்கு உணரப்பட்டதுடன், விண்ணை முட்டும் அளவுக்குக் கரும்புகை மற்றும் தீப்பிழம்புகள் வெளியேறின. மத்திய கிழக்கில் ஈரான் மற்றும் அமெரிக்கா இடையே போர் மேகங்கள் சூழ்ந்துள்ள சூழலில் இந்த விபத்து நடந்ததால், இது ஒரு வெளிநாட்டுத் தாக்குதலாக இருக்குமோ என்ற அச்சம் முதலில் பரவியது. இதனால் அப்பகுதி மக்கள் மிகுந்த பீதிக்குள்ளாகினர்.

இந்த விபத்தைத் தொடர்ந்து போர்ட் ஆர்தர் நகர காவல்துறை மற்றும் தீயணைப்புத் துறை உடனடியாகச் செயல்பட்டு, மேற்குப் பகுதியில் வசிக்கும் மக்கள் வீடுகளுக்குள்ளேயே இருக்குமாறு (Shelter-in-place) உத்தரவிட்டது. ஜார்ஜ் வாஷிங்டன் பாலம் உள்ளிட்ட முக்கிய சாலைகள் மூடப்பட்டன. இருப்பினும், இந்த விபத்தில் யாருக்கும் காயங்களோ அல்லது உயிரிழப்புகளோ ஏற்படவில்லை என்பது உறுதி செய்யப்பட்டுள்ளது. ஆலையில் பணியாற்றிய அனைத்து ஊழியர்களும் பாதுகாப்பாக உள்ளனர். சில மணி நேரப் போராட்டத்திற்குப் பிறகு தீ ஓரளவிற்குக் கட்டுக்குள் கொண்டு வரப்பட்டதையடுத்து, பாதுகாப்பு எச்சரிக்கைகள் விலக்கிக்கொள்ளப்பட்டன.

முதற்கட்ட விசாரணையில், இந்த வெடிவிபத்து ஒரு தொழில்நுட்பக் கோளாறு காரணமாகவே ஏற்பட்டிருக்கலாம் எனத் தெரியவந்துள்ளது. குறிப்பாக, ஆலையில் உள்ள ஒரு 'இண்டஸ்ட்ரியல் ஹீட்டர்' (Industrial Heater) அல்லது டீசல் ஹைட்ரோ-டிசல்புரைசேஷன் பிரிவில் ஏற்பட்ட கோளாறே வெடிப்புக்குக் காரணம் என்று ஜெபர்சன் கவுண்டி ஷெரிப் ஜேனா ஸ்டீபன்ஸ் தெரிவித்துள்ளார். இது ஒரு திட்டமிட்ட தாக்குதல் அல்லது நாசவேலை என்பதற்கான எந்த ஆதாரமும் இதுவரை கிடைக்கவில்லை. இருப்பினும், சுற்றுச்சூழல் பாதுகாப்புத் துறை அதிகாரிகள் அப்பகுதியில் காற்றின் தரத்தை உன்னிப்பாகக் கண்காணித்து வருகின்றனர்.

ஈரான் ஹார்முஸ் நீரிணையை முடக்கியுள்ள நிலையில், அமெரிக்காவின் முக்கிய எரிசக்தி மையமான இந்த ஆலையில் ஏற்பட்ட விபத்து, உலகச் சந்தையில் கச்சா எண்ணெய் விலையில் தாக்கத்தை ஏற்படுத்தியுள்ளது. நாளொன்றுக்கு சுமார் 4,35,000 பேரல் எண்ணெயைச் சுத்திகரிக்கும் திறன் கொண்ட இந்த ஆலை தற்காலிகமாக மூடப்பட்டுள்ளதால், எரிபொருள் விநியோகத்தில் தட்டுப்பாடு ஏற்பட வாய்ப்புள்ளதாக அஞ்சப்படுகிறது. இந்த விபத்து ஒருபுறம் இருந்தாலும், அதிபர் ட்ரம்ப் ஈரானுக்கு வழங்கியுள்ள 5 நாள் காலக்கெடு மற்றும் ரகசியப் பேச்சுவார்த்தை குறித்த தகவல்கள் சர்வதேச அரங்கில் தொடர்ந்து விவாதிக்கப்பட்டு வருகின்றன.