நடிகர் ஆர்யா போல் நடித்து மோசடி செய்த 2 பேர் கைது! – போலீசாருக்கு நன்றி சொன்ன ஆர்யா!

நடிகர் ஆர்யா என நடித்து ஜெர்மனி வாழ் இலங்கை தமிழ் பெண்ணிடம் மோசடி செய்த இருவரை போலீசார் அதிரடியாக கைது செய்துள்ளனர்.
ஜெர்மனி வாழ் இலங்கை தமிழ் பெண் ஒருவர், நடிகர் ஆர்யா தன்னை திருமணம் செய்து கொள்வதாகக் கூறி தன்னிடமிருந்து, சுமார் 70 லட்சம் ரூபாய் வரை பணம் பெற்று, பின் திருமணம் செய்யாமல் ஏமாற்றி விட்டதாகவும் கூறி, நடிகர் ஆர்யா மீது தகுந்த நடவடிக்கை எடுத்து தனது பணத்தை மீட்டுத் தரும்படியும் புகார் அளித்திருந்தார். இந்த புகாரின்படி மத்திய குற்றப்பிரிவு சைபர் கிரைம் போலீசார் வழக்குப் பதிவு செய்து விசாரித்தனர்.

இந்த வழக்கு தொடர்பாக நடிகர் ஆர்யாவிடமும் போலீசார் நேரில் வரவழைத்து விசாரணை மேற்கொண்டனர். மத்திய குற்றப்பிரிவு சைபர் கிரைம் போலீசாரின் தொடர் விசாரணையில் நடிகர் ஆர்யாவிற்கும் இந்த வழக்கிற்கும் எந்தவித தொடர்பும் இல்லை என்பது உறுதியானது.

மேலும், விசாரணையில், சென்னை புளியந்தோப்பைச் சேர்ந்த முகமது அர்மான், சமூக வலைதளத்தில் நடிகர் ஆர்யாவாக தன்னை அறிமுகப்படுத்திக் கொண்டு, ஜெர்மனி வாழ் இலங்கைத் தமிழ் பெண்ணிடம் பேசி வந்ததும், நடிகர் ஆர்யாவின் பெயரில் திருமணம் செய்து கொள்வதாகக் கூறி, 70 லட்சம் ரூபாய் வரை பணம் பறித்ததும் தெரிய வந்தது.

இந்த குற்றச் செயலுக்கு முகமது அர்மானின் மைத்துனர் முகமது ஹுசைனி பையாக் உடந்தையாக இருந்ததும் தெரிய வந்தது. இதனையடுத்து மத்திய குற்றப்பிரிவு சைபர் கிரைம் போலீசாரின் தனிப்படையினர், குற்றவாளிகள் இருவரையும் ராணிப்பேட்டை மாவட்டம் பெரும்புலிப்பாக்கத்தில் இன்று கைது செய்தனர். அவர்களிடம் இருந்து 2 செல் போன்கள், 1 லேப் டாப், 1 ஐபேட் மற்றும், 65 லட்சம் ரூபாய் ரொக்கம் உள்ளிட்ட ஆவணங்களை போலீசார் கைப்பற்றினர்.

இந்நிலையில், உண்மையான குற்றவாளிகளை கண்டுபிடித்த போலீசாருக்கு நடிகர் ஆர்யா நன்றி தெரிவித்துள்ளார். இது குறித்து சமூக வலைதளமான ட்விட்டரில் அவர் வெளியிட்டுள்ள பதிவில், உண்மையான குற்றவாளியை கைது செய்த சைபர் கிரைம் போலீசாருக்கு நன்றி. இது நான் வெளிப்படுத்தாத ஒரு உண்மையான மன அதிர்ச்சி எனக் குறிப்பிட்டுள்ளார்.

Contact Us