வருடத்திற்கு 28 லட்சம் சம்பளம்: ஆன்லைன் ரம்மியால் குடும்பத்தை கொன்று வங்கி ஊழியர் தற்கொலை

சென்னை பெருங்குடியில் மனைவி மற்றும் 2 குழந்தைகளை கொன்றுவிட்டு வங்கி அதிகாரி மணிகண்டன் தற்கொலை செய்துகொண்டார். போரூர் அப்பார்ட்மென்டில் வசதியோடு வாழ்த்து வந்த இந்த குடும்பம் மணிகண்டனால் கடன் தொல்லையில் இருந்து வந்ததாகவும், குடும்பத்தை கொலை செய்துவிட்டு மணிகண்டனும் தற்கொலை செய்துகொண்டதாக கூறப்படுகிறது.

சென்னை பெருங்குடியில் உள்ள தனியார் அப்பார்ட்மென்டின் ஏழாவது மாடியில் குடும்பத்துடன் வசித்து வந்தவர் மணிகண்டன் (36). இவர் போரூரில் உள்ள வங்கியில் உயர் பொறுப்பில் இருந்து வந்தார். இவரது மனைவி தாரா (35). இவர்களுக்கு தரண், தாஹன் என்ற இரண்டு சிறு பிள்ளைகள் இருந்தனர். கோயம்புத்தூரைச் சேர்ந்த மணிகண்டன் லண்டனை தலைமையிடமாக கொண்டு செயல்பட்டு பன்னாட்டு வங்கியான பார்க்லேஸ் வங்கியின் சென்னை கிளையில் உயர் பொறுப்பில் பணியாற்றி வருடத்திற்கு 28 லட்சம் ரூபாய் சம்பளம் பெற்று வந்துள்ளார். இந்நிலையில், கடந்த இரண்டு மாதத்திற்கு முன்னர் வேலையிழந்த மணிகண்டன், ஆன்லைன் ரம்மி விளையாட்டில் அதிகளவில் பணத்தை இழந்ததாக கூறப்படுகிறது.

அதனை தொடர்ந்து மணிகண்டன் தனது நண்பர்களிடம் பத்து லட்சம் ரூபாய்க்கு மேல் பணம் கடன் வாங்கியுள்ளார். இதனால், கணவன் மனைவி இடையே தகராறு ஏற்பட்டு வந்த நிலையில், கடந்த டிசம்பர் 1 ஆம் தேதி அன்று இவர்களது வீடு உள்பக்கமாக பூட்டிக்கிடந்து வீட்டை விட்டு யாரும் வெளியில் வரமால் இருந்துள்ளனர். இதனால் சந்தேகம் அடைந்த அக்கம் பக்கத்தில் வசிப்பவர்கள் பெருங்குடி காவல் நிலையத்துக்கு தகவல் கொடுத்துள்ளனர்.

சம்பவம் இடத்துக்கு வந்த போலீசார் நீண்ட நேரமாக கதவை தட்டியும் திறக்கவில்லை. இந்த நிலையில், கதவை உடைத்து உள்ளே சென்று பார்த்தபோது, தாராவும் இரு பிள்ளைகளும் சடலமாக கிடந்துள்ளார். மணிகண்டனும் சமையலறையில் தூக்கில் பிணமாக தொங்கியபடி கிடந்துள்ளார். இதன் பின்னர் போலீசார் நான்கு பேர் உடல்களையும் மீட்டு அரசு மருத்துவமனைக்கு அனுப்பி வைத்தனர். தொடர்ந்து வழக்கு பதிவு செய்து விசாரித்ததில், நல்ல சம்பளத்துடன் வசதியாக இருந்து வந்த மணிகண்டன் சமீப காலமாக தனது வட்டாரத்தில் அதிக கடன் வாங்கி அதை திருப்பி கொடுக்க முடியாமல் கஷ்டத்தில் இருந்துள்ளார்.

கடன் கொடுத்தவர்களுக்கு பதில் சொல்ல முடியாமலும், வேலைக்கு செல்லாததாலும் கணவன் – மனைவிக்கு இடையே தகராறு ஏற்பட்டு வந்துள்ளது. இதன் காரணமாக சம்பவத்தன்று மனைவி தாரா கணவனிடம் வாக்குவாதத்தில் ஈடுபடவே, ஆத்திரமடைந்த மணிகண்டன் கிரிக்கெட் மட்டையால் தாராவை தலையில் அடித்து கொலை செய்துள்ளார்.

பின்னர் இரு பிள்ளைகளையும் கழுத்தை நெரித்து கொன்று தானும் லுங்கியால் தூக்கு போட்டு தற்கொலை செய்துகொண்டார். இதுகுறித்து வழக்கு பதிவு செய்துள்ள பெருங்குடி போலீசார், கடன் தொல்லை காரணமாகத்தான் மணிகண்டன் குடும்பத்தை கொன்றுவிட்டு தற்கொலை செய்துகொண்டாரா? யார்யார் அவருக்கு பணம் கொடுத்துள்ளனர்? பணத்தை சூதாட்டத்தில் இழந்தாரா? வேலைக்கு செல்லாமல் இருந்தது ஏன்? போன்ற காரணம் குறித்து விசாரித்து வருகின்றனர்.

Contact Us