தமிழ் சினிமாவின் முன்னணி நடிகரான தனுஷ், தவெக தலைவர் விஜய்யின் அரசியல் நகர்வுகளைப் பின்பற்றித் தீவிர அரசியலில் களமிறங்க ஆயத்தமாகி வருவதாகத் தகவல்கள் வெளியாகி சமூக வலைத்தளங்களில் பெரும் பேசுபொருளாக மாறியுள்ளன. திருவள்ளூரில் நடைபெற்றத் தனது ரசிகர் மன்ற ரத்த தான முகாமில் பங்கேற்ற தனுஷ், வெறும் திரைத்துறை கொண்டாட்டங்களைத் தாண்டி நற்பணிகளில் தீவிரமாக ஈடுபட வேண்டும் என விடுத்த கோரிக்கை மற்றும் புதிய ரசிகர் மன்றக் கொடியின் அறிமுகம் ஆகிய நிகழ்வுகள் இத்தகைய அரசியல் சந்தேகங்களுக்குப் பலம் சேர்த்துள்ளன.
சமீபத்தில் நடைபெற்ற நிகழ்ச்சியில் தனது ஆதரவாளர்கள் மற்றும் ரசிகர்களிடையே பேசிய தனுஷ், “இவ்வளவு பேர் ஒரே இடத்தில் கூடியிருக்கும் இந்த ஒற்றுமையில் மிகப்பெரிய சக்தி உள்ளது. இந்த ஒற்றுமைக்கு வெறும் ஆடியோ வெளியீட்டு விழாக்கள் மற்றும் சந்திப்புகளைத் தாண்டி ஒரு தெளிவான நோக்கத்தைக் கொடுக்க வேண்டும். உங்கள் பகுதி மக்களுக்கும், சுற்றியுள்ள குடும்பங்களுக்கும் தேவையான உதவிகளைச் செய்து சமூகப் பணிகளை விரிவுபடுத்துங்கள்” என்று பேசினார். தனுஷின் இந்த உணர்ச்சிப்பூர்வமான உரை, அவர் மறைமுகமாகத் தனது அரசியல் நகர்வை உறுதிப்படுத்திவிட்டதாகவே ரசிகர்கள் கொண்டாடி வருகின்றனர்.
தமிழகத்தில் முதலமைச்சர் சி. ஜோசப் விஜய் தனது ‘விஜய் மக்கள் இயக்கம்’ வாயிலாகப் பல ஆண்டுகள் நற்பணிகளைச் செய்து, உள்ளாட்சித் தேர்தல்களில் சுயேச்சையாகப் போட்டியிட்டு வெற்றி பெற்று, பின்னர் தவெகவை உருவாக்கி மாபெரும் அரசியல் சக்தியாக வளர்ந்தார். அதே பாணியில், தனுஷும் தனது 15 ஆண்டுகால ரசிகர் நற்பணி இயக்கங்களை ஒருங்கிணைத்து, புதிய கொடியை அறிமுகப்படுத்தி, வரவிருக்கும் உள்ளாட்சித் தேர்தல்களில் தனது ஆதரவாளர்களைக் களம் இறக்கத் திட்டமிட்டு வருவதாகக் கோலிவுட் மற்றும் அரசியல் வட்டாரங்களில் தகவல்கள் கசிந்துள்ளன.
இருப்பினும், அரசியல் கட்சித் தொடக்கம் குறித்து தனுஷ் தரப்பிலோ அல்லது அவரது நிர்வாகிகளிடமிருந்தோ இதுவரை எந்தவொரு அதிகாரப்பூர்வ அறிவிப்பும் வெளியாகவில்லை. ‘அசுரன்’, ‘கர்ணன்’ போன்ற சமூக நீதியைப் பேசும் திரைப்படங்களில் நடித்த பிம்பமும், திருவள்ளூர் மேடையில் அவர் பேசிய எழுச்சி உரையும் தனுஷின் ரசிகர்களிடையே பெரும் எதிர்பார்ப்பை ஏற்படுத்தியுள்ள நிலையில், அவர் நிஜ அரசியலில் தடம் பதிப்பாரா என்பதைப் பொறுத்திருந்தே பார்க்க வேண்டும்.
