முதலமைச்சர் சி. ஜோசப் விஜய் குறித்துப் பொதுக்கூட்டத்தில் வன்முறையைத் தூண்டும் வகையிலும் அவதூறாகவும் பேசியதாக விளாத்திகுளம் திமுக எம்.எல்.ஏ ஜி.வி. மார்க்கண்டேயன் தூத்துக்குடி குற்றப்பிரிவு காவல்துறையினரால் அதிரடியாகக் கைது செய்யப்பட்டார். அதிகாலை நேரத்தில் வீட்டைச் சூழ்ந்து அவரைக் கைது செய்ய முயன்ற போது, அவரது மகனுக்கும் காவல் துறை அதிகாரிகளுக்கும் இடையே கடுமையான வாக்குவாதம் ஏற்பட்டு, அப்பகுதியில் பெரும் பரபரப்பை உருவாக்கியது.
கோவில்பட்டியில் நடைபெற்ற திமுக பொதுக்கூட்டத்தில் பேசிய ஜி.வி. மார்க்கண்டேயன், முதலமைச்சர் விஜய்யைக் கடுமையாகச் சாடியதுடன், சட்டப்பேரவை கூடும் போது அவரது எலும்புகளை உடைப்போம் என்று மிரட்டல் விடுக்கும் வகையில் பேசியதாக குற்றஞ்சாட்டப்பட்டது. இதனையடுத்து, தவெக தூத்துக்குடி வடக்கு மாவட்டச் செயலாளர் அளித்த புகாரின் பேரில், மார்க்கண்டேயன் மீது மிரட்டல் மற்றும் அமைதிக்குக் பங்கம் விளைவித்தல் உள்ளிட்ட 3 பிரிவுகளின் கீழ் வழக்குப்பதிவு செய்த காவல்துறை, திங்கள்கிழமை அதிகாலை 6 மணி அளவில் அவரது வீட்டைச் முற்றுகையிட்டது.
காவல்துறையினர் தனது தந்தையைக் கைது செய்ய முயன்ற போது குறுக்கிட்ட மார்க்கண்டேயனின் மகன், “முன்னறிவிப்பு எதுவும் இன்றி, வழக்கறிஞரைச் சந்திக்கக்கூட அனுமதிக்காமல் எந்த உரிமையில் அதிகாலையிலேயே அவரைக் கைது செய்கிறீர்கள்?” என்று அதிகாரிகளிடம் காரசாரமாகக் கேள்வி எழுப்பினார். காவல் துறை வாகனத்தை முற்றுகையிட்டு திமுக தொண்டர்கள் மற்றும் குடும்பத்தினர் போராட்டத்தில் ஈடுபட்ட நிலையில், அதிகாரிகளுக்கும் மார்க்கண்டேயனின் மகனுக்கும் இடையே நடந்த இந்த ஆவேச விவாதம் சமூக வலைதளங்களில் வெளியாகி வைரலாகி வருகிறது.
கடந்த காலங்களில் திமுக ஆட்சியில் இருந்த போது, முதலமைச்சரையோ அல்லது அரசின் செயல்பாடுகளையோ சமூக வலைதளங்களில் விமர்சித்தவர்கள் மீது குண்டர் சட்டத்தின் கீழ் நடவடிக்கை எடுக்கப்பட்டு கைது செய்யப்பட்ட நிகழ்வுகளை நெட்டிசன்கள் தற்போது சுட்டிக்காட்டி வருகின்றனர். “அன்று விமர்சித்தவர்களைக் கைது செய்த திமுக, இன்று தங்கள் கட்சி எம்.எல்.ஏ முதலமைச்சருக்கு நேரடியாகக் கொலை மிரட்டல் விடுத்ததற்காகக் கைது செய்யப்பட்ட போது மட்டும் காவல் துறையின் நடவடிக்கை தவறானது எனக் கூறுவது ஏன்?” என்று தவெக தரப்பினர் கேள்வி எழுப்பி வருவதால் தமிழக அரசியலில் இந்த விவகாரம் பெரும் விவாதப் பொருளாக மாறியுள்ளது.
