நடிகர் சூர்யாவுக்கு மிரட்டல்: பாமக மாவட்ட செயலாளர் மீது வழக்குப்பதிவு!

நடிகர் சூர்யாவை தாக்கினால் ரூ.1 லட்சம் பரிசு என அறிவித்த பாமக மாவட்ட செயலாளர் மீது வழக்குப்பதிவு செய்யப்பட்டுள்ளது
நடிகர் சூர்யா நடிப்பில் வெளிவந்துள்ள திரைப்படம் ஜெய் பீம். பழங்குடியின மக்கள் குறிப்பாக, இருளர் மக்கள் பற்றி பேசும் இப்படம் பொதுமக்கள் மத்தியில் மிகுந்த வரவேற்பை பெற்றுள்ளது. இதனிடையே, ஜெய்பீம் படத்தில், கொடூர காவல் அதிகாரியை வன்னிய இனத்தவராக காட்சிப் படுத்தியிருப்பதாக சர்ச்சை எழுந்தது. அவரது வீட்டில் இருந்த காலாண்டர் உள்ளிட்டவைகள் பேசுபொருளானது.

இதையடுத்து, சர்ச்சைக்குரிய காட்சிகளை படக்குழு நீக்கியது. அதேசமயம், பாமக இளைஞரணி தலைவர் அன்புமணி ராமதாஸ் இதற்கு கண்டனம் தெரிவித்து அறிக்கை வெளியிட்டுருந்தார். அதற்கு பதிலளித்து நடிகர் சூர்யாவும் அறிக்கை வெளியிட்டார். இருப்பினும், நடிகர் சூர்யாவுக்கு தொடர்ந்து அச்சுறுத்தல்கள் விடுக்கப்பட்டு வருகின்றன. அவர்கள் மீது கடுமையான நடவடிக்கை எடுக்கப்பட வேண்டும் என கோரிக்கைகள் எழுந்துள்ளன.

இதனிடையே, மயிலாடுதுறை மாவட்ட காவல் கண்காணிப்பாளர் சுகுணாசிங்கிடம் பாமக மாவட்ட செயலாளர் சித்தமல்லி பழனிச்சாமி தலைமையில் பாமவினர் ஜெய்பீம் தயாரிப்பாளர், இயக்குனர்மீது நடவடிக்கை எடுக்கக்கோரி மனு அளித்தனர்.

அதன்பின்னர் செய்தியாளர்களை சந்தித்த சித்தமல்லி பழனிச்சாமி சாதி கலவரத்தை தூண்டும் வகையிலும், வன்னிய சமுதாய மக்களை இழிவுபடுத்திய நடிகர் சூர்யாவை தாக்கும் இளைஞர்களுக்கு மயிலாடுதுறை மாவட்ட பாமக சார்பில் ஒரு லட்சம் ரூபாய் பரிசு அளிக்கப்படும் என்றார்.

இந்த நிலையில், நடிகர் சூர்யாவை தாக்கினால் ரூ.1 லட்சம் பரிசு என அறிவித்த, மயிலாடுதுறை பாமக மாவட்ட செயலாளர் சித்தமல்லி பழனிச்சாமி மீது 5 பிரிவுகளில் போலீசார் வழக்குப்பதிவு செய்துள்ளனர். முன்னதாக, ஜெய்பீம் திரைப்பட எதிரொலியால் அப்படத்தின் நடிகர் சூர்யாவின் தி.நகர் இல்லத்திற்கு துப்பாக்கி ஏந்திய காவலர்கள் பாதுகாப்பு பணியில் அமர்த்தப்பட்டுள்ளனர். நடிகர் சூர்யா வெளியே சென்றால் அவருக்கு இரு காவலர்கள் பாதுகாப்பிலும் ஈடுபடுவார்கள் என தெரிவிக்கப்பட்டுள்ளது.
 

Contact Us