மறைந்த கோடீஸ்வரர் ஜெப்ரி எப்ஸ்டீன் 2019-ல் சிறையில் தற்கொலை செய்து கொண்டதாக அறிவிக்கப்பட்டாலும், அவர் இன்னும் உயிரோடு இருக்கலாம் என்ற சதித் திட்டக் கோட்பாடுகள் (Conspiracy Theories) அவ்வப்போது எழுவதுண்டு. தற்போது புளோரிடாவின் நெடுஞ்சாலையில் கார் ஓட்டிச் செல்லும் ஒரு முதியவரின் வீடியோ சமூக வலைதளங்களில் பல மில்லியன் பார்வைகளைக் கடந்து வைரலாகியுள்ளது. அந்த நபர் பார்க்க அப்படியே எப்ஸ்டீனைப் போலவே இருப்பதால், "எப்ஸ்டீன் இன்னும் உயிரோடுதான் இருக்கிறார்" என்று நெட்டிசன்கள் பதிவிட்டு வருகின்றனர். குறிப்பாக, எப்ஸ்டீனின் பற்கள் மற்றும் முகக் கோடுகளுடன் (Smile lines) இந்த நபரின் முகத்தை ஒப்பிட்டுச் சில புகைப்படங்கள் வெளியிடப்பட்டுள்ளது பெரும் பரபரப்பை ஏற்படுத்தியுள்ளது.

இந்த விவாதங்களுக்கு முற்றுப்புள்ளி வைக்கும் விதமாக, வீடியோவில் இருந்த நபர் தனது அடையாளத்தை வெளிப்படுத்தியுள்ளார். அவர் தன்னை 'பீட்டர்' (Peter) என்று அறிமுகப்படுத்திக் கொண்டதோடு, தான் எப்ஸ்டீன் அல்ல என்றும், தன்னை 'பாம் பீச் பீட்' என்று அழைக்கலாம் என்றும் தெரிவித்துள்ளார். "நான் வெறும் டென்னிஸ் விளையாடவும், மதிய உணவு சாப்பிடவும் சென்று கொண்டிருந்தேன்; யாரோ ஒருவர் என்னை ரகசியமாக வீடியோ எடுத்து எப்ஸ்டீன் எனப் பரப்பிவிட்டனர்" என்று அவர் விளக்கம் அளித்துள்ளார். தான் ஒரு முன்னாள் டென்னிஸ் வீரர் மற்றும் தங்கப் பதக்கம் வென்றவர் என்பதையும் அவர் தனது இன்ஸ்டாகிராம் பக்கத்தில் பதிவிட்டுள்ளார்.

இருப்பினும், இந்த விவகாரத்தில் மற்றொரு திடுக்கிடும் தகவலை பீட் ஒப்புக்கொண்டுள்ளார். தனக்கும் எப்ஸ்டீனுக்கும் உருவ ஒற்றுமை இருப்பதை ஏற்கனவே பலமுறை மக்கள் தன்னிடம் கூறியிருப்பதாகவும், கடந்த காலங்களில் எப்ஸ்டீன் பங்கேற்ற ஒரு சில விருந்து நிகழ்ச்சிகளில் (Parties) தானும் கலந்து கொண்டிருப்பதாகவும் அவர் தெரிவித்துள்ளார். "அந்த விருந்துகளில் எப்ஸ்டீனை நான் பார்த்திருக்கிறேன்; அவர் ஒரு விசித்திரமான மனிதராக எனக்குத் தோன்றினார். அவருடன் நான் நேரடியாகப் பேசியதில்லை, ஆனால் அவர் அங்கு இருப்பதை நான் கவனித்திருக்கிறேன்" என்று பீட் கூறியுள்ளார். எப்ஸ்டீனின் நட்பு வட்டத்தில் இருந்த பல விஐபி-க்களின் பெயர்கள் தற்போது 'எப்ஸ்டீன் கோப்புகள்' மூலம் வெளியாகி வரும் நிலையில், பீட்டின் இந்த ஒப்புதல் சர்ச்சையை இன்னும் அதிகரித்துள்ளது.

தற்போது 'பாம் பீச் பீட்' ஒரு இணையதளப் பிரபலமாக (Viral Sensation) மாறியுள்ளார். அவர் செல்லும் இடங்களிலெல்லாம் மக்கள் அவரை அடையாளம் கண்டு புகைப்படம் எடுக்கத் தொடங்கியுள்ளனர். "நான் எப்ஸ்டீன் இல்லை என்று எத்தனை முறை சொன்னாலும் மக்கள் நம்புவதில்லை" என்று அவர் வேடிக்கையாகக் குறிப்பிட்டுள்ளார். அமெரிக்க நீதித்துறை சமீபத்தில் வெளியிட்டுள்ள எப்ஸ்டீன் தொடர்பான இறுதி ஆவணங்களில் டொனால்ட் ட்ரம்ப் மற்றும் பில் கிளிண்டன் ஆகியோரின் பெயர்கள் இடம்பெற்றுள்ளதால், எப்ஸ்டீன் தொடர்பான எந்தவொரு சிறு செய்தியும் உலகளவில் மிகப்பெரிய பேசுபொருளாகி வருகிறது.